පාස්කු ඉරිදා ප්‍රහාරකයන් බවට සැක කෙරන පිරිස් අතර හා ශ්‍රී ලංකා රජයේ ආරක්ෂක අංශ අතර නැගෙනහිර දී සන්නද්ධ ගැටුම් ආරම්භ වී ඇති බවට රජය විසින් නිවේදනය කර පැය කහිපයකට පසුව ඉදිරි ජනපතිවරණයට තරග වදින බව හිටපු ආරක්ෂක ලේකම්වරයා ප්‍රකාශයට පත් කර තිබේ.
ඉස්ලාමීය අන්තවාදයට එරෙහිවත් බුද්ධි අංශ නැවත ගොඩනැංවීම වෙනුවෙන් සහ පුරවැසියන්ගේ ආරක්ෂාව වෙනුවෙන් තමන් ජනාධිපතිවරණයට ඉදිරිපත් වන බවට ඇමරිකාවේ ද්විත්ව පුරුවැසි භාවය ද හිමි ගෝඨාභය රාජපක්ෂ රොයිටර් පුවත් සේවයට ප්‍රකාශ කර ඇත.
සිය පියා නමින් කටුගෙයක් ඉදිකිරීමේදී රුපියල් තිස්තුන් කෝටියකට අධික රජයේ මුදලක් වංචා කළ බවට නැගෙන චෝදනාවක් විභාග කරන ත්‍රිපුද්ගල විශේෂ මහාධිකරණය හිටපු ආරක්ෂක ලේකම්වරයාට චෝදනා ගොණු කර ඇති අතර ලසන්ත වික්‍රමතුංග ඝාතනයට හා කැනඩාවාසි දෙමළ පුරවැසියෙකුට වධ හිංසා පැමිණිවීමට එරෙහිව සිවිල් නඩු දෙකක් පසුගියදා ඇමරිකාවේදී ගොණු කරන ලදී.
තමන්ගේ ඇමරිකානු පුරුවැසි භාවය ඉවත් කර ගැනීමට අදාළ කටයුතු ද මේ වන විට ආරම්භ කර ඇති බව ද ගෝඨභය රාජපක්ෂ රොයිටර් පුවත් සේවයට පවසා ඇත.
රාජපක්ෂ පුවුලේ ප්‍රධානියා වන හිටපු ජනපති පාර්ලිමේන්තු මන්ත්‍රී මහින්ද රාජපක්ෂ ඉදිරි ජනපතිවරණයට ගෝඨාභය රාජපක්ෂ ඉදිරිපත් කරන බවට මේතාක් නිල වශයෙන් ප්‍රකාශ කර නැත.
Facebook Comments
