කොරෝනා ව්‍යාප්තිය හේතු කර ගනිමින් දින නියමයක් නැතිව කල් දැමු පාර්ලිමේන්තු මැතිවරණයට දින නියම කරන්නැයි බල කරමින් අගමැතිවරයා නිවේදනයක් ප්‍රසිද්ධියට පත් කර තිබේ.
පාර්ලිමේන්තු මැතිවරණ පනතට අනුව ජනාධිපතිවරයා නියම කළ දිනයට පාර්ලිමේන්තු මැතිවරණය පැවැත්වීමට නොහැකි නම්, ඒ සඳහා වෙනත් දිනයක් නියම කිරීමට මැතිවරණ කොමිසම බැඳී සිටීන බව පවසන අගමැති මහින්ද රාජපක්ෂ දිනයක් නියම නොකොට පාර්ලිමේන්තු මැතිවරණය කල් දැමීමට මැතිවරණ කොමිසමට බලයක් නැති බවයි සිය නිවේදනයේ සඳහන් කර ඇත්තේ.
“පසුගිය මාර්තු දෙවැනිදා ජනාධිපතිවරයා පාර්ලිමේන්තුව විසුරුවා හරිමින් මැතිවරණය පවත්වන දිනය අප්‍රේල් 25 හැටියටත්, අලුත් පාර්ලිමේන්තුව මුල් වරට හමු වෙන දිනය මැයි 14 වැනිදා හැටියටත් නියම කළේය. ඊට දින දහයකට පසු පළමු කොරෝනා රෝගියා සොයා ගත් අවස්ථාවේදී මැතිවරණය පවත්වන දිනය කල් දැමීමට ජනාධිපතිවරයාට බලය නොතිබුණි. 1981 අංක 1 දරණ පාර්ලිමේන්තු මැතිවරණ පනතේ 24(3) වගන්තියට අනුව ජනාධිපතිවරයා නියම කළ දිනයට පාර්ලිමේන්තු මැතිවරණය පැවැත්වීමට නොහැකි නම්, ඒ සඳහා වෙනත් දිනයක් නියම කිරීමට මැතිවරණ කොමිසම බැඳී සිටී. දිනයක් නියම නොකොට පාර්ලිමේන්තු මැතිවරණය කල් දැමීමට මැතිවරණ කොමිසමට බලයක් නැත.”
සති ගණනක් හෝ මාස ගණනක් ඉදිරියට අනාගතයේ විය හැකි හෝ නොහැකි දේවල් පිළිබඳව ඇතිකරගන්නා උපකල්පන මත අනිවාර්යෙන්ම පිළිපැදිය යුතු නීතිමය ප්‍රතිපාදන නොසළකා හැරිය නොහැකි බව මෙන්ම මැතිවරණ කොමිසම මුලින්ම කළ යුත්තේ ඔවුන් වෙත පැවරී ඇති කාර්ය භාරය නීතියට අනුකූළව ඉටුකර සාකච්ඡා කළ යුතු කරුණක් ඇත්නම් ඉන් පසු ඊට යොමු වීම බවයි අගමැතිවරයා පෙන්වා දෙන්නේ.
පාර්ලිමේන්තුවේ බහුතරයක් නොමැති වීම හේතුවෙන් පහුගිය ආණ්ඩුවේ බෙහෙත් හා පොහොර සැපයීමට නොහැකි වු බවට කම්පා වන මහින්ද රාජපක්ෂ අගමැතිවරයා කොරෝනා වසංගතය පැමිනෙණ විට අස්වැසිල්ල වුයේ ජනාධිපතිවරයා සතුව මුදල් බලතල සතුවීම නිසා බවද පවසා තිබේ.
කොරෝනා වෛරසය නිසා අනාරක්ෂිත වී ඇති ලෝකය තුළ ශ්‍රී ලංකාව වඩා සුරක්ෂිත වී ඇති බව පවසන අගමැතිවරයා එම තත්ත්වය පත්වුයේ විනාශ කරන ලද ආර්ථිකයකුත්, පුළුවන් හැම අවස්ථාවකදීම ආණ්ඩුවේ කකුලෙන් අදින, රටට ආදරයක් නැති අවස්ථාවාදී විපක්ෂය තිබියදී බවයි පවසන්නේ.
නිරෝධායනයට යෑම ප්‍රතික්ෂේප කළ අය දිරි ගැන්වීම තුළින් විපක්ෂනායකවරයා මුල් අවස්ථාවේ සිටම කොරෝනා වෛරස් මර්ධන ව්‍යාපෘතිය කඩාකප්පල් කිරීමට උත්සාහ දැරු බවට චෝදනා කරන අගමැතිවරයා ඉන්පසු, පාර්ලිමේන්තුව විසුරුවා හැර තිබෙන අවස්ථාවක රජයේ මුදල් වැය කිරීමට ජනාධිපතිවරයාට බලය නැතැයි පවසමින් සෞඛ්‍ය සේවය ඇතුළු සියලු රජයේ සේවාවන් කඩාකප්පල් කිරීමට උත්සාහ කළ බවද සඳහන් කර ඇත.
හිටපු ජනපති මෛත්‍රීපාල සිරිසේන ව්‍යවස්ථා කුමන්ත්‍රණයක් දියත් කරමින් මහින්ද රාජපක්ෂ අගමැති ධුරයට පත් කරන ලද අවස්ථාවේ කැඳවු මහ මැතිවරණය ශ්‍රේෂ්ඨාධිකරණය විසින් නැවතු අවස්ථාව සිහිපත් කර දෙන අගමැතිවරයා මෙය එහි දිගුවක් බවයි පවසන්නේ.
“ශ්‍රේෂ්ඨාධිකරණයට පෙත්සමක් ඉදිරිපත් කොට ප්‍රකාශයට පත් කර තිබුණු පාර්ලිමේන්තු මැතිවරණයක් අවලංගු කර ගත් දේශපාලන පක්ෂ සිටින ලෝකේ එකම ප්‍රජාතන්ත්‍රවාදී රට වෙන්නෙත් ශ්‍රී ලංකාවය. වත්මන් පාර්ලිමේන්තු මැතිවරණය කල් දමා ගැනීමට මේ ගෙනියන උත්සාහය ඒ අපකීර්තිමත් යටගියාවේම දිගුවකි.”
කෙසේ වෙතත් මැතිවරණය පවත්වන්නේ නම් ඒ සඳහා සෞඛ්‍ය අංශ යොදා ගත යුතු ආකාරය හෝ මැතිවරණ රාජකාරි වල නිරත වන පුද්ගලයන්ගේ ආරක්ෂාව තහවුරු කිරීම සම්බන්ධව කිසිවක් අගමැති මහින්ද රාජපක්ෂ සිය නිවේදනයේ සඳහන් කර නැත.
Facebook Comments
