ආචාර්ය වික්‍රමබාහු කරුණාරත්න මෙරට වාමාංශික දේශපාලනයේ කේන්ද්‍රීය චරිතයකි. ලංකාවේ ජාතික ප්‍රශ්නය, ගෝලීය ආර්ථිකය, දර්ශනය, කලාව ආදී විෂයයන් කෙරෙහි ඔහුගේ ශාස්ත්‍රීය මැදිහත් වීම සමාජීය වශයෙන් අතිශයින් ඵලදායීය. මේ බාහු සහෝදරයාට යොමු කළ කාලීන ප්‍රශ්න කිහිපයකින් යුක්ත සංලාපයකි.
■ මේ මොහොතේ බාහු සහෝදරයගෙ දේශපාලන භූමිකාව මොකක්ද?
මගේ දේශපාලන භූමිකාව නව සම සමාජ පක්ෂයේ දේශපාලන භූමිකාව. මේ ලිබරල් ප්‍රජාතන්ත්‍රවාදී ආණ්ඩුවෙ ව්‍යවස්ථාව වෙනස් කරලා බලය බෙදාහැරීම තුළින්, දෙමළ ජාතික ප්‍රශ්නය විසඳා ගැනීමත්, මානව අයිතිවාසිකම් ක්‍රියාකාරීත්වය වඩා සාර්ථක කර ගැනීමත් සඳහා බලපෑම් කරමින් ඒ කටයුතු කර ගැනීම සඳහා ක්‍රියා කරන එක තමයි අපේ භූමිකාවේ ප්‍රධාන අරමුණ වෙන්නෙ. ඒ සමඟ ඒකට විරුද්ධව නැගී සිටින පැසිස්ට්වාදී බලවේග පරාජය කිරීමට උපදෙස් දෙමින්, සංවිධාන හදමින් ඉදිරියට යන කටයුත්ත තමයි අපි මේ වෙලාවෙ දි කරන්නෙ.
■ කොහොමද යහපාලනයේ වසර දෙක?
මේ වසර දෙක තුළ ක්‍රියාකාරීත්වය මන්දගාමීයි. නමුත්, මේ වෙද්දි ව්‍යවස්ථාව වෙනස් කිරීම පැත්තෙන් සෑහෙන වැඩ කොටසක් කරලා තියෙනවා. ඒකට සහභාගි වෙලා දැනටමත් අපි රට පුරා ව්‍යවස්ථාවෙන් පරාජය කළ හැකි අයිති පිළිබඳ කතා කරනවා. ජාතිවාදී, ආගම්වාදී බලවේග ඊට විරුද්ධව ගැටුමට එනවා. ඒවට මුහුණ දෙමින් අපි නව ව්‍යවස්ථාව යථාර්ථයක් කිරීම සඳහා කටයුතු කරගෙන යනවා. අනෙක් පැත්තෙන් වෘත්තීය සමිති තුළ සහයෝගයෙන් වැඩ කිරීම සඳහාත් අපි යොමු වෙලා ඉන්නවා.
■ යහපාලන ආණ්ඩුව ජනතාවට පොරොන්දු වූ දේවල් ඉටු කරමින් ඉන්නවද?
යම් ප්‍රමාණයකට ඒ පොරොන්දු වූ දේවල් ඉටු කරමින් ඉන්නවා. ආණ්ඩුවේම ඇතුළතින් දරුණු බලපෑමක් තියෙනවා. පැස්ස්ට්කාරී බලපෑම් කොටසක් ආණ්ඩුව තුළත් ක්‍රියාත්මක වෙනවා. කැබිනට් එකෙත් එවැනි පිරිසක් ඉන්නවා. ඉතින් ඒ නිසා ප්‍රජාතන්ත්‍රවාදය වෙනුවෙන් පෙනී සිටින ධාරාවට ඉදිරියට යන්න වෙලා තියෙන්නෙ අවහිරකම් මධ්‍යයේ.
■ රනිල්, මෛත්‍රී දෙන්නගෙ සමබරතාව ඔබ දකින්නෙ කොහොමද?
