දශ ලක්ෂ ගණනින් මනුෂ්‍ය ඝාතනය කළ ඇඩොල්ෆ් හිට්ලර්ගේ මඟ ගොස් මිලිටරි පාලනයක් ඔස්සේ හෝ රටේ පාලනය ලබා ගන්න ලෙසට අස්ගිරි පාර්ශවයේ අනු නායක වෙඩරුවේ උපාලි හිමි විසින් ගෝඨාභය රාජපක්ෂ හට කරන ලද ආරාධනාව ආරක්ෂා කරනු ලබන පුද්ගලයන් ෆැසිස්ට්වාදි කුලිකාරයන් ලෙස ඒකාබද්ධ විපක්ෂය නියෝජනය කරන මන්ත්‍රීවරයකු විසින් හඳුන්වා දී තිබේ.
එම ප්‍රකාශයට විරුද්ධ පුද්ගලයන් ආණ්ඩුවේ කුලිකාරයන් ලෙස හඳුන්වන්නේ නම් ප්‍රකාශයට පක්ෂ පුද්ගලයින් ෆැසිස්ට්වාදි කුලිකාරයන් බව පෙන්වා දෙන වාසුදේව නානායක්කාර මන්ත්‍රීවරයා තමන්ට ආණ්ඩුවේ හෝ ෆැසිස්ට්වාදයේ කුලිකාරයන් වීමට අවශ්‍ය නැති බව ප්‍රකාශ කළේය.
“හාමුදුරුවන්ගේ මේ ප්රකාශය ගැන උදහසින් හා විරුද්ධත්වයෙන් අදහස් දක්වන කවුරු වුනත් ආණ්ඩුවේ කුලිකාරයින් යැයි කියල කියනවා නම් ඒවගේම මේ ප්රකාශය ආරක්ෂ වෙන විදියට කරුණු දක්වන හැමෝම ෆැසිස්ට්වාදයේ කුලිකාරයෝ,” යැයි මන්ත්‍රීවරයා 25 සඳුදා පැවති මාධ්‍ය හමුවක දී කියා සිටියේය.
අස්ගිරි පාර්ශවයේ අනු නායක වෙඩරුවේ උපාලි හිමියන් විසින් කරන ලද ප්රකාශය ප්‍රජාතන්ත්‍රවාදයට පිටුපා මිලිටරි ඒකාධිපති ක්‍රමයට ගමන් කිරීමට වත්මන් ආණ්ඩුව උඩගෙඩි දීමක් බවට වාසුදේව මන්ත්‍රීවරයා දැඩිව හෙලා දකින ලදී.
ලෝකයේ සිටි ඒකාධිපති මිලිටරි නායකයන් අතර දරුණුතම පාලකයා ඇඩොල්ෆ් හිට්ලර් බව කී වාසුදේව නානායක්කාර මන්ත්‍රීවරයා ඔහු‍ව ආදර්ශයට ගන්න යැයි පැවසීම ඉතා භායනක හා අවාසනාවන්ත දෙයක් ලෙස වැඩි දුරටත් අවධාරණය කළේය.
Facebook Comments
