ජාතික ප්‍රශ්නය නිරාකරණය කිරිමට කැඩෙන්නේ, බෙදෙන්නේ නැති දේශපාලන විසඳුමක් ලබා දී රට සංවර්ධනය කරා ගෙන යමින් සියලු ජාතීන් අතර විශ්වාසය සහ සහෝදරත්වය ගොඩනැගීම තම අරමුණ බව ජනාධිපතිවරයා පවසනවා.
කිසිවෙකුට ෆෙඩරල් බලයක් හෝ රට කැඩෙන අන්දමේ බලයක් ලබාදීමට තමා සූදානම් නොමැති අතර තමා ජනාධිපති ධුරයට පත්වූයේ ජාතියට ද්‍රෝහියෙකු වීමට නොවන බව ජනාධිපති මෛත්‍රීපාල සිරිසේන කියා සිටියේ 28 අඟහරුවදා දකුණු කොරියාවේ වෙසෙන ශ්‍රී ලාංකික ප‍්‍රජාව සමග හමුවකට එකිවෙමිනි.
තමා බලයට පැමිණියේ රට පැවතියාට වඩා හොඳ තත්ත්වයකට ගෙන ඒමට බව අවධාරණය කල ජනාධිපතිවරයා ඉතිහාසයේ සිදු වූ වැරදි නිවැරදි කිරීමේ පිවිතුරු චේතනාවෙන් ශ්‍රී ලාංකිකයින්ට සාමයෙන්, සමගියෙන් සහ අන්‍යෝන්‍ය අවබෝධයෙන් යුතුව ජීවත්වීමට හැකි පරිසරයක් ගොඩනංවන බවට සහතික විය.
රට භාරගත්තේ යුද හමුදාව දුර්වල කිරීමට හෝ ජාතික ආරක්ෂාව දුර්වල කිරීමට නොවන බව මෙන්ම මාතෘ භූමිය වෙනුවෙන් අංක 01 ට ඉටුකළ යුතුව තිබූ කාර්යයක් වූ ජාත්‍යන්තරය දිනා ගැනීමේ අභියෝගය ජය ගැනීම තම ප‍්‍රමුඛ අරමුණක් වූ බවයි ජනාධිපති සිරිසේන ප්රකාශ කර සිටියේ.
වහපු පොත
ලෝකයේ බලවතුන්ගේ උදහසට ලක්ව සිටී ශ්‍රී ලංකාව යළි ජාත්‍යන්තරයට සමීප කිරීමට ඉකුත් වසර 03 තුළ තමා සමත්වූ බව පෙන්වා දුන් ජනාධිපතිවරයා කවුරුන් කෙසේ කීවද අද තමන් රට වෙනුවෙන් සමස්ත ලෝකයම දිනාගෙන තිබෙන බව පෙන්වා දුනි.
යහපත් විදේශ ප‍්‍රතිපත්තිය තුළ ජාත්‍යන්තර යුද අධිකරණ, ජාත්‍යන්තර විනිසුරුවරුන් මෙන්ම විදුලි පුටුව ගැන කථා කළ පොත වසා දැමීමට, කටයුතු කළ ද ඉන් ජීවත්වන ඇතැම් පිරිස් එම පොත වසා දැමීමට සූදානම් නොමැතිව ජාත්‍යන්තරය හමුවේ විසඳාගත් කරුණු පිළිබඳව ද තවමත් කථා කරමින් සිටින බව ජනපති ප්රකාශ කළේය.
සමස්ත රට තුළම විශාල සංවර්ධනයක් සිදු කරමින් සියලු ජනතාව අතර සාමය සහෝදරත්වය ගොඩනැගීමේ සංහිඳියා වැඩපිළිවෙළ ඉටුකිරීම සඳහා ද රජය කැපවී සිටින බව ජනාධිපතිවරයා වැඩි දුරටත් කිය සිටියේය.
Facebook Comments
