ශ්‍රී ලංකාව තුල සංහිඳියාව ගොඩනැඟිමේ ප්‍රමුඛ කාර්යයක් ලෙස ආරම්භ කරන ලද පාර්ලිමේන්තු මන්ත්‍රීවරුන්ට භාෂා ඉගැන්වීමේ පාඨමාලාවට මන්ත්‍රීවරුන් සහභාගී නොවීම ගැන සංහිඳියා අමාත්‍යවරයකු සිය කණස්සල්ල පළ කර තිබේ.
ජාතික ඒකාබද්ධතා, සංහිඳියා හා රාජ්‍ය භාෂා අමාත්‍යාංශය විසින් ආරම්භ කරන ලද සිංහල සහ දෙමළ භාෂා වැඩසටහනට ආරම්භයේදී මන්ත්‍රීවරුන් පනස් දෙනකු පමණ සහභාගී වුවද මේ වන විට එයට පැමිණෙන්නේ මන්ත්‍රීවරුන් දෙතුන් දෙනකු පමණක් බවයි මනෝ ගනේෂන් මන්ත්‍රීවරයා පවසන්නේ.
තමන් පුද්ගලිකව භාෂා දැනුම ලබා ගන්නා ලෙස මන්ත්‍රීවරුන්ගෙන් ඉල්ලා සිටියද ඔවුන් එය මායිම් නොකළ බවට ජාතික ඒකාබද්ධතා, සංහිඳියා හා රාජ්‍ය භාෂා අමාත්‍යවරයා ශ්‍රී ලාංකිකත්වය තෙවන ඇසින් යන තේමාව යටතේ එම අමාත්‍යංශය විසින් සංවිධානය කළ කෙටි චිත්‍රපට සම්මාන උළෙලට එක් වෙමින් ප්‍රකාශ කළේය.
“පෞද්ගලිකව මම මන්ත්‍රීවරුන්ට කිව්වා. කරුණාකරල ඉගෙන ගන්න කිව්වා මොකද භාෂාව ඉගෙන ගන්න එක හරහා ඡන්දෙ හරි ගන්න පුලුවන් කියලා.” යි ජාතික ඒකාබද්ධතා, සංහිදියා හා රාජ්‍ය භාෂා අමාත්‍ය මනෝ ගනේෂන් කියා සිටියේය.
එකිනෙකාගේ භාෂාව ඉගෙනීම හරහා රටේ ප්‍රශ්න වලින් බොහෝමයක් විසඳාලිය හැකි බවට මනෝ ගනේෂන් අමාත්‍යවරයා වැඩි දුරටත් විශ්වාසය පළ කළේය.
Facebook Comments
