එ.ජා. පෙ සන්ධාන නායකත්ව අර්බුදය අවසන්

0

මතබේදයට තුඩු දී තිබු එක්සත් ජාතික පෙරමුණු නව සන්ධානයේ නායකත්ව අර්බුදය සම්බන්ධ පැවති සාකච්ඡා සාර්ථකව අවසන් වී තිබේ.

ඒ අනුව ජනපති අපේක්ෂකයා නම් කිරිමෙන් අනතුරුව නව සන්ධානයේ ගිවිසුම අත්සන් කිරීමට එජපෙ නායකයන් 17 සෙනසුරාදා අමාත්‍ය රාජිත සේනාරත්තනගේ නිල නිවසේ පැවති හමුවේදී එකඟ වී ඇත.

එක්සත් ජාතික පක්ෂයේ ව්‍යවස්ථානුකූලව කෘත්‍යාධිකාරී මණ්ඩලයේ සහ පාර්ලිමේන්තු කණ්ඩායමේ එකඟතාවයෙන් ඉදිරි ජනාධිපතිවරණ අපේක්ෂකයා තෝරා වහාම එය නිවේදනය කිරීමට සියලු දෙනා එකඟ වී ඇතැයි වාර්තා වේ.

මේ අතර නව සන්ධානයේ ලේකම් ධූරය බහුතරය නියෝජනය කරන එක්සත් ජාතික පක්ෂයට ලබාදීමට මෙහිදී එකඟවී ඇත.

එසේම සන්ධානයේ ඉදිරි කටයුතුවලදී ප්‍රතිපත්තිමය තීන්දු තීරණ සඳහා 70% ක කැමැත්ත අවශ්‍ය නොවන බවත් එය 51%ක බහුතරයකින් සිදුකළ යුතු බවත්, කිසියම් හෝ කරුණක් මත සන්ධානයේ එක් පාර්ශවයක් සම්බන්ධ විනය ක්‍රියාමාර්ග හෝ සන්ධානයෙන් ඉවත් කිරීමක් සිදුකිරීමට අවශ්‍ය වුව හොත් ඒ සඳහා 70%ක බහුතර කැමැත්ත ලැබිය යුතු යැයි ද මෙහිදී තීන්දු කර තිබේ.

මෙම සාකච්ඡාව සඳහා අමාත්‍යවරු වන රවී කරුණානායක, අකිල විරාජ් කාරියවසම්, මංගල සමරවීර එක්සත් ජාතික පක්ෂය නියෝජනය කරමින් ද මුස්ලිම් කොන්ග්‍රසය නියෝජනය කරමින් රවුෆ් හකීම් අමත්‍යවරයා ද, ජාතික හෙළ උරුමය නියෝජනය කරමින් පාඨලී චම්පික රණවක අමාත්‍යවරයා ද, එසේම රාජිත සේනාරත්න, අර්ජුන රණතුංග ඇතුළු නියෝජිත පිරිසක් සහභාගි වී ඇත.

අගෝස්තු 05 වනදා එළි දැක්වීමට තිබු එජපෙ නව සන්ධානයේ ලේකම් ධුරය තම පක්ෂයට ලබා ගත යුතු බවට එජාප මන්ත්‍රීවරුන් පිරිසක් කරන ලද ඉල්ලීම හේතුවෙන් සන්ධානය පිහිටුවීම දින නියමක් නොමැතිව කල් දමන ලදී.

Facebook Comments

wedding people