හමුදා කඳවුරුවලට ඉඩම් අල්ලන්න ගොස් ආණ්ඩුව පසුබසී

උතුරේ හමුදා කදවුරු විශාල කර ගැනීම සදහා දෙමළ ජනයාට අයත් පෞද්ගලික ඉඩම් අක්කර සිය ගණනක් බලහත්කාරයෙන් අත්පත් කරගැනීමට සති තුනක කාලයක් තුළ ආණ්ඩුව දැරූ උත්සාහයන් දෙකක් පසු බැස්සවීමට උතුරේ ජනතාව සමත්ව තිබේ.

පේදුරුතුඩුව කට්කෝවලම් හමුදා කදවුර වෙනුවෙන් පුද්ගලික ඉඩම් මැනීමට අගෝස්තු 16 සඳුදා ගත් උත්සාහ ගත් මිනින්දෝරු නිලධාරීන් දේශපාලනඥයන් ප්‍රමුඛ ජනතා විරෝධතා හමුවේ පසු බැස ගොස් තිබෙන අතර මුලතිව් දිස්ත්‍රික්කයේ නාවික හමුදා කඳවුරක් සඳහා බලහත්කාරයෙන් අත්පත් කරගෙන තිබෙන ඉඩම් අක්කර සිය ගණනක අයිතිය නීත්‍යානුකූල කරගැනීමට ගන්නා ලද උත්සාහයක් ජනතාව විසින් පසුගිය ජුලි 29 දා වලක්වා තිබේ.

කට්කෝවලම් හමුදා කදවුර වෙනුවෙන් ප්‍රදේශවාසීන් තිදෙනකුට අයත් ඉඩම් අක්කර හතරක් මැන වෙන් කිරීම සදහා අගෝස්තු 16 සදුදා මිනින්දෝරු නිලධාරීන් පැමිණි අවස්ථාවේ ඉඩම් හිමිකරුවන් ඇතුළු දෙමළ දේශපාලනඥයන් අවධාරණය කර තිබුනේ හමුදා කඳවුරු වෙනුවෙන් ඉඩම් ලබා දීමට හෝ මැන වෙන් කිරීමට අවස්ථාව ලබා දිය නොහැකි බවයි.

විරෝධතා පැවැත්වීම වෙනුවට සාකච්ඡා මාර්ගයෙන් ප්‍රශ්නය විසදා ගැනීමට ඇති සුදානමද ඔවුන් එහිදී පළ කර තිබුනි.

එම ස්ථානයට පැමිණ සිටි නිල ඇදුමින් සැරසුන ප්‍රධාන පොලිස් පරීක්ෂකයෙක් විරෝධතාකරුවන්ගෙන් ඉල්ලා තිබුනේ සිය ඉඩම් මැනීමට විරුද්ධත්වය ප්‍රකාශ කරමින් අත්සන් කරන ලද ලිපියක් මිනින්දෝරු නිලධාරින්ට ලබා දුනහොත් එම නිලධාරියාට පිටව යා හැකි බවයි.

එම ලිපිය ලබා දීමෙන් පසු ඉඩම් මැනීමේ කටයුත්ත සිදු නොකර ස්ථානයෙන් පිටව යෑමට මිනින්දෝරු දෙපාර්තමේන්තුවේ නිලධාරීන් කටයුතු කර තිබුනි.

පළාත් බද වාර්තාකරුවන් පවසන්නේ ඉඩම් මැනීමට‌ පැමිණි මිනින්දෝරු නිලධාරීන් එම ස්ථානයෙන් පිටව යන තෙක් පැයකට ආසන්න කාලයක් උතුරේ දෙමළ ජනතා නියෝජිතයන් මාර්ගය මැද වාඩිලා විරෝධතා දැක්වු බවයි.

දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාසා ගජේන්ද්‍රන්, හිටපු මන්ත්‍රී එම්.කේ සිවාජිලිංගම්, නීතිඥ එස්. කානතීපන් ඇතුළු පිරිසක් විරෝධතාවය සදහා එක්ව තිබුනි.

