සිරභාරයේ දී මරුමුවට පත් උතුරේ දෙමළ තරුණයකුගේ අවසන් කටයුතු සඳහා රැස්වූ ඥාතීන් ඇතුළු ප්‍රදේශවාසී ජනයා, එම තරුණයාට කුරිරු ලෙස වදහිංසා පැමිණවූ බවට විශ්වාස කෙරෙන වඩුක්කොඩෙයි පොලිසියේ නිලධාරීන්ට එරෙහිව වහාම පියවර ගන්නා ලෙස බලකරමින් විරෝධතා දියත් කර තිබේ.
වඩුක්කොඩෙයි, සිත්තංකේනි ලිපිනයේ පදිංචිකරුවෙකු වු විසි හය හැවිරිදි නාගරාසා ඇලෙක්ස්ගේ නිසල සිරුර නොවැම්බර් 21 වැනිදා අවසන් කටයුතු වෙනුවෙන් ඉලවාලෙයි වෙල්ලාවෙලි සුසන භුමියේ කරා රැගෙන යන අවස්ථාවේ විරෝධතාවයට එක්වු ප්‍රදේශවාසීන් ඉල්ලා සිටියේ සිය සමිපතමයා වෙනුවෙන් යුක්තිය ඉටු කරන ලෙසයි.
ඉංශ්‍රිසි සහ දෙමළ භාෂාවලින් ලියු සටන් පුවරු වලට අමතරව “වට්ටුක්කෝට්ටෙයි පොලීසියේ අරාජිකත්වය හෙළිවේ, ඇලෙක්ස්ට යුක්තිය අවශ්‍යයි“ යනුවෙන් සිංහල බසින් ලියු සටන් පුවරුද ඔවුන් අත පැවැති ආකාරය දැක ගත හැකිය.
මහේස්ත්‍රාත් ඒ.ඒ ආනන්දරාජා යටතේ අධිකරණ වෛද්‍ය නිලධාරි විසින් පවත්වන ලද මරණ පරීක්ෂණ වාර්තාවේ දැක්වෙන්නේ අත් අඩංගුවේ සිටි නාගරාසා ඇලෙක්ස් නැමැති විසි හය හැවිරිදි තරුණයා නොවැම්බර් 19 වැනි ඉරිදා යාපනය ශික්ෂණ රෝහලට ගෙන එන විටත් මරණයට පත්ව සිටි බවයි.
මරණයට පත්වූ තරුණයාගේ පිට කොන්දේ, අත් සහ කකුල්වල තුවාල ගණනාවක් තිබු බව වෝහාරික විශේෂඥ රුද්‍රපසුපති මයෝරදන් නොවැම්බර් 20 වැනිදා නිකුත් කරන ලද මරණ පරීක්ෂණ වාර්තාවේ සදහන්ය.
පළාත් බද වාර්තාකරුවන්ට අනුව වඩුක්කොඩෙයි, සිත්තංකේනි ලිපිනයේ පදිංචි නාගරාසා ඇලෙක්ස් සොරකම් චෝදනාවක් සම්බන්ධයෙන් වඩුක්කෝට්ටේ පොලීසිය විසින් අත්අඩංගුවට ගෙන ඇත්තේ නොවැම්බර් 08 වැනි දිනයි.
පරීක්ෂණයක් සදහා බව පවසමින් සිය පුතු පොලීසිය විසින් අත්අඩංගුවට ගත් බවට නොවැම්බර් 10 වැනිදා ශ්‍රී ලංකා මානව හිමිකම් කොමිෂන් සභාවේ යාපනය කාර්යාලයට නාගරාසා ඇලෙක්ස්ගේ මව පැමිණිලි කිරීමෙන් පසුව නාගරාසා ඇලෙක්ස් අධිකරණයට ඉදිරිපත් කිරීමට පොලීසිය කටයුතු කර තිබේ. පළාත් බද වාර්තාකරුවන් පවසන්නේ නාගරාසා ඇලෙක්ස් බන්ධනාගාරගත කිරීමට අධිකරණය එහිදී නියෝග කළ බවයි.
