වෘත්තීය සමිති විරෝධතාවකට පොලිස් හිරිහැර

0
Ivory Agency Sri Lanka
wedding people

පාර්ලිමේන්තු අධිකාරය අබිබවා ජනාධිපති ගෝඨාභය රාජපක්ෂට බලය අත්කර දීම අරමුණු කොටගත් විසි වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පත ට විරෝධය පළ කරන ශ්‍රී ලංකාවේ ජ්‍යෙෂ්ඨතම වෘත්තීය සමිති නායකයන් පිරිසකට පොලීසිය බාධා පමුණුවා තිබේ.

ජනතා පරමාධිපත්‍ය අහෝසි කරමින් ඒකාධිපති විධායකයක් ගොඩනැගීමට විරෝධය පාමින් සමාජය දැනුවත් කිරිමේ යෙදී සිටියදී පොලිස් බාධා එල්ල වු බවයි “20 ට එරෙහි වෘත්තීය සමිති ව්‍යාපාරය” පවසන්නේ.

විරෝධතා ව්‍යාපාරයේ එක් පියවරක් ලෙස 20 ට එරෙහි වෘත්තීය සමිති ව්‍යාපාරයේ සියලූම නායකයන් ගේ ප‍්‍රධානත්වයෙන් ඔක්තෝබර් 16 සිකුරාදා කොටුව දුම්රියපොළ ඉදිරිපිටදී “සංශෝධන සහිතවත් විස්ස එපා” යනුවෙන් සදහන් විරෝධතා පෝස්ටරයක් ඇලවීම සංකේතාත්මකව ආරම්භ කර තිබේ.

මෙම විරෝධතා පෝස්ටරය ඇලවීම ආරම්භ කිරීමට එම ස්ථානයට පැමිණි වෘත්තීය සමිති නායකයන් සමාජ දුරස්ථභාවය රැකෙන අයුරින් සහ අනෙකුත් නිරෝධායන නීතිවලට අනුගත වෙමින් සිටියද පොලිස් නිලධාරීන් එම කටයුත්තට දිගින් දිගටම බාධා පැමිණ වු බව 20 ට එරෙහි වෘත්තීය සමිති ව්‍යාපාරය නිකුත් කළ මාධ්‍ය නිවේදනයක සඳහන්ය.

පොලිස් වීඩියෝ

උතුරේ විරෝධතාකරුවන් වසර ගණනක් තිස්සේ විඳි හිරිහැරයක් වන පොලිස් රූගත කිරීම් වලටද ඔවුන් මුහුණ පා තිබේ.

“විවිධ බාධා කිරීම් හා තර්ජනයන් පොලිසිය විසින් සිදුකළ අතර ම පොලීසිය විසින් කිසිදු අවසරයකින් තොරව එම අස්ථාවට සහභාගී වූ වෘත්තීය සමිති නායකයින් වීඩියෝ කිරීමද සිදුකරන ලදී.” එම නිවේදනයේ වැඩි දුරටත් සදහන්ය.

රටේ ප‍්‍රජාතන්ත‍්‍රවාදයට බරපතල තර්ජනයක් වන 20 වැනි ආණ්ඩුක‍්‍රම ව්‍යවස්ථාවට, වෘත්තීය සමිතිවල විරෝධය සාමකාමීව ප‍්‍රකාශ කරන විට පවා කොරෝනා නීති ගෙන එමින්, විරෝධය දැක්වීමේ පුද්ගල අයිතියට පොලීසිය කරන බාධා 20 ට එරෙහි වෘත්තීය සමිති ව්‍යාපාරය විසින් හෙළා දැක තිබේ.

නිරෝධායන නීතිවලට මුවාවෙමින් සිවිල් ක‍්‍රියාකාරින්ගේ විරෝධතා කඩා බිඳ දැමීම සඳහා පොලීසිය යොදවා ගැනීම, 20 වැනි සංශෝධනයෙන් පසු ඇතිවන ඒකාධිපති රාජ්‍ය ලක්‍ෂණයන්හි පූර්ව ලක්‍ෂණයන් බවද, 20 ට එරෙහි වෘත්තීය සමිති ව්‍යාපාරය අනතුරු අඟවා තිබේ.

නිරෝධායන නීතිවලට මුවාවෙමින් උතුරේ දෙමළ ජනයාගේ මළවුන් සිහිපත් කිරීමේ නිදහස අහිමි කිරීමට පසුගිය සමයේදී රජය ක්‍රියා කිරීමට උතුරේ දෙමළ මුස්ලිම් ජනයා විරෝධය දක්වා තිබුනේ උතුරු නැගෙනහිර දෙපළාතේ දැවැන්ත හර්තාල් ව්‍යාපාරයක් දියත් කරමිනි.

ලංකා වෙළඳ කාර්මික හා පොදු සේවක සංගමයේ සිල්වෙස්ටර් ජයකොඩි, එක්සත් කම්කරු සම්මේලනයේ ලීනස් ජයතිලක, ලංකා ගුරු සංගමයේ ජෝසප් ස්ටාලින්, සමස්ත ලංකා රාජ්‍ය කළමනාකරණ නිලධාරී සංගමයේ උදේනි දිසානායක, තැපැල් ඒකාබද්ධ වෘත්තීය සමිති සන්ධානයේ චින්තක බණ්ඩාර, සෞඛ්‍ය වෘත්තීයවේදීන්ගේ විද්වත් සංගමයේ, රවී කුමුදේශ් හා ලංකා වෘත්තීය සමිති සම්මේලනයේ චමින්ද පෙරේරා 20 ට එරෙහිව වෘත්තීය සමිති ව්‍යාපාරය වෙනුවෙන් මාධ්‍ය නිවේදනය නිකුත් කර තිබේ.

Facebook Comments