දහනම වෙනි ව්‍යවස්ථා සංශෝධයෙන් බල කේන්ද්‍ර දෙකක් නිර්මාණය වීම හරහා රට තුල ව්‍යාකූල තත්ත්වයක් ඇති වු නිසාවෙන් පොරොන්දු වු පරිදි සම්පුර්ණයෙන්ම විධායක ජනාධිපති ධුරය අහෝසි කල යුතු බව නව ආණ්ඩුක්‍රම ව්‍යවස්ථා සම්පාදනය සදහා වු මහජන අදහස් ලබා ගැනිමේ කමිටුවේ සභාපතිවරයා පවසයි.
“පාර්ලිමේන්තුවට අගමැතිට බලය පවරනවා වෙනුවට ජනපතිට බලය කොටසක් පමණක් අහිමි කිරිම තුළින් යම් ව්‍යාකූල තත්ත්වයක් ඇති වෙලා තියෙනවා. මොකද බල කේන්ද්‍ර දෙකක් ඇති වුණා. 19 වෙනි ව්‍යවස්ථා සංශෝධනය කෙටුම්පත් කරපු අයගෙ තිබු එක් දෝශයක් ඒක. බල කේන්ද්‍ර දෙකක් තිබියදි රාජ්‍යයක් ගෙනියන එක හරි අමාරුයි. ඒ නිසා අපිට අවශ්‍යයි සම්පුර්ණයෙන්ම විධායක ජනාධිපති ක්‍රමය අහෝසි කරන්න.” යැයි නීතිඥ ලාල් විජේනායක කියා සිටියේය.
ජනතා විමුක්ති පෙරමුණ විසින් ගෙන ඒමට නියමිත විධායක ජනාධිපති ධුරය අහෝසි කිරිමේ යෝජනාවට විරුද්ධ වීමට කාරණයක් නොමැති බව නීතිඥ ලාල් විජේනායක 05 සෙනසුරාදා මහනුවරදී මාධ්‍ය වෙත ප්‍රකාශ කළේය.
බල කේන්ද්‍ර දෙකක් හරහා පාලනයට ඇති වන්නා වු අවහිරය ඉවත් කිරිමට විධායක ජනාධිති ධුරය අහෝසි කිරිමේ යෝජනාව ගෙන ඒම වැරැද්දක් නොවන බව කී නව ආණ්ඩුක්‍රම ව්‍යවස්ථා සම්පාදනය සදහා වු මහජන අදහස් ලබා ගැනිමේ කමිටුවේ සභාපති නීතිඥ ලාල් විජේනායක “නමුත් ඒක නෙමේ හොඳම දේ හොඳම එක මුලු ආණ්ඩුක්‍රම ව්‍යවස්ථාවම වෙනස් කිරිම” යැයි වැඩි දුරටත් කියා සිටියේය.
Facebook Comments
