මාධ්‍ය ආයතන වලට ‘පාඩම් ඉගැන්නීමට’ ඇති සූදානම ප්‍රකාශයට පත් කරන ජනාධිපතිවරයා එය යුක්ති සහගත කිරීම සඳහා යුද සමයේ රටට එරෙහිව කටයුතු කළ මාධ්‍ය කණ්ඩායමක් මාධ්‍ය ආයතන වලට රිංගාගෙන දේශීයත්වයට සහ ජාතික වැඩපිළිවෙළට පහර ගසමින් සිටින බවට චෝදනා කර තිබේ.
රජයේ ප්‍රවෘත්ති දෙපාර්තමේන්තුව පවසන්නේ නුවරඑළිය දිස්ත්‍රික්කයේ වලපනේ ප්‍රාදේශීය ලේකම් කොට්ඨාසයට අයත්, යෝඹුවැල්තැන්න ප්‍රදේශයේ පැවති “ගම සමග පිළිසඳර” 15 වැනි වැඩසටහනට සහභාගි වෙමින් ජනාධිපති ගෝඨාභය රාජපක්ෂ තම චෝදනාව කියා සිටි කළ බවයි.
ඒ කවර මාධ්‍ය ආයතනදැයි ජනාධිපතිවරයා ප්‍රකාශ කර නැත. කෙසේවෙතත්, ජනාධිපතිවරයාගේ අනතුරු ඇඟවීමේ එක් ඉලක්කයක් වූයේ මහරාජා මාධ්‍ය ජාලය බව පෙනෙන්නට තිබුණි.
මාධ්‍ය නිදහස යනු මාධ්‍ය ආයතන හිමිකරුවන්ගේ නිදහස නොවන බව පවසන ජනාධිපතිවරයා, ඇතැම් මාධ්‍ය ආයතන හිමිකරුවන්ට රට පාලනය කිරීමට අවශ්‍යව ඇතත් ඒ සදහා ඉඩ ලබා නොදෙන බවට පවසා තිබුනේ ඔවුන්ට පාඩම් උගන්වන අයුරු තමන් දන්නා බව පවසමිනි.
“අපේ රටේ රජවරුත් නෑ. මහරාජලත් නෑ. මහරාජාවරු හිටියේ ඉන්දියාවේ. මේ මාෆියා… රජයවල්, පාලකයෝ පාලනය කරන්න හදනවා. ඒවා මාත් එක්ක බෑ. මම දන්නවා ඒවට පාඩම් උගන්වන්න ඕනේ නම් උගන්වන විදිහත් මම දන්නවා.”
තමා ජනාධිපතිවරයා ලෙස ජනමාධ්‍යයට කිසිදු බලපෑමක් කර නැති බව පවසන ඔහු එහිදී වැඩි දුරටත් අවධාරණය කර තිබුනේ විවිධ කණ්ඩායම්වල සහ පුද්ගලයන්ගේ අවශ්‍යතාව මත වැරදි මාධ්‍ය භාවිතයක නිරත වෙමින් රටත්, ජනතාවත් නැවත අගාධයට ඇද දැමීමට උත්සාහ කළහොත් එවැනි පිරිස්වලට එරෙහිව නීතිය ක්‍රියාත්මක කිරීමට නොපැකිලෙන බවයි.
ජනාධිපතිවරයා එම සභාව හමුවේ මාධ්‍ය නිදහස හඳුන්වා දී ඇත්තේ තමන් විසින් ලබා දුන් දෙයක් ලෙසය.
” මම මාධ්‍ය නිදහස දීලා තියනවා. මාස 14 ක් මම පාලනය කළා.නමුත් කිසිම මාධ්‍යකට කිසිම බලපෑමක් කරලා නෑ. හැබැයි ඒ අය මේක වැරදියට පාවිචිචි කරන්න ආවොත් ඒකටත් මට නීති තියනවා. කරන්න පුළුවන් ක්‍රම තියනවා. ඒවා මං ක්‍රියාත්මක කරනවා,” යි ජනාධිපති ගෝඨාභය රාජපක්ෂ අනතුරු අඟවා තිබුනි.
සංඝයා වහන්සේගේ ඉල්ලීම පරිදි ආරක්ෂක ලේකම් සමයේ තමන් දැරූ දැඩි චරිතයද පෙරට ගන්නට තමන්ගේ සූදානම මීට ඉහත අවස්ථාවක ජනාධිපතිවරයා විසින් ප්‍රකාශයට පත් කර තිබුණි.
මහරාජා මාධ්‍ය ආයතනය ගින්නෙන් විනාශයට පත්වූයේද ඒ සමයේය.
මාධ්‍යවේදීන් 44 ක්
ජනාධිපති ගෝඨාභය රාජපක්ෂ ආරක්ෂ ලේකම් ධුරය දරන සමයේදී ඝාතන සහ පැහැරගැනීම් ඇතුළු පීඩාවලට රට තුලදී ලක්වූ මාධ්‍යවේදීන් ගණන 44 ක් බව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) විසින් සම්පාදනය කරන ලද වාර්තාවක දැක්වේ.
ඉන් වැඩි ප්‍රමාණයක් උතුරේ දෙමළ මාධ්‍යවේදීන්ය. ඔවුන් කිසිවෙකුටත් මේ තාක් යුක්තිය ඉටු වී නොමැත.
Facebook Comments