නාගරාසා ඇලෙක්ස් යාපනය බන්ධනාගාරයේ, බන්ධනාගාරගත කිරීමට නියෝග කිරීමෙන් පසුව අයහපත් සෞඛ්‍ය තත්වය හේතුවෙන් මීට දින කිහිපයකට පෙරදීද යාපනය ශික්ෂණ රෝහලට ඇතුලත් කළ බවයි පළාත් බද වාර්තාකරුවන් වැඩි දුරටත් පවසන්නේ. එම අවස්ථාවේ ඔහු බැලීමට රෝහලට පැමිණි පවුලේ ඥාතියකුට නාගරාසා ඇලෙක්ස් තමන් පොලීසිය තුලදී වධ බන්ධනයට මුහුණ දුන් ආකාරය පිළිබඳව කර ඇති විස්තරය එම ඥාතියා විසින් සිය ජංගම දුරකතනයෙන් විඩියෝ ගත කර ඇත.
“පොලිසිය සැක කේස් එකකට අරන් ගිහින් ගැහුවා. හොරකම් සිදු වෙලා කියලා ගැහුවා. පිටි පස්සේ ගැට ගහලා මූණ රෙදි කෑල්ලකින් වහලා වතුර වක්කර, වක්කර ගැහුවා. පොඩ්ඩයි කන්න දුන්නේ. එක ලණුවකින් ගැට ගහලා ගැහුවා. අහ, අහ ගැහුවා. මම නෑ කිව්වා. බෑගයකට පෙට්‍රල් තවරලා දාලා ගැහුවා. මට සිහිනැති උනා.“ යැයි නාගරාජා ඇලෙක්ස් පවසන ආකාරය විඩියෝ ගතව තිබේ.
තරුණයාගේ මරණය සම්බන්ධයෙන් නිවේදනයක් නිකුත් කරමින් දෙමළ ජාතික සංධානයේ හිටපු පාර්ලිමේන්තු මන්ත්‍රී ඊ සරවනභවන් සදහන් කර ඇත්තේ නාගරාසා ඇලෙක්ස් පොලිස් අත්අඩංගුවේදී වධ හිංසාවට ලක්වු බවට සැකයක් නොමැති බවයි.
“මෙම සිද්ධියේදී ඔහු මිය යාමට පෙර ලබාදුන් ප්‍රකාශය, ඥාතීන්ගේ ප්‍රකාශ, ඇතුළු සියළු ප්‍රකාශවලින් පැහැදිලි වෙන්නේ ඔහු පොලිස් අත්අඩංගුවේ දී වධහිංසාවට ලක් වූ බවට සැකයක් නැති බවයි .“
මේ සම්බන්ධයෙන් වඩුක්කොඩෙයි පොලිසියේ සේවයේ නියුතු නිලධාරීන් හතර දෙනකු හඳුනාගෙන ඇති බව යාපනයේ මාධ්‍යවේදීන් සමග පැවසු යාපනය දිස්ත්‍රික් නියෝජ්‍ය පොලිස්පති මංජුල සෙනරත් තව දුරටත් සදහන් කර ඇත්තේ ඒ අනුව ඔවුන් සිව්දෙනාම මේ වන විට දිස්ත්‍රික් අපරාධ නිවාරණ පොලිස් ඒකකය යටතේ සිටින බවයි.
යාපනය හිටපු නගරාධිපති විශ්වලිංගම් මනිවන්නන් ද නිවේදනයක් නිකුත් කරමින් අවධාරණය කරන්නේ පොලිස් ස්ථානාධිපතිවරයා ඇතුළු පොලිස් නිලධාරීන් වහාම අත්අඩංගුවට ගෙන අධිකරණයට ඉදිරිපත් කළ යුතු බවයි.
“මියගිය තරුණයාගේ මරණාසන්න පාපොච්චාරණයෙන් වධහිංසාව හෙළිදරව් වන අතර මේ පොලිස් නිලධාරීන් ස්ථාන මාරු කිරීම කරලා විමර්ශන කණ්ඩායමක් පත් කර තිබීම ඇස් බැන්දුමකි. අදාළ පොලිස් ස්ථානය භාර නිලධාරියා ඇතුළු පොලිස් නිලධාරීන් වහාම අත්අඩංගුවට ගෙන අධිකරණයට ඉදිරිපත් කළ යුතුයි.“
Facebook Comments
