පොලිස් බාධා මැද උතුරු නැගෙනහිර දෙමළ මහවිරු සමරු

ගාලු මුවදොර අරගලයේ ප්‍රතිපලයක් ලෙස ජනපති වු රනිල් වික්‍රමසිංහගේ පාලනය යටතේත්, මහවිරු සමරු වලට දිගින් දිගටම එල්ල වු පොලිස් බාධා කිරීම් නොසලකා හරිමින් උතුරු නැගෙනහිර දෙපළාතේ දෙමළ ජනයා ස්ථාන රැසකම මලින්, පහනින් සහ කදුලින් යුද්ධයේදී ඝාතනයට ලක් වු සිය සමීපතමයන් අනුස්මරණය කරද්දී, නැගෙනහිර පළාතේ මහවිරු සමරු සංවිධායකයන් හය දෙනකු අත්අඩංගුවට ගැනීමට පොලීසිය ක්‍රියා කර තිබේ.

පළාත් බද වාර්තාකරුවන් පවසන්නේ කොටි සංවිධානය භාවිත කළ කහ සහ රතු වර්ණ සහිත කොඩි වලට සමාන කමින් යුත් කොඩි වලින් මහවිරු සුසාන භුමිය සැරසීම වරදක් බවට චෝදනා කරමින් නැගෙනහිර පළාතේ මහවිරු සමරු සංවිධායකයන් හය දෙනකු අත්අඩංගුවට ගැනීමට පොලීසිය නොවැම්බර් 27 වැනිදා රාත්‍රියේ කටයුතු කළ බවයි.

යුද්ධයේදී ඝාතනයට ලක් වු තම සමීපතමයන් අනුස්මරණය කිරීමේ ආරම්භය සනිටුහන් කරමින් පස්වරු හයයි පහට පහන දැල්වීම සදහා උතුරු නැගෙනහිර දෙපළාතේ ස්ථාන රැසක දෙමළ ජනයා සුදානමින් සිටියදී නැගෙනහිර පළාතේ, මඩකලපුව තරවෙයි මහවිරු සුසාන භුමියට පැමිණි වාලච්චේන පොලීස් නිලධාරීන් එම සුසානය රතු සහ කහ පැහැති කොඩි වලින් සරසා තිබීම වරදක් බව පවසමින් එම කොඩි ඉවත් කරන ආකාරය වීඩියෝ ගතව තිබේ.

පොලීසිය සිදු කරන බාධා කිරීම් සම්බන්ධයෙන් පාර්ලිමේන්තු මන්ත්‍රී රාසමානික්‍යම් ශානක්‍යන් හා දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාජා ගජේන්ද්‍රන් පොලීසියෙන් විමසීම් කරන අවස්ථාවේ නිල ඇදුමින් සැරසි සිටින ජ්‍යෙෂ්ඨ පොලිස් අධිකාරිවරයකු පවසන්නේ පහන් පත්තු කිරීමට බාධාවක් නොමැති නමුත් මහවිරු සුසානය සරසා තිබෙන කොඩි සහතිව පහන් පත්තු කිරීමට ඉඩ දිය නොහැකි බවයි.

ඊට හේතු ලෙස ඔහු පවසන්නේ දෙමළ ඊලාම් විමුක්ති කොටි සංවිධානයද භාවිත කළේ එවැනි ම කොඩි බවයි.