ගෝඨාභය කඳවුර වෙනුවෙන් ඉඩම්

මුලතිව් දිස්ත්‍රික්කයේ නාවික හමුදා කඳවුරක් සඳහා බලහත්කාරයෙන් අත්පත් කරගෙන තිබෙන ඉඩම් අක්කර සිය ගණනක අයිතිය නීත්‍යානුකූල කරගැනීමට ගන්නා ලද උත්සාහය අකුලා ගැනීමට ද පසුගිය මස අවසානයේදී ආණ්ඩුවට සිදුවිය.

ව්ට්ටුවාකල්හි ගෝඨාභය කඳවුරට අයත් ඉඩම් මැන තහවුරු කරගැනීමට මිනුම් දෙපාර්තමේන්තු නිලධාරින් පැමිණිය ද ඉඩම් පැහැර ගන්නා ලද ජනතාව හා එක්වූ දෙමළ නායකයන් හා ප්‍රදේශයේ සෙසු දේශපාලන ක්‍රියාධරයන්ගේ එකතුවෙන් පැවති විරෝධතා හේතුවෙන් මුලතිව් දිසා පතිවරයා ඇතුළු ප්‍රදේශයේ රජයේ නිලධාරීන් ප්‍රකාශ කර තිබුනේ ඉඩම් හිමියන්ගෙන් හා ඔවුන්ගේ නියෝජිතයන් සමඟ සාකච්ජා කොට ඉදිරියේදී සුදුසු පියවරක් ගන්නා බවය.

29 බ්‍රහස්පතින්දා උදෑසන 8 සිට දහවල් 1 දක්වා මුලතිව් පරන්තන් මාර්ගය හරස් කරමින් ව්ට්ටුවාකල් ගෝඨාභය නාවික හමුදා කඳවුර ඉදිරිපිට වාඩිලා ගත් උද්ඝෝෂකයෝ දිසාපති වරයා ගේ පොරොන්දුවත් සමඟ විසිර ගිය බව ඊට එක්ව සිටි හිටපු පාර්ලිමේන්තු මන්ත්‍රී එම්. කේ සිවාජිලිංගම් මාධ්‍ය වෙත පවසා තිබුනි.

පළාත් බද වාර්තාකරුවන් පවසන්නේ කලින් දිනයේ සිටම ප්‍රදේශයේ හමුදා රැකවල් දැඩි කොට හමුදා සන්නද්ධ රථ ප්‍රදර්ශණය කරමින් මාර්ග බාධක යොදා ගනිමින් මාර්ග මුර සංචාර දැඩි කර තිබු බවය. නාවික හමුදාවට පොලිසියට අමතරව පොලිස් විශේෂ කාර්ය බලකාය ද කැඳවා තිබුණි.

උද්ඝෝෂණයට එක්වූ දෙමළ ජාතික ජනතා පෙරමුණේ (TNPF) නායක පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් අදාළ නිලධාරින් හමුවේ කියා සිටියේ ඉඩම් සමීක්ෂණ කටයුතු කරන්නේ මිනිස්සුන්ගෙන් ලබාගත් ඉඩම් නැවත ඔවුන් වෙත ලබා දීම සඳහා යැයි ලිඛිතව ලබා දෙන ලෙසය.

රජයේ මානක නිලධාරීන් පැමිණ සිටින්නේ මුල් පදිංචිකරුවන්ගේ ඉඩම් වෙන්කර දීම සඳහා යැයි ප්‍රකාශ කළ පොලිසිය විරෝධතාකරුවන්ගෙන් ඉල්ලා සිටියේ ඒ සඳහා ඉඩදී කඳවුරු ගේට්ටුව අසලින් ඉවත්වන ලෙසයි.

TNPF මන්ත්‍රී සෙල්වරාසා ගජේන්ද්‍රන් කියා සිටියේ නාවික හමුදාව වාඩිලාගත් භූමිය හැර ගිය පසු නියම අයිතිකරුවන්ට තමන්ගේ කැමැත්ත පරිදි මිනින්දෝරුවන් කැඳවා එම කටයුත්ත කරගත හැකි බවයි.

