ජනපති මෛත්‍රීපාල සිරිසේනගේ නායකත්වය යටතේ ශ්‍රී ලංකාවේ ප‍්‍රජාතන්ත‍්‍රවාදී ව්‍යුහය ශක්තිමත් වී ඇතිවා මෙන්ම වාර්ගික හා ආගමික සහජීවනය පිළිබඳ ආදර්ශමත් දේශයක් බවට පත්ව ඇති බව තුර්කි ජනරජයේ හිටපු අගමැති මහාචාර්ය අහමට් ඩවුටොග්ලු පවසයි.
දිවයිනට පැමිණ සිටින තුර්කි හිටපු අග‍්‍රාමාත්‍යවරයා 09 බදාද ජනාධිපති කාර්යාලයේදී ජනාධිපති මෛත්‍රීපාල සිරිසේන හමු වූ අවස්ථාවේදී මේ බව ප‍්‍රකාශ කළ බව ජනාධිපති මාධ්‍ය අංශ කියා සිටී.
ත‍්‍රස්තවාදය මෙන්ම වාර්ගික හා ආගමික අසහනය පිරි ලෝකයේ සංහිඳියාව පිළිබඳව වැදගත් නූතන ආදර්ශයක් ලබාදී ඇති රටක් ලෙස තමා ශ්‍රී ලංකාව දකින බව මෙහිදී පවසා ඇති හිටපු තුර්කි අග‍්‍රාමාත්‍යවරයා ආගමික සංහිඳියාවේ තෝතැන්නක් ලෙස අද ලංකාව හඳුන්වාදිය හැකි බව ද සඳහන් කර ඇත.
මහනුවර ඓතිහාසික ශ්‍රී දළදා පෙරහැර නැරඹූ බව මෙන්ම පිටකොටුවේදී හින්දු බැතිමතුන් විසින් පවත්වනු ලැබූ වර්ණවත් වේල් පෙරහැරක් ද දැක බලා ගත් බවත් පැවසූ තුර්කි හිටපු අගමැතිවරයා මෙම ආගමික සංහිඳියාව පිළිබඳ තමා දැඩි සතුටට පත්වන බව ද කියා සිටියේය.
සාර්ථක විදේශ පිළිවෙත
එමෙන්ම ශ්‍රී ලංකාවේ නූතන සාර්ථක විදේශ පිළිවෙත ද හිටපු තුර්කි අගමැතිවරයාගේ ඇගයීමට ලක්ව තිබේ.
තුර්කි රජය ජාත්‍යන්තර තලයේදී ශ්‍රී ලංකාවට ලබාදෙන සහය පිළිබඳ මෙහිදී සිය ස්තූතිය පිරිනැමූ ජනපති මෛත්‍රීපාල සිරිසේන දෙරට අතර සහයෝගීතාවය ආයෝජන, වෙළෙඳ, කෘෂිකර්ම සහ සංචාරක, ගුවන්සේවා යන ක්ෂේත‍්‍රවලින් තවදුරටත් ශක්තිමත් කර ගැනීම ශ්‍රී ලංකාවේ අරමුණ බව පවසා ඇත.
ආසියාව හා යුරෝපය අතර කේන්ද්‍රය වන තුර්කිය නාවුක කේන්ද්‍රයක් බවට පත්වීමට අමතරව දැන් ගුවන් ප‍්‍රවාහන කේන්ද්‍රයක් බවට ද පත්ව ඇති බව පැවසු හිටපු තුර්කි අග‍්‍රාමාත්‍යවරයා භූගෝලීය වශයෙන් ජාත්‍යන්තර නාවුක මාර්ගයට සමිපව පිහිටි ශ්‍රීලංකාවට නාවුක කේන්ද්‍රයක් බවට පත්වීමටත්, කලාපය තුළ ගුවන් ප‍්‍රවාහන කේන්ද්‍රයක් බවට පත්වීමටත් පහසුවනු ඇතැයි ද සඳහන් කළේය.
Facebook Comments