“මේ සැරසිලිත් එක්ක මේ පහන් පත්තු කිරීම කරන්න දෙන්න බෑ. අධිකරණයේ තහනම් නියෝගයක් තියනවා. ඔබතුමාලට පහන් පත්තු කරන්න පුළුවන් ඒකේ ප්‍රශ්නයක් නෑ. එල්.ටී.ටී.ඊ එක යූස් කළේත් මේ ජාතියේ කොඩි.“

ශ්‍රී ලංකා හමුදා විසින් 2009 වසරේදී සහමුලින්ම විනාශ කරන ලද මඩකලපුව තරවෙයි මහවිරු සුසාන භුමිය සරසා තිබු රතු සහ කහ පැහැති කොඩි ගලවා ඉවත් කළ පොලීසිය තරවෙයි මහවිරු අනුස්මරණ කමිටුවේ ප්‍රධානියා ඇතුළු හය දෙනකු අත්අඩංගුවට ගත් බව පළාත් බද වාර්තාකරුවෝ වැඩි දුරටත් පවසති. අනුස්මරණය සඳහා යොදාගත් ශබ්ද විකාශන යුගල 2ක් සහ විදුලි ජනක යන්ත්‍රයක් ද පොලිස් භාරයට ගෙන ඇත.

මෙලෙස අත්අඩංගුවට ගෙන ඇත්තේ මඩකලපුවේ පදිංචිකරුවන් වන K. කූගකුමාරරාජ් (53), K. ජනෝජන් (24), S.K. නිදර්ශන් (47), F.A. නිව්ටන් (43), N. ධනුෂන් (19) සහ S.නවජීවන් (34) බව ශ්‍රි ලංකාවේ ප්‍රජාතන්ත්‍රවාදය සඳහා වූ ජනමාධ්‍යවේදියෝ [JDS] සංවිධානය විසින් ප්‍රකාශයට පත් කර තිබේ.

යාපනයේ, කයිට්ස් පොලිස් බල ප්‍රදේශය තුළ පැවැත්වීමට නියමිත දෙමළ මහවිරු අනුස්මරණ තහනම් කරන ලෙස ඉල්ලමින් කයිට්ස් පොලීසිය, කයිට්ස් අධිකරණයට කරුණු වාර්තා කර තිබුනේ ද රතු සහ කහ පැහැති කොඩි භාවිත කරමින් තහනම් සංවිධානයක සාමාජිකයන් අනුස්මරණය කිරීමට සුදානම් වන බව පවසමිනි.

පොලීසියේ එම ඉල්ලීම මහේස්ත්‍රාත් කේ. ගජනිධිපාලන් විසින් නොවැම්බර් 27 දා පෙරවරුවේ ප්‍රතික්ෂේප කර තිබු අතර පොලීසියේ ඉල්ලීම සම්බන්ධයෙත් තමන් අධිකරණය හමුවේ අවධාරණය කළ කරුණු සම්බන්ධයෙන්ද අධිකරණ කටයුතු නිමා වීමෙන් පසු මාධ්‍ය වෙත අදහස් දක්වමින් නීතිඥ කනගරත්නම් සුගාස් සදහන් කර තිබුනි.

“රතු සහ කහ භාවිත කරන එක තහනම් කරන්න අවශ්‍ය නම් මුලින්ම තහනම් කරන්න ඕන ශ්‍රී ලංකාවේ ජාතික කොඩිය තමයි කියලා අපි අධිකරණයට පැහැදිලි කළා,“ යි නීතිඥ කනගරත්නම් සුගාස් අවධාරණය කළේය.

ඇතැම් සමරු සඳහා නියඟලා මල් යොදාගැනීම තහනම් කිරීමටද පොලිසිය උත්සාහ ගෙන තිබුණි.

මේ අතර දෙමළ ජාතික ජනතා පෙරමුණේ (TNPF) නායක, ගජෙන්ද්‍රකුමාර් පොන්නම්බලම් මන්ත්‍රීවරයා අම්පාරේ කන්ජිකුඩිච්චිආරු ප්‍රදේශයේත්, දෙමළ මාතාවන් සහ තරුණයන් පිරිසක් මුතුර්හි ආලන්කුලමේත් මහවිරු සමරුවලට සහභාගි වීමට යමින් සිටියදී පොලිසිය මග අවුරා බාධා කරනු වීඩියෝ ගතව තිබේ.

