විදේශයක ත්‍රස්ත සංවිධානයකට සම්බන්ධ පුද්ගලයන් මෙරට දී අත්අඩංගුවට ගැනීමට නීති නොමැති බවට අගමැතිවරයා කරන ලද ප්‍රකාශය “මුසාවක්” බව ත්‍රස්ත මර්දන නීති පිළිබඳව විශාරදයකු පෙන්වා දෙයි.
විදෙස් ත්‍රස්ත සංවිධානයක් සමඟ එක්වූ තැනැත්තන් අත්අඩංගුවට ගැනීම සදහා ප්‍රමාණවත් නීති ශ්‍රී ලංකාවේ නොතිබීම නිසා පාස්කු ඉරිදා ප්‍රහාරයට සම්බන්ධ වු පිරිස් කල් තියා අත්අඩංගුවට ගැනීමට නොහැකි වු බව අගමැති රනිල් වික්‍රමසිංහ බ්‍රිතාන්‍යයේ ස්කයි පුවත් සේවයට ප්‍රකාශ කර තිබුණි.
හදිසි නීතිය නොමැති අවස්ථාවක වුවද ත්‍රස්ත මර්දන නිති යටතේ ත්‍රස්ත ක්‍රියා වලට සැක පිරිස් අත්අඩංගුවට ගැනිමේ හැකියාව වත්මන් ආණ්ඩුවට පවතින බවයි කොළඹ නීති පිඨයේ ජ්‍යෙෂ්ඨ කථිකාචාර්ය ආචාර්ය විසාකේස චන්ද්‍රසේකරම් සිලෝන් නිව්ස් හා කියා සිටියේ.
“ලංකාවේ 1978ත්‍රස්තවාදය වැළැක්වීමේ පනත මඟින් ත්‍රස්ත ක්‍රියා වැළැක්වීමට රජයේ දෑත් සීමාන්තික ලෙස ශක්තිමත් කොට තිබෙනෙවා. රජයට හා ජනතාවට එරෙහි ඕනැම හිංසනයක්, අලාභයක්, හානියක් වරදක් ලෙස සැළකිය හැකි ඉතා පුළුල් වැරදි ලයිස්තුවක් පනතේ 9 වන වගන්තියේ තිබෙනවා. ඒ වගේම එම වරද කිරීමට සුදානම් වීමම පමණක් නොවේ වරද පිළිබඳව තොරතුරු දැනගෙන සිටීම සහ එවැනි වරදක් පිළිබද හුදු සැකයක් තිබීම පවා ප්‍රමාණවත් යමෙක් අත්අඩංගුවට ගන්න.”
“රාජ්‍ය ආරක්ෂක අමාත්‍යවරයාට හෝ ඔහුගේ බලයලත් නියෝජිතයන්ට පුලුවන් එවැනි සැකකරුවන් මාස 3 ක රැඳවුම් නියෝග යටතේ සිරගත කරන්න. එම රැඳවුම් නියෝග අවුරුදු ගනන් නැවත නැවත අලුත් කිරීමේ බලයත් රජයට තියෙනවා. එහෙම නැති නම් යුද්ධ කාලයේ දෙමල මිනිසුන්ග ගැහැනුන් අවුරුදු 7-8 තරම් කල් නඩු නැතිව රඳවා තැබුවේ කොහොමද? 89 භීෂණ සමයේ ජවිපෙ සමාජිකයන් අවුරුදු ගනන් සිරගත කළේ කොහොමද?” යනුවෙන් ආචාර්යවරයා ප්‍රශ්න කර සිටී.
ශ්‍රී ලංකාවේ පවතින දණ්ඩ නීති සංග්‍රහය යටතේ පවා එවැනි පුද්ගලයන් අත්අඩංගුවට ගැනීමට හැකියාවක් ඇති බව ද ආචාර්ය විසාකේස චන්ද්‍රසේකරම් පෙන්වා දුන්නේය.
“දණ්ඩ නීති සංග්‍රයේ 2 වන වගන්තිය ලංකාවේ වරදක් හැටියට සළකන වරදක් විදේශයක සිදුකිරීම ලංකාවේ කරන ලද වරදක් හැටියට සළකන්න සීමිත අවස්ථා වලදී ඉඩ ලබාදෙනවා. එම නීතියේම 138 වගන්තිය නීති විරෝධී පුහුණුවක් ලැබීම වරදක් හැටියට දක්වනවා.මගේ මතය නම්හදිසි නීති රෙගුලාසි හෝ ත්‍රස්තවාදය වැළැක්වීමේ පනතේ ප්‍රතිපාදන නොමැතිව පවා මෙසේ විදේශ වල පුහුණුවලත් පුද්ගලයින් අත්අඩංගුවට ගත හැකියි,” යනුවෙන් කොළඹ නීති පිඨයේ ජ්‍යෙෂ්ඨ කථිකාචාර්යවරයා සිලෝන් නිව්ස් වෙත පැවසීය.
ෆේල්වෙච්ච ආණ්ඩුවක්
“දූෂිත, වගකීම් විරහිත හා ෆේල්වෙච්ච” ආණ්ඩුව අවසානයේ ජනතාවට විකුණන සටන් පාඨය “තද නීති අවශ්‍ය” යන්න බව කී ආචාර්යවරයා එම නීති ඔස්සේ ජනතාව මර්දනයට පියවර ගන්නා බවට ද අනතුරු ඇඟවීය.
“ඒ තද නීති රජය සතු වූ විට ඔබ ඇමති කෙනෙකුට හෝ ඔවුන්ගේ පවුලේ කෙනෙකුට එරෙහිව කරන ප්‍රකාශයක් පවා දඬුවම් ලැබිය හැකි වරදක් කරන්න මේ කපටි දූෂිත දේශපාලකයින්ට හැකියි.”
රළු නායකත්වයක් ඇති වු පමණින් රටේ ප්‍රශ්න විසඳිය නොහැකි බව පෙන්වා දෙන ආචාර්ය විසාකේස චන්ද්‍රසේකරම් මේ මොහොතේ රටට අවශ්‍ය පරිණත රාජතාන්ත්‍රි නායකත්වයක් පෙනේනටවත් නොමැති බැව් සඳහන් කළේය.
සුළුතරයින් හිංසනයට තල්ලු කර දමන වැඩ වසම් කොල්ලකාරී ක්‍රමයෙන් මිදී පූර්ණ ප්‍රජාතන්ත්‍රවාදයක් ලබා ගැනීම අන් කවරදාකටත් වඩා අද වැදගත් දෙයක් බවට ඔප්පු වී හමාර බව කොළඹ නීති පිඨයේ ජේෂ්ඨ කාථිකාචාර්ය ආචාර්ය විසාකේස චන්ද්‍රසේකරම් සිලෝන් නිව්ස් හා වැඩි දුරටත් කියා සිටියේය.
Facebook Comments
