මුස්ලිම් දේවස්ථානවලට සහ මුස්ලිම් ප්‍රජාව සතු ව්‍යාපාරික ස්ථාන වලට මෑතකදී එල්ල වු ප්‍රහාර සම්බන්ධයෙන් වගකිවයුතු අපරාධකරුවන් වහාම නීතිය හමුවට පමුනුවන ලෙස ජාත්‍යන්තර සංවිධාන, තානපතිවරුන් සහ මහකොමසාරිස්වරුන් ආණ්ඩුවට බල කර තිබියදී වත්මන් රජය යටතේ මුස්ලිම් ජනතාවට අගතියක් සිදු නොවන බව සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න පවසා සිටි.
“පසුගිය කාලයේ දී මුස්ලිම් ජනතාව විරසකයට පත් වුණා. තමන් අදහන ආගමට ගරුත්වයක් ලබාදෙනවා මෙන් අනෙක් ආගම්වලට ද ගරු කළ යුතුයි. මුස්ලිම් ජනතාවට ප්‍රශ්න තිබෙන්න පුළුවන්. මුස්ලිම් ජනතාව වෙනුවෙන් පෙනී සිට මම ඊට වඩා ප්‍රශ්නවලට මුහුණ දුන්නා.” යැයි අමාත්‍යවරයා කියා සිටියේ කොහිලවත්ත අල් ඉබ්‍රායිම් ජුම්මා මුස්ලිම් දේවස්ථානයේ ඉෆ්තාර් උත්සවයට එක් වෙමිනි.
බේරුවල ප්‍රදේශයේ තමන් විසින් ගොඩනඟන ලද ජාතීන් අතර සමගිය “කාලකණ්නි පිරිසක්” විනාශ කල බවට චෝදනා කරන ඇමතිවරයා විනාශ වු ගොඩනැගිලි හදා දුන්නත්, හිත හදා දෙන්න බැරිවු බවයි අවධාරණය කරන්නේ.
වත්මන් රජය යටතේ මුස්ලිම් ජනතාවට එරෙහිව කවුරු ක්‍රියා කළත් එම අභියෝගවලට මුහුණ දී මුස්ලිම් ජනතාව ආරක්ෂා කරන බවට පොරොන්දු ඇමතිවරයා එම ජනතාවට එරෙහිව ක්‍රියා කළ පුද්ගලයින්ට දඬුවම් ලබාදෙන බව සහ එවැනි සිදුවීම් ඉදිරියේ දී ඇති වීමට ඉඩ නොදෙන බවද පැවසුහ.
මේ අතර 18 ඉරිදා රජයේ ප්‍රවෘත්ති දෙපාර්තමේන්තුවේ පැවැති විශේෂ මාධ්‍ය හමුවකට එක්වෙමින් පොලිස් මාධ්‍ය ප්‍රකාශක, නියෝජ්‍ය පොලිස්පති ප්‍රියන්ත ජයකොඩි කියා සිටියේ පසුගිය මැයි මාසයේ සිදුවු මුස්ලිම් විරෝධි ප්‍රහාර සම්බන්ධයෙන් සැකකරුවන් 14 දෙනෙකු අතුඅඩංගුවට ගෙන ඇති අතර එම සිදුවීම් විශ්ලේෂණය කිරීමේදී පැහැදිලි වන්නේ මෙම සිදුවීම් පසුපස බොදුබල සේනා සංවිධානයේ ක්‍රියාකරී සාමාජිකයන් සිටින බවටයි.
Facebook Comments
