කාන්තාවන්ට අත්‍යාවශ්‍ය සනීපරාක්ෂක තුවා ලබා දීමේ අරමුණින් “සිනිඳු” නමින් සනීපාරක්ෂක තුවා නිෂ්පාදන ව්‍යාපෘතියක් ආරම්භ කර ඇති බව කාන්තා හා ළමා කටයුතු රාජ්‍ය අමාත්‍යවරිය ප්‍රකාශ කර තිබේ.
අඩු මිල සනීපාරක්ෂක තුවා ගෙන්වීම සම්බන්ධයෙන් ද ශ්‍රී ලංකාවේ ඉන්දීය මහ කොමසාරිස්වරයා සමඟ සාකච්ඡා කරමින් සිටින බවයි අමාත්‍ය ගීතා කුමාරසිංහ පවසන්නේ.
දේශීයව සනීපාරක්ෂක තුවා නිෂ්පාදනය කරන නිෂ්පාදකයින් ආනයනය කරන අමුද්‍රව්‍ය සඳහා වන සියලුම බදු ඉවත් කිරීමට ජනාධිපතිතුමා ගත් තීරණය හේතුවෙන් සනීපාරක්ෂක තුවා මිල අඩු වනු ඇති බවට කාන්තා සනීපාරක්ෂක තුවා මිල අඩුකිරීමට ගත් පියවර සම්බන්ධයෙන් පැහැදිළි කිරීමට 03 වනදා රජයේ ප්‍රවෘත්ති දෙපාර්තමේන්තු පරිශ්‍රයේ පැවති මාධ්‍ය සාකච්ඡාවකට එක්වෙමින් ඇය විශ්වාසය පළ කළේය.
එමෙන්ම පාසල් යන වයසේ දැරියන්ට සනීපාරක්ෂක තුවා නොමිලේ ලබාදීමට අවශ්‍ය කටයුතු නුදුරේදී සළසන බවද කාන්තා හා ළමා කටයුතු රාජ්‍ය ඇමැතිනිය පැවසුවාය.
මින් ඉදිරියට කාන්තා සනීපාරක්ෂක තුවා අධික මිලකට විකිනීමට කිසිදු සමාගමකට අයිතියක් නොමැති බවත්, සියලු බදු ඉවත් කර ඇති බැවින් හැකි උපරිම සහනය කාන්තාවන්ට ලබාදිය යුතු බව ද අමාත්‍ය ගීතා කුමාරසිංහ වැඩිදුරටත් කියා සිටියාය.
Facebook Comments
