වයඹ පළාතේ නාත්තන්ඩිය හා අවට මුස්ලිම් ගම්මාන කිහිපයක් ඉලක්ක කර එල්ල කරන ලද මුස්ලිම් විරෝධි ප්‍රහාරය මෙහෙයවා ඇත්තේ ශ්‍රී ලංකා පොදුජන පෙරමුණෙහි බලය හිමි ප්‍රදේශ සභා දෙකක දේශපාලකයන් බව හෙළිව තිබේ.
වෙන්නප්පුව ප්‍රාදේශීය සභාවේ පොදුජන පෙරමුණේ ප්‍රධානියෙක් සහ නාත්තන්ඩිය ප්‍රාදේශීය සභාවේ පොදුජන පෙරමුණේ මන්ත්‍රීවරුන් සිරිසක් මෙම ප්‍රහාර මෙහෙයවන ආකාරය සී.සී.ටි.වී. දර්ශනවල සටහන් වී ඇතැයි දැනගන්නට ලැබී ඇති බව අනිද්දා පුවත්පත වාර්තා කර ඇත.
මුස්ලිම් විරෝධි ප්‍රහාරයට වෙන්නප්පුව ප්‍රදේශිය සභාවේ පොදුජන පෙරමුණේ ප්‍රධානියා යතුරු පැදි 100ක පමණ කණ්ඩායමක් සහභාගී කරවා ඇති බව ද පුවත්පත සඳහන් කරයි.
මෙම පිරිස නාත්තන්ඩිය නගරයේ මුස්ලිම් ව්‍යාපාරිකයන්ට හිමි වෙළඳ ආයතන වලට පහර දීමෙන් අනතුරුව තුම්මෝදර හා කොට්ටරාමුල්ල මුස්ලිම් ගම්මාන වලට ප්‍රහාර එල්ල කර ඇති බවට හඳුනාගෙන තිබේ.
නාත්නත්ඩියේ මුස්ලිම් විරෝධි ප්‍රහාරයට පොදුජන පෙරමුණ නියෝජනය කරන මන්ත්‍රීවරුන් දායක වී ඇති බවට පරීක්ෂණ භාර ඉහළ පොලිස් නිලධාරියෙකුද පැවසු බව අනිද්දා පුවත්පත වාර්තා කර ඇත.
ප්‍රහාර සම්බන්ධයෙන් මේ වන විට පිරිසක් අත්අඩංගුවට ගෙන රක්ෂිත බන්ධනාගාර ගත කර ඇති අතර ආරක්ෂිත කැමරා පරික්ෂාකර අනෙක් පිරිස් අත්අඩංගුවට ගැනීමට බලාපොරොත්තු වන බවද එම නිලධාරියා ප්‍රකාශ කර තිබේ.
Facebook Comments
