පාසල් ළමුන්ට කොවිඩ් එන්නත ලැබෙන ලකුණු

වයස අවුරුදු 12 – 18ත් අතර පාසල් දරුවන්ට ද කොවිඩ් මර්දන එන්නත ලබාදීම කෙරෙහි අවධානය යොමුව ඇති බව කොවිඩ් එන්නත ප්‍රසම්පාදනය සඳහා වන ජනාධිපති කාර්ය සාධක බලකායේ ප්‍රධානී පවසයි.

ඒ අනුව ෆයිසර් එන්නත හෝ මොඩර්නා එන්නත පිළිබඳ වැඩි අවධානයක් යොමු කර ඇති බවයි ජනාධිපති උපදේශක ලලිත් වීරතුංග සඳහන් කරන්නේ.

ජනාධිපති මාධ්‍ය කේන්ද්‍රය විවෘත කිරීමට එක්වෙමින් අද 29 කොවිඩ් මර්දන එන්නත්කරණ වැඩසටහනේ ප්‍රගතිය පිළිබඳ අදහස් දක්වමින් ඔහු මේ බව ප්‍රකාශ කළේය.

රජයේ පළමු ඉලක්කය වන්නේ මිලියන 11.5ක පිරිසකට එන්නත ලබා දීම වන බව සඳහන් කර ඇති හෙතෙම දෙවැනි ඉලක්කය වන්නේ වයස අවුරුදු 12 – 30ත් අතර පිරිසට එන්නත්කරණය සිදුකිරීම බව ද පවසා ඇත.

ඒ අනුව පළමුවෙන් වයස අවුරුදු 12 – 18 ත් අතර පාසල් සිසුන්ට ප්‍රමුඛත්වය ලබා දෙන බව පවසන ජනාධිපති කාර්ය සාධක බලකායේ ප්‍රධානී ජනාධිපති උපදේශක ලලිත් වීරතුංග සැප්තැම්බර් 15 වන දින වන විට වයස අවුරුදු 30ට වැඩි සියලු දෙනාට එන්නත්කරණය සිදුකර අවසන් කරන බව ද අවධාරණය කර ඇත.

එසේම වයස අවුරුදු 18-30 අතර පිරිසට එන්නත්කරණයට අවශ්‍ය සියලු සැලසුම් සකස් කර ඇති අතර, ලෝක සෞඛ්‍ය සංවිධානයේ නිර්දේශ ලැබූ වහාම එය ක්‍රියාත්මක කරන බව ද ඔහු පැවසීය.

නවතම වාර්තාවකට අනුව එන්නත් බෙදීයාමේ දී 90% කට වැඩි ප්‍රමාණයක් ලෝකයේ ධනවත් රටවල් විසින් ලබාගෙන ඇති බවත්, දියුණුවන සෙසු රටවල් අතර 5% කට අඩු ප්‍රමාණයක් බෙදී ගොස් ඇති අතර ශ්‍රී ලංකාව ලබා ඇති ප්‍රගතිය විශාල ජයග්‍රහණයක් බවයි ජනාධිපති කාර්ය සාධක බලකායේ ප්‍රධානියා පෙන්වා දෙන්නේ.

වර්තමානයේ එන්නත්කරණය අතින් ලෝකයේ පළමු ස්ථානයට පත්වීමට ශ්‍රී ලංකාව සමත් වූ බව ද ඔහු තව දුරටත් ප්‍රකාශ කර ඇත.