මැරුණු දරු දැරියන් සැමරීමට ඇසළ සැණකෙළියට නැති බාධා

0

වසංගතය හේතුවෙන් සිදුවන මරණ ප්‍රමාණය වාර්තාගත ලෙස ඉහළ යද්දී දහස් ගණන් රැස් කරවා මහනුවර ඇසළ පෙරහැර පවත්වන ආණ්ඩුව සමුලඝාතනයට ලක්වු සිය සමීපතමයන් සැමරීමට උතුරේ දෙමළ ජනයාට ඇති අයිතියට බාධා පමුණුවා තිබේ.

ශ්‍රී ලංකා ගුවන් හමුදාව විසින් පහලොස් වසරකට ඉහතදී බෝම්බ හෙලීමෙන් සමුලඝාතනයට පත් පාසල් දැරියන් වෙනුවෙන් පවත්වන්නට යෙදුනු සැමරුම් ප්‍රදේශය පුරා හමුදා, පොලිස් දැඩි රැකවල් යොදා නැවැත්වීමට කටයුතු කර තිබු බවයි පළාත් බද වාර්තාකරුවන් පවසන්නේ.

ආපදාවන්ට මුහුණ දීම සහ ප්‍රථමාධාර ලබාදීම පිළිබඳව සිසුවියන් සඳහා වූ වැඩ මුළුවක් මුලතිව් දිස්ත්‍රික්කයේ වල්ලිපුනම් හි සෙන්චෝලේ අනාථ නිවාසයේ පැවැත්වෙද්දී 2006 අගෝස්තු 14 දා හෙලන සුපර්සොනික් ප්‍රහාරක යානා බෝම්බ වැලකින් වයස අවුරුදු 1 ත් 18ත් අතර දැරියන් පනහක් ඇතුළු හැට එක් දෙනකු මරුමුවට පත් විය.

එකසිය පනහකට වැඩි පිරිසක් බරපතල ලෙස තුවාල ලැබූහ. ඇතැමෙක් සදාකාලයටම ආබාධිත වූහ.

එම ඛේදවාචකයට ගොදූරු වුවන් සිහි කරමින් සෑම වසරකම වල්ලිපුනම් හි සෙන්චෝලේ අනාථ නිවාසය පැවැති ස්ථානයේ පවත්වන පුෂ්පදීප උපහාරයට මෙවර කිසිවෙකුටත් සහභාගී විය නොහැකි ආකාරයට අගෝස්තු 14 ඉරිදා උදෑසන සිට රාත්‍රිය දක්වා ප්‍රදේශයේ ආරක්ෂාව තර කර තිබු බව පළාත් බද වාර්තාකරුවෝ වැඩි දුරටත් පවසති.

ආරක්ෂක අංශ විසින් මාධ්‍යවේදීන්ට ද එම ප්‍රදේශයට ඇතුළු වීමට ඉඩ ලබා දී ඇත්තේ ඔවුන්ගේ රාජකාරි හැදුනුම්පත පරීක්ෂා කිරීමෙන් පසුවයි.

කෙසේ නමුත් ඝාතනයට ලක් වු පිරිස සිහි කරමින් ප්‍රදේශයේ ස්ථාන කිහිපයකම පුද්ගලික මට්ටමෙන් අනුස්මරණ සිදු කෙරෙුන බව ඔවුහු වැඩි දුරටත් පවසති.

පුදුකුඩිඉරිප්පු ප්‍රාදේශීය සභා මන්ත්‍රී ශිවපාදම් කුගනේෂන් තම නිවස ඉදිරිපිටදීත්, උතුරු පළාත් සභා මන්ත්‍රී තුරෙයිරාසා රවිහරන්, ප්‍රාදේශිය සභා මන්ත්‍රීවරුන් වන සින්නරාසා ලෝගේෂ්වරන් හා මරියනායගම් තොම්මෙයිපිල්ලේ පක්ෂ කාර්යාලය තුලත් ඉලංගෙයි තමිළ් අරසු කච්චි (ITAK) මධ්‍යම කාරක සභික පීටර් ඉලන්චේලියන් මුලතිව් මහා විද්‍යාලය ඉදිරිපිටදීත් මල් පහන් දල්වා උපහාර දක්වා තිබේ.

ප්‍රහාරය සමයේ ශ්‍රී ලංකා රජයේ ප්‍රකාශක කෙහෙළිය රඹුක්වැල්ල අමාත්‍යවරයා සෙන්චෝලේ එල්ටීටීඊ යුද පුහුණු කඳවුරක් බවට චෝදනා කරමින් ප්‍රකාශ කළේ එය යුක්ති සහගත ඉලක්කයක් බවයි.

එසේවෙතත්, ශ්‍රී ලංකා සටන් විරාම නිරීක්ෂණ කමිටුව සහ එක්සත් ජාතීන්ගේ සංවිධානය ඇතුළු උතුරේ රාජකාරියේ යෙදී සිටි සහන සේවා ගණනාවක් විසින් තහවුරු කරන ලද පරිදි සෙන්චෝලේ අනාථ නිවාසය කිසිදු යුද පුහුණු ආයතනයක් නොවේ.

සටන් විරාම නිරීක්ෂණ කමිටු ප්‍රධානී උල්ෆ් හෙන්රික්සන් ප්‍රකාශ කර තිබුනේ බෝම්බ ප්‍රහාරයෙන් අනතුරුව එතැනට ගිය තම නිරීක්ෂකයන්ට දැක ඇති පරිදි ප්‍රහාරයට ලක්වී ඇති ස්ථානයේ කිසිදු හමුදා ස්ථාපනයක් හෝ ආයුධ තිබූ බවට සාක්ෂියක් නැති බවයි..

“මේ ප්‍රචණ්ඩත්වයේ ගොදුරු බවට පත්ව ඇත්තේ අහිංසක දරුවන් යැ,” යි එක්සත් ජාතීන්ගේ ළමා අරමුදලේ (UNICEF) විධායක අධ්‍යක්ෂිකා ඈන් මාග්‍රට් වෙනෙමන් කියා තිබුණි.

Facebook Comments

wedding people