ඒ අය බොහොම පරණ යාළුවො. ඒ අය ඉතාම හිතවත්තු දෙන්නෙක්. ඒ අයගෙ හිතවත්කම අපට අදාළ දෙයක් නෙවෙයි. ඔවුන් දෙදෙනා දේශපාලනිකවත් යම් සමබරතාවක් රැකගෙන වැඩ කරන්න උත්සාහ දරන බව පේනවා.
■ ඔබ යහපාලන ආණ්ඩුවෙ දි රනිල්ට බර වමේ නායකයෙක් ලෙස පෙනෙන්නට ගත්තා. ඒක හරිද?
ඒක එක්තරා දුරකට හරි. මොකද රනිල් ලිබරල් ධනවාදී නායකයෙක් ලෙස වඩාත් ඵලදායී ලෙස යම්කිසි දෙයක් කරන්න උත්සාහ ගන්නවා. ඉතින් ඔහුව උනන්දු කිරීම සහ ඔහු සමඟ ඉදිරියට යාම, ඔහුට බලපෑම් කිරීමට යොමු වීම නිසා එහෙම අදහසක් ඇති වෙන්න පුළුවන්. කාටහරි එහෙම අදහසක් ඇති වුණා නම් ඒක එච්චර බරපතළ දෙයක් නෙවෙයි. නමුත් මම එහෙම ධනවාදයට යට වෙලා කොහෙවත් වැඩ කරන්නෙ නැහැ. මේක තුළින් අපේ සමාජවාදී අරගලය ඉදිරියට ගෙන යාම තමයි අපේ අදහස. මේ මොහොතෙ දි අපි රනිල් සමඟ එකතු වෙලා සටනක් කරනවා. එදා ජේ.ආර්. ජයවර්ධන එක්ක එකතු වෙලා කළා වගේ.
■ බැඳුම්කර ප්‍රශ්නයෙ දි මෛත්‍රී සහ රනිල් පාරවල් දෙකක ගියා. එතැන දි ජනතාව බර වුණේ මෛත්‍රීගෙ පාරට. ඔබ මේ ගැන මොකද හිතන්නෙ?
මට නම් ඔය ධනපති පාලකයො කරන හොරකම් ගැන එච්චර ලොකුවට කෑ කෝ ගැහිල්ලක් කරන්න අවශ්‍ය නෑ. මොකද ධනපති ක්‍රමය තුළ ඔය විදියෙ හොරකම් කෙරෙනවා. ඉතින් ඒක ප්‍රශ්නයක් කරගන්න මට අවශ්‍ය නැහැ. එතකොට මේකට වඩා ප්‍රබල ප්‍රශ්නය වෙන්නෙ, ව්‍යවස්ථාව වෙනස් කරලා දෙමළ ජාතික ප්‍රශ්නය විසඳමින් ඉදිරියට ගෙන යාමයි. ඔය හැම ලොක්කම භාණ්ඩාගාරයට අත තියලා කීයක් හරි තම තමන්ගේ දේශපාලන වැඩවලට දාගන්න එක ධනපති සදාචාරයේ වැඩක්. ඒ දේවල් අපට අදාළ නැහැ.
■ ඉකුත් ආණ්ඩුවේ වංචා දූෂණ හා මිනීමැරුම් ගැන කෙරෙන විමර්ශන ක්‍රියාවලිය ගැන සෑහීමකට පත් විය හැකිද?
සෑහීමකට පත් වෙන්න නම් බෑ. නමුත් ක්‍රියා කිරීම ඉතාම හොඳයි. මොකද මිනිස්සුන්ගෙ ගෙවල් කඩලා, මිනිස්සු මරලා මිනිස්සුන්ගෙ දේවල් අත්පත් කර ගනිමින් යන අතර ජාතිවාදී, ආගම්වාදී ලෙස රටේ ඉතා දැඩි විනාශකාරී දේ කිරීම වෙනමම කතන්දරයක්. එතකොට ඒක වෙනම දේශපාලනයක්. දැනට ඒ සම්බන්ධව තොරතුරු හොයලා තියෙනවා. ඒ තොරතුරු අනුව කටයුතු කරමින් ඉන්නවා. ඒ තොරතුරු අරගෙන අපිත් ඒකට බැහැලා, උනන්දුවෙන් ඉදිරියට ගෙනිහිල්ලා, දඬුවම් දීම දක්වාම යා යුතුයි. අපි ඒ තැනට යනවා.