මුලතිව් දිසාපතිවරයා විසින් බ්‍රහස්පතින්දා කැඳවා තිබුනේ නාවික හමුදා කඳවුර අත්පත් කර ගත් ඉඩම් වලින් අක්කර 200 ක කොටසක හිමිකරුවන්ට පමණි. තම තමන්ගේ ඉඩම්වල සිමා මායිම් පෙන්වන ලෙස ඔවුන්ට දැනුම් දී තිබුණු බව පවසන හිටපු පාර්ලිමේන්තු මන්ත්‍රී කේ. සිවාජිලිංගම්, “මේ හදන්නේ ඉඩම් අයිතිකරුවන්ට වන්දියක් දීලා බලහත්කාරයෙන් ගත්තු ඉඩම් නීත්‍යානුකූල කරන්න’’ යැයි අවධාරණය කර තිබුනි.

ඉඩම් මැන නාවික හමුදාවට පැවරීම මිනුම් කටයුත්තේ අරමුණ බව ලිඛිතව සඳහන් කරමින් දිසාපතිවරයා විසින් කර ඇති කැඳවීම උපුටා දක්වමින් ප්‍රදේශවාසීන් විසින් පෙන්වා දීමෙන් අනතුරුව ආණ්ඩුවේ අරමුණ මුල් හිමිකරුවන්ට ඉඩම් ආපසු ලබා දීම බවට තර්ක කළ පොලිස් නිලධාරියා පසුබසින ආකාරයක් පළාත්බද මාධ්‍යවේදීන් විසින් පටිගත කර ඇති රූපරාමු වලින් දැකගත හැකිය.

හිටපු මන්ත්‍රී සිවාජිලිංගම් වැඩි දුරටත් පවසන්නේ වට්ටුවාකල් ගෝඨාභය නාවික කඳවුර ඉදි කිරීමට අති විශේෂ ගැසට් නිවේදනයක් මගින් ඉඩම් පවරා ගැනීමට එරෙහිව 2018 ෆෙබරවාරි 22 වැනිදා උද්ඝෝෂණය කළ උතුරු පළාත් සභාවේ මන්ත්‍රීවරයකුව සිටි තුරෙයිරාසා රවිහරන්, පීටර් ඉලන්චේලියන්, මුලතිව් ධිවර සංගමයේ සභාපති සහ තමන් අත් අඩංගුවට ගෙන නඩු පවරා ඉඩම් බලහත්කාරයෙන් අත්පත් කරගත් බවය.

ඊට අදාළ නඩු විභාගය ලබන ඔක්තෝම්බර් මස 12 වැනිදා මුලතිව් අධිකරණය මගින් කැඳවා තිබේ.

මුලින් අක්කර 617 ක් ගෝඨාභය නාවික හමුදා කඳවුර වෙත පවරා ගෙන තිබුන ද අද වන විට එම කඳවුර විසින් අත්පත් කරගෙන ඇති මුළු ඉඩම් ප්‍රමාණය අක්කර 670 යි රූඩ් 3 යි පර්චස් 10 ක් බව උතුරු පළාත් සභාවේ හිටපු මන්ත්‍රී තුරේරාසා රවිහරන් මාධ්‍ය වෙත ප්‍රකාශ කර තිබිණි.

“මුලතිව් දිස්ත්‍රික්කයේ මුළු භුමි ප්‍රමාණය අක්කර 627,917 ක්. යුද්ධයට කලින් අක්කර 21,017 ක ඉඩම් ප්‍රමාණයක් මුලතිව් ජනයා සතුව තිබුණා. දැන් ඒ ප්‍රමාණය අක්කර 16,025 ක් දක්වා අඩුවෙලා තියෙනවා. කැළෑ ප්‍රදේශ ලෙස වෙන්කරලා තියෙන අක්කර 420,300 ක් හැරුණම ඉතිරි සියල්ලම මේ වෙනකොට ආණ්ඩුව විසින් අත්පත් කරගත් ඉඩම්” යැයි පෙන්වා දෙන ඔහු පවසන්නේ රජයේ ආරක්ෂක හමුදාවලට අමතරව පුරාවිද්‍යා, වන ජීවී, වන සංරක්ෂණ දෙපාර්තමේන්තු හා මහවැලි අධිකාරිය ඇතුළු ආයතන රැසක් බලහත්කාරී ගැසට් නිවේදන මගින් ඉඩම් අත්පත් කරගැනීම් සිදුකරන බවය.