වත්මන් රජය සංහිඳියාව වෙනුවෙන් කැප වෙනවා

වත්මන් රජය පක්ෂ දෙකක් එකට එකතු වී ආණ්ඩුවක් පවත්වාගෙන යනවාක් මෙන් ම ජාතීන් අතර සංහිඳියාව ගොඩනැගීම සඳහා කැපව කටයුතු කරන බව මෙන්ම ඒ පිළිබඳ ව වත්මන් රජය පැහැදිලි තීන්දුවක ඉන්නා බව ජාතික සමගිය හා සංහිඳියා කාර්යාංශයේ සභාපති, හිටපු ජනාධිපතිනි චන්ද්‍රිකා බණ්ඩාරනායක කුමාරතුංග පැවසීය.

හිටපු ජනාධිපතිනි මේ බව ප්‍ර‍කාශ කළේ ඊයේ (19) රක්වාන ශාන්ත ජෝන් ප්‍රාථමික විද්‍යාලයේ පැවති පාසල් මට්ටමේ ජාතික තෛපොංගල් අස්වනු මංගල්‍යයේ ප්‍ර‍ධාන ආරාධිත අමුත්තා වශයෙන් සහභාගි වෙමිනි.

මෙම උත්සවය ජාතික සමගිය හා සංහිඳියා කාර්යාංශය, පාර්ලිමේන්තු ප්‍ර‍තිසංස්කරණ හා ජනමාධ්‍ය අමාත්‍යංශය හා සබරගමු පළාත් අධ්‍යාපන, සංස්කෘතික හා තොරතුරු තාක්ෂණ අමාත්‍යංශය එක්ව සංවිධානය කොට තිබු අතර මේ සඳහා රත්නපුර දිස්ත්‍රික්කයේ ඇඹිලිපිටිය අධ්‍යාපන කලාපයේ පාසල් 20ක පමණ දරු දරියන් 800කට අධික පිරිසක් සහභාගිව සිටියහ.

විවිධ ජාතීන්ට හා ආගම්වලට අයත් දරුවන් අතරේ සමගිය සංහිඳියාව ඇතිකිරීමේ අරමුණින් මෙම ජාතික උත්සවය සංවිධානය කොට තිබුණි.

මෙම ජාතික උත්සවයට සමඟාමීව දිවයින පුරා තවත් මෙවැනි අධ්‍යාපන කලාප මට්ටමේ උත්සව 90කට ආසන්න ප්‍ර‍මාණයක් පැවැත්වීමට ජාතික සමගිය හා සංහිඳියා කාර්යාංශය කටයුතු යොදා ඇති බව හා මෙම උත්සව මාලාව ජනවාරි 13දා සිට 31දා දක්වා ක්‍රියාත්මක කෙරේන බව එම කාර්යාංශය පවසයි.

දීර්ඝ කාලයක පටන් සිංහල, දෙමළ, මුස්ලිම් වැසියන් එකට ජීවත් වූ ශ්‍රී ලාංකිකයන් පසුගිය වසර දක්වාම ප්‍ර‍ධාන ආගමික උත්සව ජාතික මට්ටමින් එකට එක්ව සමරා නොතිබූ බව පෙන්වා දුන් හිටපු ජනාධිපතිනිය ඒ අනුව මෙම වැඩපිළිවෙළ පසුගිය වසරේදී ආරම්භ කළ බවත් එවන් තත්ත්වයක් තුළ මෙරටේ යුද්ධයක් ඇතිවීම පුදුමයට කරුණක් නොවන බවද පෙන්වා දුන්නාය.

පසුගිය වසර 15ක කාලය තුළ ශ්‍රී ලංකාවේ දුප්පත්කම වැඩිවී ඇති බව සහ අවුරුදු 05ට අඩු දරුවන්ගෙන් 40%ක් මන්දපෝෂණයෙන්ද 25%ක් අධි මන්දපෝෂණයෙන්ද පෙළෙන බව පවසන හිටපු ජනාධිපතිනිය වත්මන් රජය විසින් පසුගිය ආණ්ඩුව බින්දුවට බස්සවා තිබූ ආර්ථිකය යළි ගොඩනගමින් රැකියා ඇතිකිරීමේ වැඩපිළිවෙළ හරහා රට ඉදිරියට යමින් පවතින බවයි කියා සිටියේ.

ජාතීන් වශයෙන් එක්සේසත් නොවුණහොත් රට දුප්පත්වීමට පත්වන අතර මේ හේතුව නිසා රටේ සංවර්ධන කටයුතු දශක කිහිපයකින් ආපස්සට ගිය බව කියා සිටි පාර්ලිමේන්තු ප්‍ර‍තිසංස්කරණ හා ජනමාධ්‍ය නියෝජ්‍ය අමාත්‍ය කරුණාරත්න පරණවිතාන අනෙක් ජාතීන් හඳුනාගැනීමේ හැකියාව ඇතිවන මෙවන් අධ්‍යාපන සංහිඳියා වැඩසටහන් මීට පෙර රටේ ක්‍රියාත්මක නොවූ බවද පෙන්වා දුනි.