■ පසුගිය ආණ්ඩුවෙ එක හොරෙක්වත් තවම අල්ලාගන්න බැරි වුණේ ඇයි?
ඇයි නැත්තෙ. හොරු අල්ලලා තියෙන්නෙ. නමුත් ඒ අයට විරුද්ධව නඩු විභාගයකින් සාර්ථකව පිළිතුරක් ලබා ගන්න බැරි වෙනවා. ඒ ධනේශ්වර නඩු විභාග, ව්‍යවස්ථාවත් එක්කම පැටලිලා තියෙන නිසා. මොකද ව්‍යවස්ථාවෙ තියෙන අර්බුදත් එක්ක නඩු අහන එකත් පැටලිලා තියෙන්නෙ. ඒක අර්ථ දැක්වීම අද එක එක විදියට කරන්න පුළුවන්. දැන් බලන්න, විමල් වීරවංශ කරපු හොරකම් පිළිබඳව අද වෙද්දි හෙළි වෙලා. ගෝඨාභය කරලා තියෙන මිනීමැරුම් ගැන අපි කවුරුත් දන්නවා. ඒවා ගැන දැන් ජනතා තීන්දුව ලැබිලා ඉවරයි.
■ පසුගිය ආණ්ඩුවෙ වාහන අවභාවිතය කියන්නෙ කෙසෙල් කැන් හොරෙන් කැපුවා වගේ දෙයක්. මොකද ඊට වඩා ලොකු දූෂණ තිබෙනවා. ආණ්ඩුව අල්ලන්නෙ කෙසෙල් කැන් කපන අයද?
කෙසෙල් කැන් හොරෙක් වෙන්න පුළුවන්, ඒ කොතනින් හරි කෙසෙල් කැනක් කපා ගත්තොත්. සිය දහස් ගණන් විශාල ප්‍රමාණයක වාහන අවභාවිත කරලා, කෝටි ගණන් ප්‍රකෝටි ගණන් සල්ලි යන වැඩක් වුණොත් එහෙම ඒක කෙසෙල් කැන් හොරකමක් වෙන්නෙ නැහැ. ඒක කෙසෙල් කැනක් කපාගත්ත වගේ පුංචියට සලකන්න බෑ. වාහනයක් දෙකක් නම් ගණන් ගත යුතු දෙයක් නෙවෙයි. නමුත් මේක වෙනස් වුණොත් ප්‍රශ්නයක්. ඕනෙම දෙයක් ප්‍රමාණාත්මකව වැඩි වෙද්දි, ගුණාත්මකව වෙනස් වෙනවා.
■ තෙල් ටැංකි ටික ඉන්දියාවට දෙන්න පිඹුරු පත් සකසන්නෙ රනිල් කියන එකයි සමාජයේ තිබෙන මතය. ඔබ ඒ ගැන මොකද හිතන්නෙ?
අපි ආර්ථික වශයෙන් බටහිරෙනුත්, නැගෙනහිරෙනුත් එක එක විදිහට තිබුණු කඳවුරු සියල්ලම කඩා වැටිලා වෙනස් වෙලා ඉන්න වෙලාවක, දකුණු ආසියානු කලාපය තුළ සබඳතා තර කරගෙන වැඩ කරන එක නුවණක්කාර වැඩක්. ඒ නිසා එවැනි පියවර ගන්න ඕනෙ.
■ ආණ්ඩු විරෝධී වැඩවර්ජන රැල්ලක් ආවොත් මොකද කරන්නෙ?
එවැනි වර්ජන රැල්ලක් ආවොත්, ඒකට විරුද්ධව පෙනී හිටලා, ඒකෙ තියෙන ජාතිවාදී ආගම්වාදී පැසිස්ට්කාරී දේශපාලනය හෙළිදරව් කරලා කුඩුපට්ටම් කරලා දාන්න ඕනෙ.
