ගෝටා ආවොත් “දෙමළ ජනයාට අඳුරු යුගයක්”

0

සිංහල බෞද්ධයන්ම වෙනුවෙන් පෙනී සිටින උතුරේ අවසන් යුද්ධය මෙහෙයවු හිටපු ආරක්ෂක ලේකම්වරයා ජනාධිපති ධුරයට පත්වුවහොත් දෙමළ ජනයාට අඳුරු යුගයක් උදා වන බවට හිටපු මහ ඇමැතිවරයකු අනතුරු අඟවා තිබේ.

සිංහල බෞද්ධ මතවාදයේ සිටින ගෝඨාභය රාජපක්ෂට හ‍ට දෙමළ ජනතාව සහාය නොදිය යුතු බවට උතුරේ හිටපු මහ ඇමැති සී.වී.විග්නේෂ්වරන් යාපනයේදී මාධ්‍ය වෙත කියා සිටියේය.

“මහින්ද රාජපක්ෂ මෙයාව ජනාධිපතිවරණයට දැම්මේ ඇයි කියලා නම් දන්නේ නෑ. එයා පැමිණෙන එකෙන් දෙමළ මිනිස්සුන්ට අඳුරු යුගයක් පැමිණෙන එකනම් ස්ථිරයි. මොකද එයා මේක සිංහල බෞද්ධ රටක් කියන මතයේ ඉන්න කෙනෙක්.”

අධිකරණයේ නඩු කිහිපයක් පවතින ශ්‍රී ලංකා පොදුජන පෙරමුණෙන් ජනපති අපේක්ෂකත්වයට තෝරා පත් කරගෙන සිටින ගෝඨාභය රාජපක්ෂ හට සැබෑ දෙමළ ජාතිකයන් ජන්දය ලබා නොදෙනු ඇති බවටයි හිටපු මහ ඇමැතිවරයා විශ්වාසය පළ කරන්නේ.

ගෝඨාභය රාජපක්ෂ ප්‍රජාතන්ත්‍රවාදය වෙනුවෙන් පෙනී සිටින පුද්ගලයකු නොවන බව කී සී.වී.විග්නේෂ්වරන් ඔහු හට සහාය ලබා දෙන බවට තමන් ප්‍රකාශ කර නොමැති බව මෙන්ම ඔහුට සහයෝගය නොදිය යුතු බවද අවධාරණය කළේය.

මෙවර ජනාධිපතිවරණයට තම පාර්ශ්වයෙන් අපේක්ෂකයෙක් ඉදිරිපත් නොකරන බව පවසන හිටපු මහ ඇමැතිවරයා දෙමළ ජනයාගේ ගැටලුවලට ස්ථිර විසඳුම් ලබාදිය හැකි සහ ඒ අපේක්ෂකයන්ගේ ප‍්‍රතිපත්ති මත පදනම්ව ඉදිරි ජනාධිපතිවරණයේදී තීරණයක් ගන්නා බව ද සඳහන් කළේය.

ජනාධිපතිවරණය ප්‍රකාශ කිරිමෙන් පසුව පක්ෂ වලින් ඉදිරිපත් වන අපේක්ෂකයන් සලකා බලා සෙසු දෙමළ පක්ෂ සමඟ සාකච්ඡා කර තීරණයක් ගන්නා බවයි උතුරේ හිටපු මහ ඇමැති සී.වී.විග්නේෂ්වරන් වැඩි දුරටත් කියා සිටියේ.

Facebook Comments

wedding people