හිටපු ජනපති මහින්ද රාජපක්ෂගේ ෆැසිස්ට්වාදී පාලනයට ශාප කරමින් බලයට පත් යහපාලන ආණ්ඩුව මේ වන විට ජාතිවාදය,ආගම්වාදය පතුරවන ෆැසිස්ට්වාදී බලවේග වලට විරුද්ධව නීතිය ක්‍රීයාත්මක කර ගැනීමට නොහැකි පණ නැති ආණ්ඩුවක් බවට පත් වී ඇති බවට වාමාංශික නායකයෙක් චෝදනා කරයි.
අසාධාරණය, අයුක්තිය සහ අශිෂ්ඨ බව තිබු ෆැසිස්ට්වාදී බලවේග පරාජය කර ජනතාව විසින් නව බලවේගයක් ගොඩනැංවුයේ ව්‍යවස්ථාව සකස් කර රට ඉදිරියට ගෙන යාමට බවයි නව සම සමාජ පක්ෂයේ නායක ආචාර්ය වික්‍රමබාහු කරුණාරත්න පෙන්වා දෙන්නේ.
රාජපක්ෂ පවුලට හෝ භික්ෂුවකට වෙනම නීතියක් තිබිය නොහැකි බවට නව සම සමාජ පක්ෂයේ නායකයා අවධාරණය කර සිටියේ 24 බදාදා සාධාරණ සමාජයක් උදෙසා වු ජාතික ව්‍යාපාරය විසින් සංවිධානය කල මාධ්‍ය හමුවකදීය.
ෆැසිස්ට්වාදි බලවේග වලට සම්බන්ධ පුද්ගලයන් තවමත් රාජ්‍ය අංශයේ විවිධ තනතුරු වල රැඳී සිටින බව පෙන්වා දුන් නව සම සමාජ පක්ෂ නායකයා එම බලවේග ඉවත් කිරීමට වත්මන් රජය ක්‍රීයා නොකරන බවට චෝදනා කල අතර එම සම්බන්ධකම් භාවිතා කරමින් ෆැසිස්ට්වාදි බලවේග නීතිය පැහැර හරිමින් අනියම් බලයක් හරහා අණ්ඩුවට බලපෑම් කරමින් සිටින බවද පැවසුහ.
ෆැසිස්ට්වාදි සහ ජාතිවාදි ආගම්වාදි රාජපක්ෂ පාලන පෙරළා දමමින් යහපාලන රජය පිහිටුවා ගත්තේ සාධාරණය, යුක්තිය වෙනුවෙන් බවට සිහි ගැන්වු ආචාර්ය වික්‍රමබාහු පරාජය කර දැමු ෆැසිස්ට් බලවේග අනියම් ආකාරයෙන් මේ රටේ පාලනය කරන්නේ කෙසේ දැයි ආණ්ඩුවෙන් ප්‍රකාශ කරන සිටී.
ජාතිවාදය ආගම්වාදය මැඩලීමට පොලිසියට බලය දී ඇති බව අගමැති රනිල් වික්‍රමසිංහ ප්‍රකාශ කලද එම බලය ක්‍රීයාවට නංවනවා දැයි සැක සහිත බවයි නව සම සමාජ පක්ෂයේ නායක ආචාර්ය වික්‍රමබාහු කරුණාරත්න වැඩිදුරටත් ප්‍රකාශ කළේ.
Facebook Comments
