ගෝටා තවමත් ඇමරිකන්

මහින්ද රාජපක්ෂ විසින් නම් කොට තිබෙන ශ්‍රී ලංකා පොදුජන පෙරමුණේ ජනාධිපති අපේක්ෂකයා ශ්‍රී ලංකාවේ ඡන්දයකට දායක වීමට අවශ්‍ය වන්නාවූ වෙනත් රටක පුරවැසියකු නොවීමේ මූලික සුදුසුකම සපුරා තිබේද යන්න සම්බන්ධයෙන් බරපතල සැකයක් පහල වී තිබේ.

ඇමරිකා එක්සත් ජනපද රජය නිකුත් කළ මේ වසරේ එරට පුරවැසි භාවය අත් හළ පුද්ගලයන්ගේ කිසිදු ලැයිස්තුවක නන්දසේන ගෝඨාභය රාජපක්ෂ ගේ නම සඳහන්ව නැත.

එක්සත් ජනපද අභ්‍යන්තර ආදායම් සේවාව විසින් අගෝස්තු 7 දිනයෙන් යුතුව අගෝස්තු 15 දා ප්‍රසිද්ධියට පත් කර ඇති පුරවැසි භාවය අත්හැරීමට තීරණය කළ පුද්ගලයන්ගේ නම් දැක්වෙන පිටු 17 ක ලේඛනයේ ගෝඨාභය රාජපක්ෂගේ නම නැත.

එහි දැක්වෙන්නේ 2019 ජූනි 30 දායින් අවසන් වන තුන් මාසය තුල එක්සත් ජනපද පුරවැසි භාවය අත්හළ පුද්ගලයන්ගේ නම් ය.

එයාකාර ලේඛනයක් සෑම තුන් මසකට වරක් ප්‍රසිද්ධියට පත් කෙරෙන අතර 2019 ජනවාරි 1 සිට 2019 මාර්තු 1 දක්වා ලැයිස්තුවේද නන්දසේන ගෝඨාභය රාජපක්ෂගේ නම සඳහන් නොවේ.

ගෝඨාභය රාජපක්ෂ 2003 ජනවාරියේ සිට ඇමරිකා එක්සත් ජනපද පුරවැසියෙක් වන අතර එසේ තිබියදී තම සහෝදර මහින්ද රාජපක්ෂගේ රජය යටතේ 2005 නොවැම්බර් 24 දා ආරක්ෂක ලේකම් ධුරයේ දිවුරුම් දුන් ඔහු 2005 නොවැම්බර් 30 දා තමන්ගේම අමාත්‍යාංශයෙන් ශ්‍රී ලංකාවේද පුරවැසි භාවය ප්‍රදානය කොටගෙන තිබේ. එතැන් පටන් ඔහු ද්විත්ව පුරවැසියෙකි.

එසේ සිටියදී, හිටපු ආරක්ෂක ලේකම්වරයා මේ වසරේ අප්‍රේල් 26 දා කටුනායක ගුවන් තොටුපලේදී ප්‍රකාශ කොට සිටියේ තමන් ජනාධිපති ධුරයට සඳහා තරග වැදීම “සියයට සියයක්ම” සහතික බවයි.

මේ අතර තමන් ගෝඨාභය රාජපක්ෂගේ පුරවැසි භාවය, ඡන්ද දායකත්වය සහ ශ්‍රී ලාංකික විදේශ ගමන් බලපත්‍රයක් ලබා ගැනීම ඇතුළු කරුනු සම්බන්ධයෙන් කඩිනම් පරීක්ෂණයක් පවත්වන ලෙස ඉල්ලා පුරවැසි බලයේ කැඳවුම්කරු වන ගාමිණී වියන්ගොඩ සහ මහාචාර්ය චන්ද්‍රගුප්ත තේනුවර වැඩබලන පොලිස්පතිවරයාට පැමිණිල්ලක් කර තිබේ.

අදාළ පැමිණිලි දෙක පිළිබඳව විමර්ශනය කරන ලෙස වැඩබලන පොලිස්පති චන්දන වික්‍රමරත්න 16 සිකුරාදා කොළඹ අපරාධ කොට්ඨාසයට යොමු කර ඇතැයි මාධ්‍ය වාර්තා කළේය.