ඉදිරියේදී ප්‍රජාතන්ත්‍රවාදී පාලනය ඉදිරියට ගෙන යනවාද නොඑසේ නම් නැවත වරක් රාජපක්ෂ රෙජීමය හරහා හමුදා පාලනයක් ඇත කරනවාද යන්න ජනතාව තීන්දු කල යුතු බව අගමැතිවරයා ප්‍රකාශ කර තිබේ.
පොහොට්ටු පක්ෂයේ සමඟ එක්ව ඇත්තේ විශ්‍රාම ගිය හමුදා නිලධාරීන් කණ්ඩායමක් බවට අගමැති රනිල් වික්‍රමසිංහ 24 බ්‍රහස්පතින්දා වැවිලි කර්මාන්ත අමාත්‍ය නවින් දිසානායක මහතා එක්සත් ජාතික පක්ෂයේ ජාතික සංවිධායක ධූරයේ වැඩ භාරගැනීමේ අවස්ථාවට එක්වෙමින් කිය සිටියේය.
“අද පොහොට්ටුවට තියෙන අලූත් මුහුණු මොනවාද? විශ්‍රාම ගිය හමුදා නිලධාරීන් කණ්ඩායමක් පමණයි. පාර්ලිමේන්තුවේ ඝෝෂා කරන මන්ත්‍රිවරයෙකුගේ මුහුණක් එක්ක පොස්ටරයක්වත් තියෙනවාද? නෑ! ඔක්කොම ඉන්නේ විශ්‍රාම ගිය හමුදා නිලධාරීන්. රාජපක්ෂ රෙජිමය එදා ඇතිකරන්න සහය දුන්නු හමුදා නිලධාරීන් තමයි පොහොට්ටුවට එක්වී සිටින අලූත් මුහුණු. පාර්ලිමේන්තුවේ කෑ ගහන උදවිය මේ හමුදා නිලධාරීන්ගේ පඹයින් ගාණට පත් වෙලා.” යි අගමැතිවරයා පෙන්වා දෙයි.
එක්සත් ජාතික පක්ෂ ප්‍රජතන්ත්‍රවාදි තරුණ නායකයින්ට විරුද්ධව සිටින්නේ රාජපක්ෂ රෙජිමය සමග කටයුතු කොට විශ්‍රාම ගිය හමුදා නිලධාරීන් පිරිසක් බව පවසන අගමැතිවරයා ඔවුන්ගෙන් ප්‍රජාතන්ත්‍රවාදය ආරක්ෂා වේවිද ? ඔවුන් කරන්නේ කුමක්ද? යන්න ප්‍රශ්න කර සිටී.
පක්ෂය ජයග්‍රහණය කරා මෙහෙයවීමට තරුණයන් හට බාර දී ඇති බවත් ප්‍රජාතන්ත්‍රවාදයද, ඒකාධිපතිවාදයද යන්න තීරණය කිරීම සඳහා එම තරුණ පිරිසට සහයෝගය ලබාදෙන ලෙස අගමැතිවරයා ඉල්ලා සිටියේය.
මාධ්‍යවේදීන්ට අනතුරක්
රාජපක්ෂ රෙජීමය නැවත වරක් බලයට පත්වුවහොත් පෙර පැවති රාජපක්ෂ පාලනය මාධ්‍යවේදීන්ට සහ ජනතාවට කරන ලද අපරාධ වලට එරෙහිව කටයුතු කල මාධ්‍යවේදීන් හට අතුරුදන් වන්නට සිදුවේවි යැයි අගමැති රනිල් වික්‍රමසිංහ අනතුරු ඇඟවීය.
එදා ලසන්ත වික්‍රමතුංග ඝාතනය වුණා. එක්නැලිගොඩ අතුරුදහන් වුණා.මා එක් කාරණයක් අවධාරණය කරන්නම්. මේ පිරිස වෙනුවෙන් පෙනී සිටින මාධ්‍යවේදීන් ගණනාවකට ඔවුන් බලයට පැමිණයහොත් අතුරුදන් වන්නට සිදුවේවි.
රාජපක්ෂ පාලනයක් නැවත ගෙන ඒමට උත්සාහ දැරීම “තමන්ගේ බෙල්ල වටේ තමන්ම තොන්ඩුව දමා ගැනීමක්” බව අගමැතිවරයා වැඩි දුරටත් අවධාරණය කළේය.
Facebook Comments
