උතුරේ පාරේ බෝඩ් ගැලවීමටත් ත්‍රස්ත පනත යොදාගනී

සමාජ සේවකයකුගේ නම සදහන් වීදි නාම පුවරුවක්, පැය 72 ක් තුළ ඉවත් නොකළහොත් ත‍්‍රස්තවාදය වැළැක්වීමේ පනතින් දඬුවම් කරන බවට කිලිනොච්චි දිස්ත්‍රික්කයේ ප්‍රාදේශීය සභාවක සභාපතිවරයකුට පොලිසිය තර්ජන එල්ලකර තිබේ.

මෙම තර්ජනයෙන් හා බියගැන්වීමේ බලපෑම නිසා කරච්චි ප්‍රදේශීය සභාවට වහාම එම වීදි නාම පුවරුව කඩා ඉවත් කිරීමට සිදුවී තිබේ.

අප්‍රේල් 08 වැනි සිකුරාදා උදේ පාන්දරින්ම යාපනය නගරාධිපති විශ්වලිංගම් මනිවන්නන් කුප්‍රකට ත්‍රස්තවාදය වැලැක්වීමේ විමර්ශන අංශය (TID) විසින් අත්අඩංගුවට ගෙන තිබිණි.

අනතුරුව යාපනයේ මහේස්ත්‍රාත් අධිකරණය විසින් ඔහුව ඇප මත මුදා හරින ලදී. ඔහුට විරුද්ධව නගා තිබූ විකාර සහගත චෝදනාව වන්නේ අලුතින් පිහිටුවනු ලැබූ ප්‍රාදේශීය සිවිල් අධීක්ෂණ කණ්ඩායමේ නිල ඇදුම මේ වන විට අභාවයට ගොස් ඇති එල්ටීටීඊයේ පොලිස් බලකායේ නිල ඇඳුමට සමාන සේ දිස්වීම නිසා එය ‘එල්ටීටීඊය පුනරුත්ථානය කිරීමට දරන උත්සාහයක්’ සේ හඳුනා ගැනීමයි.

පසුදා, එනම් සෙනසුරාදා පාන්දර 05 ට, පෙරකී කිලිනොච්චි දිස්ත්‍රික්කයේ කරච්චි ප්‍රදේශීය සභාවේ සභාපති අරුණාචලම් වේළමාලිකිතන් පොලීසිය විසින් පරීක්ෂණයක් සඳහා කැඳවනු ලැබීය. උදේ 8 ට පමණ ඔහු පොලිසියට ගිය අතර, ඔහුටද එම අපරාධය සම්බන්ධයෙන්ම, එනම් “එල්ටීටීඊ ය පුනරුත්ථානය කිරීමට උත්සාහ දැරීම” යන චෝදනාව එල්ල කරනු ලැබිණි.

මෙම චෝදනාවට අතිරේක වශයෙන්, එය පැන නැගීමට හේතු වූ කාරණය ඊටත් වඩා හාස්‍යජනක වූවකි. එනම් මීට වසර දෙකකට පෙර මියගිය සමාජ සේවකයකුගේ නමින් වීදියක් නම් කිරීමය.

එම්මානුවෙල් කොලින්ස්ටාස් එල්ටීටීඊයේ හිටපු සාමාජිකයෙකි. සංවිධානයේ ඔහු පාවිච්චි කළ නම වූයේ‘වෙට්‍රිකොන්ඩන්’ නොහොත් වෙට්‍රි ය. යුද්ධයෙන් පසු හමුදාව විසින් මොහු ‘පුනරුත්ථාපන’ වැඩසටහනක් යටතේ රඳවා තබාගනු ලැබීය. ‘පුනරුත්ථාපනය කොට” නිදහස් කරන ‘වෙට්‍රි’ ප්‍රජා මධ්‍යස්ථානයේ සභාපතිවරයා ලෙස ප්‍රාදේශීය ප්‍රජාව සමඟ සමාජ කටයුතු වල නිරත විය. එමෙන්ම ඔහු එහි ක්‍රීඩා සමාජයේ ද වැඩ කොටසක් කරමින් ප්‍රදේශයේ තරුණ තරුණියන්ට ක්‍රීඩා පුහුණුව ලබා දුන්නේය.

ප්‍රදේශවාසීන් පවසන පරිදි, කසිප්පු සහ මත්ද්‍රව්‍ය ප්‍රදේශයෙන් තුරන් කිරීම සදහා මහත් කැපවීමෙන් යුතුව ඔහු කාලයත් ශ්‍රමයත් බොහෝ සෙයින් කැප කළේය.

සිවිල් යුද්ධය අවසන් වීමෙන් පසු මත්ද්‍රව්‍ය හා කසිප්පු යන දෙවගයේ ම විකිණීමත්, භාවිතයත් උතුරු පළාතේ වේගවත් වර්ධනයක් පෙන්නුම් කළේ ය.

