මුස්ලිම් විරෝධි අනුශාසනාවක් සිදු කිරීම නිසාවෙන් මතබේදයට ලක්ව සිටින අස්ගිරි නාහිමියෝ තමන් තුළ කිසිඳු ජාතියක් කෙරෙහි වෛරයක් නැතැයි වදාරති.
“භික්ෂූන් වහන්සේලා වශයෙන් අපිට පැවරී ඇත්තේ රටත්, ජාතියත්, සම්බුද්ධ ශාසනයත් ආරක්ෂා කිරීම පමණයි,” යනුවෙන් වරකාගොඩ ඤාණරතන හිමියන් ජනමාධ්‍ය වෙත නිකුත් කළ වීඩියෝ නිවේදනයකින් පවසා තිබේ.
තමන් වෙත එල්ලවන විරෝධය මගහැරවීමට ගන්නා වෑයමක් ලෙස දිස්වන එම වීඩියෝ පටයේ ජාතිය යනුවෙන් අදහස් කෙරෙන්නේ කවර ජාතියක් දැයි උන්වහන්සේ පැහැදිලි කර නැත.
යටිනුවර, දියකෙළිනාව කිත්සිරිමෙවන් රජමහ විහාරස්ථානයේ විසි එක් රියන් සමාධි බුද්ධ ප්‍රතිමාව නිරාවරණය කිරීමේ උත්සවය අමතමින් මුස්ලිම් වෙළෙඳාම වර්ජනය කරන ලෙස සිංහල බෞද්ධ ජනතාවගෙන් ඉල්ලා සිටි අස්ගිරි මහනාහිමියෝ ඒ සඳහා “යහමග පෙන්වීමට” ද සහතික වූහ.
එහිඳි සිංහල කාන්තාවන් වඳ බවට පත් කළේ යයි ජනමාධ්‍ය මගින් අපහාසයට ලක් කෙරුනු මුස්ලිම් ජාතික වෛද්‍යවරයකුට ගල් ගැසීමට ඇතැමුන් කරන යෝජනාවද අස්ගිරි මහනාහිමියන් විසින් අනුමත කරන ප්‍රකාශය ද විඩියෝ ගතව ඇත.
මහත් ආන්දෝලනයට තුඩුදුන් උන්වහන්සේගේ මුස්ලිම් විරෝධී ප්‍රකාශය ආණ්ඩුවේ අමාත්‍යවරුන් දෙදෙනකු ඇතුළු අන්තවාද විරෝධීන්ගේ දැඩි හෙලා දැකීමට ලක්වී තිබුනි.
සකල සත්වයාට සාමය සහ කරුණාව පතළ කරන දර්ශනයක් “තාලිබාන්කරණයක්” ලෙස මංගල සමරවීර අමාත්‍යවරයා විසින් අස්ගිරි අනඥාව හඳුන්වා දී තිබේ.
අමාත්‍ය හර්ෂ ද සිල්වා ‘ට්විටර්’ පණිවුඩයක් නිකුත් කරමින් ඉල්ලා තිබුනේ, අස්ගිරි නාහිමි ප්‍රකාශය ඉල්ලා අස් කර ගත යුතු බවයි.
අස්ගිරි මහනාහිමියන් පවසන්නේ තමන් විසින් කරන ලද අනුශාසනාවේ “වැරදි අර්ථකථන හුවා දැක්වීමට ඇතැම් පිරිස් කටයුතු කරන” බවයි.
එසේ වෙතත්, මුස්ලිම් කඩ වර්ජනයට සහ වෛද්‍යවරයාට ගල් ගැසීමට උන්වහන්සේ කළ ප්‍රකාශයේ කවර අර්ථකථනය නිවැරදිදැයි අස්ගිරියෙන් මාධ්‍ය වෙත නිකුත් කරන ලද වීඩියෝවේ සඳහන් නොවේ.
Facebook Comments