උතුරු නැගෙනහිර පුරා

පළාත් බද වාර්තාකරුවන් පවසන පරිදි උතුරු නැගෙනහිර දෙපළාතේ පිහිටි මහවිරු සුසාන භුමි රැසකදීම යුද්ධයේදී ඝාතනයට ලක් වු තම සමීපතමයන් වන දෙමළ ඊලාම් විමුක්ති කොටි සාමාජිකයන් සිහිපත් කිරීමට දෙමළ ජනයා කටයුතු කර තිබේ.

යාපනය කෝපායි, කොඩිකාමම්, සාට්ටි (තීවගම්) , එල්ලන්කුලම්, උඩුතුරෙයි යන මහවිරු සුසාන භුමි තුලදී මෙන්ම යාපනය විශ්වවිද්‍යාලයේ හා උපවාසයේ යෙදී සිටියදී මිය ගිය එල්.ටී.ටී.ඊ සංවිධානයේ රාසයියා පාර්තිපන් හෙවත් ත්‍යාගී තිලීපන් සැමරීම සඳහා නල්ලුර් කන්දසාමි කෝවිල අසල ඉදිකර තිබු 2010 දී රජයේ ආරක්ෂක අංශ විසින් කඩා බිඳ දමන ලද තිලීපන්ගේ ස්මාරකය සමීපයේ ද මහවිරු අනුස්මරණ 27 වැනිදා රාත්‍රියේදී සිදු කර තිබේ.

යුද්ධයෙන් වැඩිම හානියට පත් මුලතිව් දිස්ත්‍රික්කයේ මුල්ලියාවලෙයි, දේවිපුරම්, ඉරනෙයිපාලෙයි, රෙට්ටෙයිවායික්කාල්, තේරාවිල්, වන්නිවිලාන්කුලම් ඇතුළු මහවිරු සුසාන භුමි තුලදී මෙන්ම මුලතිව් මුහුදු තීරයේදිද අනුස්මරණ පැවැති බව පළාත් බද වාර්තාකරුවෝ පවසති.

කිලිනොච්චි කනගපුරම් මහවිරු සුසාන භුමියේ මෙන්ම මන්නාරම ආට්කාට්ටිවේලි හා මන්නාරම පන්ඩිවිරිච්චාන් මහවිරු සුසාන භුමි තුලදී මලින්, පහනින් සහ කදුලින් යුද්ධයේදී ඝාතනයට ලක් වු සිය සමීපතමයන් අනුස්මරණය කිරීමට දෙමළ ජනයා කටයුතු කර තිබේ.

මඩකලපුව මාවඩි මුන්මාරි හා තරවෙයි මහවිරු සුසාන භුමි තුලදී මෙන්ම අම්පාර කන්ජිකුඩිච්චිආරු හා මුතුර්හි ආලන්කුලම මහවිරු සුසාන භුමි තුලදී ද මහවිරු අනුස්මරණ පැවැති බව පලාත් බද වාර්තාකරුවෝ වැඩි දුරටත් පවසති.

මහවිරුවන් ලෙස දෙමළ ජනයාගේ ගෞරවයට පාත්‍ර වන දසදහස් ගණනක් මිහිදන් කොට ඇති ‘තුයිලම් ඉල්ලම්’යනුවෙන් හැඳින්වෙන සුසාන භූමි ගණනාවක්ම රජයේ හමුදා විසින් විනාශ කොට කඳවුරු ඉදිකොට ඇති හෙයින් ජනතාවට අනුස්මරණ පවත්වන්නට සිදුවී තිබුනේ යාබද ඉඩම්වලය.

උතුරු නැගෙනහිර ජනතාවගේ මළවුන් සැමරීමේ අයිතියට පොලිසිය විසින් පමුණුවන ලද බාධා සම්බන්ධ වාර්තා හෝ විරෝධතා දකුණේ ප්‍රධාන ධාරාවේ මාධ්‍ය හෝ ප්‍රභූ ක්‍රියාධාරීන් වෙතින් දැකගන්නට ලැබුනේ නැත.