එල්ටීටීඊ විසින් පළාත පාලනය කළ සමයේ එවැනි දෑ දැඩි නීති මගින් තහනම් කර තිබූ බව මහජනතාව පෙන්වා දෙයි.

කරච්චි ප්‍රාදේශයේ ජනතාව පවසන්නේ ඒවා මුලිනුපුටා දැමීමේ ඔහුගේ භූමිකාව ඉතා වැදගත් එකක් වූ බවත් එමගින් සිය ගණනක් තරුණ තරුණයන්ගේ ජීවිත ආරක්ෂා වූ බවත්ය. නමුත් අවාසනාවකට මෙන්, වෙට්‍රි මීට වසර දෙකකට පෙර රිය අනතුරකින් මිය ගියේය.

කරච්චි ජනතාව වෙනුවෙන් ඔහු කළ සේවයට උපහාරයක් වශයෙන්, එම වැසියන් සහ ඔහුගේ පවුලේ සාමාජිකයන් ඔහු ජීවත් වූ පටු මාවත ‘වෙට්‍රි වීදිය’ ලෙස නම් කරන ලෙස යෝජනා කර තිබේ.

“ජනතාව අතර ඉතා හොඳ නමක් ඔහු සතුව ඇති නිසා මහජනතාවගේ කැමැත්තට ගරු කිරීමට අපට සිදුවුනා. අපට මේ සම්බන්ධයෙන් යෝජනාවක් සම්මත කර එය ගැසට් කිරීමට තරම් කාලයක් තිබුනේ නැහැ. ඔහුගේ මරණ සංවත්සරය ඉක්මනින් ළඟා වෙමින් තිබුන නිසා එම නාම පුවරුව සංකේතාත්මකව විවෘත කිරීම ප්‍රකාශයට පත් කලා” යි අරුණාචලම් වේළමාලිකිතන් JDS වෙබ් අඩවියට පවසා තිබේ.

කෙසේ වෙතත් පැය 72 ක් ඇතුළත ‘වෙට්‍රි වීදිය’ නම් වූ මෙම පුවරුව ඉවත් කරන ලෙසත්, එසේ නොකරන්නේ නම් ඔහුව ‘එල්ටීටීඊය පුනරුත්ථානය කිරීමට උත්සාහ කිරීම’ යන චෝදනාව මත ත්‍රස්තවාදය වැළැක්වීමේ පනත යටතේ රඳවා තබා ගැනීමට සිදුවන බවත් කිලිනොච්චි පොලිසිය සෙනසුරාදා උදේ ප්‍රදේශීය සභාවේ සභාපතිවරයාට අවසන් නිවේදනයක් නිකුත් කරනු ලැබිණි.

ත්‍රස්තවාදය වැලැක්වීමේ පනත යටතේ ව්‍යාජ හේතු මත චෝදනා කරනු ලැබීම සැබෑවක් වීම පිළිබඳ පූර්ණ අවබෝධයක් ඇති ප්‍රදේශවාසී පවුල් විසින් මෙම නාම පුවරුව ඉවත් කරන්නැයි සභාපතිවරයාට යෝජනා කර ඇත.

“ඔහු මේ වන විටත් මියගොස් සිටින අයෙක්, ඒ නිසා කරුණාකර ආරක්ෂා වෙන්න,” යි වෙට්‍රිගේ පවුලේ සාමාජිකයෝ අරුණාචලම් වේළමාලිකිතන්ට පවසා ඇත.

පසුව, ප්‍රදේශීය සභාවේ උපදෙස් ප්‍රකාර එහි සේවකයන් විසින් ඉරිදා උදෑසන මෙම නාම පුවරුව එතැනින් ඉවත් කරන අයුරු දක්නට ලැබිණි.

“කෙසේ වෙතත්, ඉදිරියේ දී ප්‍රදේශීය සභාව ඔහු වෙනුවෙන් මෙම වීදිය නම් කොට එය ගැසට් කිරීමට යෝජනාවක් ගෙන එනවා ඇති. එමෙන්ම එය ‘එම්මානුවෙල් කොලින්ස්ටාස් ’වීදිය ලෙස හඳුන්වනු ලබනවා ඇති,” යි වේළමාලිකිතන් JDS වෙබ් අඩවියට වැඩි දුරටත් පවසා තිබේ.

ලංකාණ්ඩුවට එරෙහි එක්සත් ජාතීන්ගේ මානව හිමිකම් කවුන්සිලයේ යෝජනාවට පෙරත්, පසුවත් උතුරු හා නැගෙනහිර දෙමළ ජනතාව වෙත දැඩි තර්ජන එල්ල වී ඇති අතර යුද්ධයෙන් පීඩාවට පත් දෙමළ ජනයා බිය ගැන්වීම සඳහා අත්තනෝමතික ලෙස ත්‍රස්තවාදය වැලැක්වීමේ පනත යොදා ගනිමින් තිබේ.