කොරෝනා වෛරස් ආසාදිතයන්ගේ තොරතුරු නාවික හමුදාව විසින් වසංකිරීම නිසා රෝග ව්‍යාප්තිය සීමා කිරීමට බාධා වී ඇති බවට නිවාරණ රාජකාරියේ නියුතුව සිටින මහජන සෞඛ්‍ය පරීක්ෂකවරු චෝදනා කරති.
නාවික හමුදා පාලනය යටතේ පවතින නිරෝධායන මධ්‍යස්ථාන තුළ සිටින සාමාජිකයන්, කොරෝනා වෛරස් ආසාදිතයන් බවට පත්වුවහොත් ඔවුන්ගේ තොරතුරු සෞඛ්‍ය අංශවලට වාර්තා නොවන බව ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය පවසයි.
“මේ මධ්‍යස්ථාන ඇතුළේ මේ අය පොසිටිව් වෙනවාද නැද්ද කියන තොරතුරු සෞඛ්‍ය අංශවලට වාර්තා වෙන්නේ නැහැ,” යි ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ සභාපති එම්.ජී. උපුල් රෝහණ “රාවය” පුවත් පත සමග පැවැති සාකච්ඡාවකදී එම අනාවරණය කර ඇත.
“එම ප්‍රදේශයේ සිටින මහජන සෞඛ්‍ය පරීක්ෂකට හෝ සෞඛ්‍ය දෙපාර්තමේන්තුවේ නිලධාරියෙක්ට ඒ පුද්ගලයන් පොසිටිව් වුණා කියන දේ වාර්තා කරන්නේ නැති නිසා අපි ඒ ගැන දන්නේ නැහැ.”
ඒ සම්බන්ධයෙන් තොරතුරු වාර්තා නොවීම නිසා ආසාදිතයන් ක්ෂේත්‍රයේ ගනුදෙනු කළ පිරිස් නිරෝධායනය කිරීමට හෝ ඔවුන් සම්බන්ධ වෙනත් ක්‍රියාමාර්ග ගැනීමේ හැකියාවක් නොමැති බව එම සංගමයේ සභාපතිවරයා පෙන්වා දී තිබේ.
මේ වන විට හමුදා කණ්ඩායම් සහ සෞඛ්‍ය ක්ෂේත්‍රය අතර සම්බන්ධතාව පිළිබද ගැටලුවක් නිර්මාණය වී තිබෙන බව පවසන සංගමයේ සභාපති එම්.ජී. උපුල් රෝහණ අවධා රණය කරන්නේ නාවික හමුදාව යටතේ පවතින නිරෝධායන මධ්‍යස්ථාන තුළ ආසාදිතයන් සිටින බව නිල නොවන ආකාරයට වාර්තා වී ඇති බවයි.
“පොසිටිව් වෙලා කියලා සමහර අවස්ථාවල නිල නොවන ආකාරයට ඒ අයගේ පවුල්වල අය කතා කරලා මහජන පරීක්ෂකවරුන්ට කියූ අවස්ථා තියනවා.”
හමුදා කණ්ඩායම් සහ සෞඛ්‍ය ක්ෂේත්‍රය අතර සම්බන්ධීකරණය ගැටලු සහගත වී ඇති බව පෙන්වා දෙන එම්.ජී. උපුල් රෝහණ අවධාරණය කරන්නේ එක ගමනක් යෑම සදහා සෞඛ්‍ය, ත්‍රිවිධ හමුදාව, පොලීසිය සියල්ල ඒකාබද්ධ විය යුතු බවයි.
රට තුළ ඕනෑම මොහොතක රෝගී පොකුරු මතුවීමේ අවදානම සම්බන්ධයෙන්ද බිය පලකරන මහජන සෞඛ්‍ය පරීක්ෂකවරුන්ගේ සංගමයේ සභාපතිවරයා වැඩි දුරටත් අවධාරණය කර ඇත්තේ පාසල් විවෘත කිරීම ආදිය සම්බන්ධයෙන් ඉතාම ඉහළ ආරක්ෂිත උපක්‍රම අනුගමනය කිරීමට සිදුවන බවයි.
ලංකාවේ පළමු කොරෝනා රෝගියා සොයා ගනු ලැබු මාර්තු 10 වැනිදා රාත්‍රියේ සිට මැයි මස 11 සදුදා දහවල් වන විට ශ්‍රී ලංකාවෙන් වාර්තා වී ඇති සමස්ත කොරෝනා වෛරස් ආසාදිතයන් ගණන 863 කී.
කොව්ඩ් – 19 පැතිරීම වැළැක්වීමේ ජාතික ක්‍රියාන්විත මධ්‍යස්ථානයේ ප්‍රධානි, ආරක්‍ෂක මාණ්ඩලික ප්‍රධානී මෙන්ම යුද්ධ හමුදාධිපති ලුතිනන් ජෙනරාල් ශවේන්ද්‍ර සිල්වා පවසන්නේ ඒ අතුරින් 400 ට වැඩි පිරිසක් මෙරට “නාවික හමුදාවේ වීරෝධාර සෙබළුන්” බවයි.
ශ්‍රී ලංකා නාවික හමුදාවේ විශාල පිරිසකට එකවර කෝවිඩ් 19 වෛරසය ආසාදනය වීමත් සමග වැලිසර පිහිටි නාවික නෞකා ගැමුණු කඳවුරු පරිශ්‍රය හුදෙකලා කිරීමට නාවික හමුදාව කටයුතු කර තිබෙන අතර එහි සිටින 4000 ආසන්න නාවිකයන්, වැලිසර නාවික කඳවුර තුල විවාහක නිවාස 194ක වෙසෙන ඔවුන්ගේ පවුල් වල සාමාජිකයන් සමග කඳවුර තුලත් හුදෙකලා කර ආයතනික නිරෝධායන කටයුතු සදහා යොමු කර ඇති බව ශ්‍රී ලංකා නාවික හමුදාව විසින් අප්‍රේල් මස අවසන් සතියේදී අනාවරණය කර තිබුනි.
Facebook Comments
