රට නොබෙදා බලය බෙදා හරින ලෙස රජයට බල කරමින් සිවිල් සංවිධාන, දේශපාලන පක්ෂ නියෝජිතයන් හා ආගමික නායකයන් විසින් සත්‍යග්‍රහයක් පවත්වා තිබේ.
ජාතික ප්‍රශ්නය විසඳීම වෙනුවෙන් බලය බෙදීමට උත්සාහ ගත් සෑම අවස්ථාවකදීම සංඝයා වහන්සේ ඊට විරුද්ධ වී කඩාකප්පල් කල බව මෙන්ම අනිවාර්යයෙන්ම බලය බෙදා රට එක් කල යුතු බව සත්‍යග්‍රහයට එක් වු සත්කෝරළයේ උප ප‍්‍රධාන සංඝනායක මහගල්කඩවල පුඤ්ඤසාර නායක හිමියන් අවධාරණය කළේය.
ඉදිරියේදී නව ව්‍යවස්ථාවක් පාර්ලිමේන්තුවට ඉදිරිපත් කොට සම්මත කිරීමෙන් බලය බෙදා හැරීම ක්‍රියාත්මක කර සංහිඳියාව තිරසර කරන ලෙස ඉල්ලා කොළඹ විහාරමහාදේවි උද්‍යානයේ බුදු පිළිමය අසලදී 20 බදාදා පැවැත්වු සත්‍යග්‍රහය සංවිධානය කර ඇත්තේ “සමානාත්මතාවය සදහා වු පුරවැසි ක්‍රියාකාරී කමිටුව” විසිනි.
එක්සත් ජාතික පක්ෂය නව ව්‍යවස්ථාව වෙනුවෙන් පෙනී සිටිය ද ශ්‍රී ලංකා නිදහස් පක්ෂයේ කොටස් විධායක ජනාධිපති ධුරය පවත්වා ගෙන යායුතු බවට අදහස් පල කරමින් සිටින බවයි නව සම සමාජ පක්ෂ නායකයා පවසන්නේ.
මහින්ද රාජපක්ෂ ඇතුළු කණ්ඩායම බලය බෙදීමට විරුද්ධ වෙමින් ගෙන යන අදහසට විරුද්ධව ජනමත විචාරණයක් පවත්වා ප්‍රජාතන්ත්‍රවාදි ව්‍යවස්ථාවක් නිර්මාණ කිරීමට බල කරමින් මෙම සත්‍යග්‍රහය රට පුරා ගෙන යන බව ආචර්ය වික්‍රමබාහු කරුණාරත්න කියා සිටියේය.
අදාළ නැනේ
ජනතාව විසින් පරාජය කරනු ලැබු මහින්ද රාජපක්ෂ ඇතුළු ඒකාබද්ධ විපක්ෂය නව ව්‍යවස්ථාවට විරුද්ධ වීම අදාළ නොවන බව ගත්කතුවර ගාමිණි වියන්ගොඩ පෙන්වා දෙයි.
අගමැතිවරයා සහ ජනාධිපතිවරයා මහජන වගකීමක් සේ සලකා රටේ අනාගත පරපුර වෙනුවෙන් විධායක ජනපති ධුරය අහෝසි කර නව ව්‍යවස්ථාවක් ගෙන ආ යුතු බවයි ඔහු අවධාරණය කරන්නේ.
නව ආණ්ඩුක්‍රම ව්‍යවස්ථාවක් සදහා පාර්ලිමේන්තුව නියෝජනය කරන සියලු පක්ෂ වල සහයෝගය ලබා දෙන ලෙස ඉල්ලා සිටීමත්, ජාතිවාදී බලවේග වලට පිළිතුරු දීමත්,විරුද්ධවාදීන්ගේ ප්‍රකාශයන්ට එදිරි වීමත් එම විරුද්ධවාදීන්ගේ සහයෝගය ඉල්ලා සිටීමත් සත්‍යග්‍රහයේ අපේක්ෂාව වන බවයි සංවිධායකයන් පවසන්නේ.
Facebook Comments
