අයි.සී.සී. ටෙස්ට් නවතම ශ්‍රේණිගත කිරීම්වලට අනුව ශ්‍රී ලංකා කණ්ඩායමේ පිතිකරුවන් කිහිපදෙනෙකු ඉදිරියට පැමිණ තිබේ.
කුසල් මෙන්ඩිස්, දිමුත් කරුණාරත්න සහ නිරෝෂන් දික්වැල්ල යන ක්‍රීඩකයින් ඉන්දීය කණ්ඩායම සමඟ පැවති පළමු හා දෙවන ටෙස්ට් තරගවලදී දැක්වූ දක්ෂතා හේතුවෙන් මෙලෙස ශ්‍රේණිගත කිරීම් හි ඉදිරියට පැමිණ ඇත.
කුසල් මෙන්ඩිස් ටෙස්ට් පිතිකරුවන් ශ්‍රේණිගත කිරීම්හි 29 වන ස්ථානයේ සිට 19 වන ස්ථානය දක්වාත්, දිමුත් කරුණාරත්න 37 වන ස්ථානයේ සිට 24 වන ස්ථානය දක්වාත් නිරෝෂන් දික්වැල්ල 89 වන ස්ථානයේ සිට 68 වන ස්ථානය දක්වාත් ඉදිරියට පැමිණ තිබේ.
නවතම ටෙස්ට් ශ්‍රේණිගත කිරීම්වලට අනුව තුන්ඉරියව් ක්‍රීඩකයින් අතර පෙරමුණ ගැනීමට සමත්ව ඇත්තේ ඉන්දීය ක්‍රීඩක රවින්ද්‍ර ජඩේජායි වන අතර ඔහු පන්දු යවන්නන් ශ්‍රේණිගත කිරීම්හි ද තවදුරටත් පෙරමුණේ පසුවෙයි.
කෙසේ වෙතත් ටෙස්ට් පන්දු යවන්නන් අතර තෙවන ස්ථානයේ පසුවූ රංගන හේරත් පස්වන ස්ථානය දක්වා පහත බැස තිබේ.
මේ අතර නිමාවූ දකුණු අප්‍රිකාව සමග පැවති ටෙස්ට් තරගය ජයගැනීමත් සමග ටෙස්ට් කණ්ඩායම් ශ්‍රේණිගත කිරීම්හි තෙවන ස්ථානයට පැමිණීමට එංගලන්ත කණ්ඩායම සමත්ව ඇත්තේ ඔස්ට්‍රේලියානු කණ්ඩායම සිව්වන ස්ථානයට පත්කරමිනි.
කෙසේ වෙතත් දකුණු අප්‍රිකානු කණ්ඩායම තවදුරටත් ශ්‍රේණිගත කිරීම්හි දෙවන ස්ථානයේ පසුවෙයි.
Facebook Comments
