නව ආණ්ඩුක්‍රම ව්‍යවස්ථාවක් සම්බන්ධව වන බලාපොරොත්තුව ශ්‍රී ලංකා නිදහස් පක්ෂය අත් නොහැර ඇති බවට පක්ෂයේ නව මහ ලේකම්වරයා පවසනවා.
නිවැරදි ක්‍රියා මාර්ගයක් තුල සිදු නොවන ආණ්ඩුක්‍රම ව්‍යවස්ථා සංශෝධනයක් තුලින් සිංහල,දෙමළ ,මුස්ලිම් සියලු ජනතාව අවිනිශ්චිත තත්ත්වයකට පත් වන බව පාර්ලිමේන්තු මන්ත්‍රී දයාසිරි ජයසේකර 03 බුහස්පතින්දා පැවති මාධ්‍ය හමුවක දී කියා සිටියේය.
“ආණ්ඩුක්‍රම ව්‍යවස්ථාව පාර්ලිමේන්තුවට ඉදිරිපත් කිරිමේ ක්‍රමවේදය සම්පුර්ණයෙන් පැත්තකය විසි කරලා ක්‍රියා කරනවා නම් අපිට ඊට එරෙහිව වැඩ කරන්න සිද්ද වෙනවා. හැබැයි ජාතිවාදී පදනමක් තුල.” යැයි මන්ත්‍රීවරයා සඳහන් කළේය.
මේ අතර යෝජිත නව ආණ්ඩුක්‍රම ව්‍යවස්ථා කෙටුම්පත ආණ්ඩුක්‍රම ව්‍යවස්ථා සභාවට ලබන සතියේ ඉදිරිපත් කිරීමට නියමිත බව මාධ්‍ය වාර්තා කර තිබේ.
කතානායක කරු ජයසූරියගේ ප්‍රධානත්වයෙන් ක්‍රියාත්මක ආණ්ඩුක්‍රම ව්‍යවස්ථා සභාවට නව කෙටුම්පත ඉදිරිපත් කෙරෙන්නේ ආණ්ඩුක්‍රම ව්‍යවස්ථාව සම්බන්ධයෙන් විශේෂඥයන් ඉදිරිපත් කළ යෝජනා සහ නිර්දේශ සමඟ බවයි එම වාර්තා පෙන්වා දෙන්නේ.
විධායක ජනාපති ක්‍රමය අහෝසි කිරීම, පාර්ලිමේන්තු බලතල වැඩිකිරිම, පළාත් සභා විධිමත් කිරීම, පළාත් පාලන ආයතනවලට වැඩි බලතල පැවරීම ආදී වැදගත් යෝජනා නිර්දේශ රැසක්ම විශේෂඥයන් නව ආණ්ඩුක්‍රම ව්‍යවස්ථා කෙටුම්පතට යෝජනා කර ඇති බවයි රජයේ ප්‍රකාශයෙකු උපුටා දක්වන මාධ්‍ය වාර්තා පවසන්නේ.
Facebook Comments