■ ෆොන්සේකා දාලා ආණ්ඩුව බැටේ දෙයිද?
ෆොන්සේකාට විතරක් බෑ. ෆොන්සේකා වැඩ කරන ජනතාවගේ සංවිධානත් එක්ක එකතු වෙලා, ඒකාබද්ධ වෙලා, වැඩපළ මට්ටමේ සහ ඒ ඒ ආයතන මට්ටමේ ක්‍රියාකාරීන් එකතු කරගෙන, හමුදාවේ වාමාංශික ප්‍රගතිශීලී ජනතාව වගේම වැඩපළවල සිටින කම්කරුවන් සමඟ එකතු වෙලා, ඒකාබද්ධ බලවේගයක් හැදීමට කටයුතු කළොත් තමයි, ඒක සාර්ථක වෙන්නෙ. එයා වමේ නායකයන් සමඟ එකතු වෙලා වැඩ කරන්න එකඟ විය යුතුයි. එහෙම නැතිව එයා හමුදා නායකයෙක් නිසා එතනට බැස්සයි කියලා ඔය වැඬේ කරන්න බැහැ. මාර්ෂල් ටිටෝ වගේ ජනතා නායකයෙක් එහෙමත් නැන්තම් ජනතා මාර්ෂල් කෙනෙක් බවට ෆොන්සේකාට පත් වෙන්න පුළුවන් නම් හොඳයි. ඒ කියන්නෙ වැඩ කරන ජනතාව සහ ප්‍රගතිශීලී කොටස් එකතු කරන නායකයෙක් බවට පත් වෙන එක.
■ මේ ආණ්ඩුවෙත් සමහර ඇමැතිවරුන් දූෂිත වෙමින් පවතිනවා. ඒ ගැන ඉක්මන් පියවරක් නොගතහොත් මොකක් වෙයිද?
ඒක ඉතින් ඒ පක්ෂවල නායකයො බලන්න ඕනෙ දෙයක්. බරපතළ දේවල් කරනවා නම් වහාම ඔවුන් ඉවත් කළ යුතුයි.
■ ඇත්තටම දැන් ලංකාවෙ වම ඉවරයිද?
වම ඉවර වෙන්නෙ කොහෙද? වම ඉවර නම් මේ විදියට මට කතා කරන්නෙ නෑනෙ. වම ප්‍රබලව සිටින නිසානෙ මේ විදියට මට කතා කරන්නෙ. අද ලංකාවෙ වික්‍රමබාහු දන්නෙ නැති කෙනෙක් ඉන්නවා කියලා හිතනවද? කිසි කෙනෙක් නැහැ. මං අඩුම ගානේ යාපනේ බැස්සොත් මිනිස්සු දුවගෙන එනවා. ඒ එන්නෙ මේ නව සම සමාජ පක්ෂෙ වික්‍රමබාහු නේද කියලා. මඩකලපුවෙ බැස්සත්, නුවර බැස්සත්, කොළඹ බැස්සත් අතිවිශාල ජනතාවක් අපි සමඟ ඉන්නවා. දැනට අපේ සම්පත් සහ සංවිධානවල දුර්වලකම් නිසා අපි මෙහෙම ඉන්නවා මිසක්, නැත්නම් සෑහෙන දුරට ජනතාව අතරට ගිහින් අතිවිශාල බලවේගයක් බවට පත් වෙලා ඉන්නවා.
■ System Change එකක් නැතිව කාටවත් ගොඩයන්න බැරි තත්ත්වයක් රටේ තියෙනවා. ඒ ගැන ඔබ හිතන්නේ කොහොමද?
System Change නැතුවම බෑ කියන එක හරියට හරි. ඒ System එක Change කරන්න නම් අපි කරන්න ඕනෙ ප්‍රධානම දේ වෙන්නෙ ජාතික ප්‍රශ්නය විසඳන එක. ඒ දේ කරනවා නම් අපට ගොඩ එන්න බැරි නෑ. ගොඩ එන්න පුළුවන්.
සංවාදය – තමාරා පතිරණ
ඡායාරූප – අජිත් සෙනෙවිරත්න
(සත්හඬ)
Facebook Comments
