ශ්රී ලංකාව තුල සංහිඳියාව ඇති කිරීමට එක්සත් ජතීන්ගේ මානව හිමිකම් කොමිසම විසින් වසර දෙකක කාලයක් ලබා දී තිබියදී ජාතික සංහිඳියාව ඇති කිරීමට සෙමින් ගමනක් යාම සඳහා එක්සත් ජාතින්ගේ සහාය බලාපොරොත්තු වන බව ජනාධිපතිවරයා පවසයි.
ජාතික සංහිඳියාව ශක්තිමත් කරමින් රටේ ජීවත් වන සියලුම ජාතීන් තුළ සහෝදරත්වය ගොඩනගමින් සැකය, අවිශ්වාසය, වෛරය, ක්‍රෝධය ඉවත් කරමින් සෑම කෙනෙකුටම නිදහසේ ජීවිත් විය හැකි සමාජයක් ගොඩනැගීමට යහපාලන රජය කටයුතු කරන බව ජනපති මෛත්‍රීපාල සිරිසේන එක්සත් ජාතීන්ගේ මහා මණ්ඩලයේ 72 වන සැසිවාරය අමතමින් කියා සිටියේය.
එක්සත් ජාතීන්ගේ සංවිධානයේ ප‍්‍රඥප්තීන්ට එකඟව, එකඟතාවයන්ට එකඟව, නීති රීතිවලට එකඟව කටයුතු කරන රටක් විදියට එක්සත් ජාතීන්ගේ සංවිධානය විසින් ගන්නා තීන්දු තීරණවලදී ශ්රී ලංකා රජය සාමාජික රටක් වශයෙන් ඒ බැඳීම් තහවුරු කරමින් කටයුතු කරන බව ජනාධිපතිවරයා අවධාරණය කළේය.
ප‍්‍රජාතන්ත‍්‍රවාදය ශක්තිමත් කරමින්, මානව හිමිකම් ශක්තිමත් කරමින්, මූලික අයිතිවාසිකම් ශක්තිමත් කරමින්, ජාත්‍යන්තර හොඳ හිත දිනාගනිමින් ඉතාමත් යහපත් රාජ්‍ය පාලනයක් ගෙන යන අවස්ථාවක එක්සත් ජාතීන්ගේ සංවිධානයේ කාරුණික සහයෝගය බලාපොරොත්තු වන බව ජනපති සිරිසේන පැවසීය.
ස්වාධීන ස්වෛරී රාජ්‍යයක්
“රටේ ස්වාධීනත්වය ස්වෛරීත්වය සුරකිමින් ක‍්‍රියාකරන්නා වූ ගමනේ දී අපට එල්ල වී ඇති විවිධ චෝදනා, යෝජනා, අප විසින් ක‍්‍රියා කළ යුතු ආකාරයන් පිළිබඳව අපට නිදහස් සාමකාමී රටක් වශයෙන් සෙමින් ගමනක් ගොස් පැහැදිලි ඉලක්කයක් කරා යන්නට සියලු දෙනාගේම ගෞරවනීය සහය ඉල්ලා සිටිනවා,” යි ජනපති පවසයි.
රට තුල ජාතික සංහිඳියාව හා සමගිය ගොඩනැංවීමට සෙමින් යන සාර්ථක ගමනක් සඳහා අවශ්‍ය සහයෝගය දෙන ලෙස ජනපති මෛත්‍රීපාල සිරිසේන එක්සත් ජාතීන්ගෙන් සහ රාජ්‍ය නායකයන්ගෙන් වැඩි දුරටත් ඉල්ලා සිටියේය.
Facebook Comments
