නාවික කාර්ය මණ්ඩලයේ වැටුප් නොගෙවීම හා ශ්‍රී ලංකාවේ නැව් ඒජන්තවරයාට මුදල් නොගෙවීම හේතුවෙන් ජාත්‍යන්තර නෞකාවකට එරෙහිව කොළඔ වාණිජ මහාධිකරණයේ නඩු පවරා තිබේ.
අධිකරණ ක්‍රියාමාර්ගය නිසා කොළඹ වරායේ නැංගුරම් ලා සිටින බහරේන් ධජය සහිත සනාඩ් භාණ්ඩ ප්‍රවාහන නෞකාව අත් අඩංගුවට ගෙන ඇති බව ජාත්‍යන්තර ප්‍රවාහන සම්මේලනය පවසයි.
බහරේනයේ මනමා අගනුවර මුලස්ථානය කරගත් ටයිලෝස් ෂිපින් ඇන්ඩ් මැරයින් සමාගමට අයත් නෞකාව මෙසේ තුන් මාසයක් පමණ කොළඹ වරාය අත්අඩංගුවේ පසු වන බව එම සම්මේලනයේ ශ්‍රී ලංකාවේ පරීක්ෂක රන්ජන් පෙරේරා සිලෝන් ජර්නල්ස් හා කියා සිටියේය.
එහි සේවයේ නියුතු දහතුන් දෙනකුගෙන් සමන්විත කාර්ය මණ්ඩලය වැටුප් නොගෙවීමට එරෙහිව කොළඔ වාණිජ මහාධිකරණයේ එක නඩුවක් පවරා ඇති බව නාවික අමාත්‍යාංශය පැවසු අතර ඇමරිකානු ඩොලර් හැත්තෑපන්දහසකට අධික මුදලක් සේවා ගාස්තු වශයෙන් තමන්ට නොගෙවීම නිසාවෙන් සනාඩ් නෞකාවේ ශ්‍රී ලංකික නියෝජිතයන් වන අරුණ මැරිටයිම් ආයතනයද නැව් සමාගමට එදිරිව නඩු පවරා ඇත.
කාර්ය මණ්ඩලය විසින් සැප්තැම්බර් 6 වැනි දා කොළඔ මහාධිකරණය හමුවේ ගොනු කරන ලද නඩුවට අදාළව නෞකාව අත්අඩංගුවට ගන්නා ලද බව ඔවුන් වෙනුවෙන් පෙනී සිටින ආණ්ඩුක්‍රම ව්‍යවස්ථා සහ වාණිජ නීතිය පිළිබඳ නීතිවේදී ඕෂධ රොද්‍රිගු සිලෝන් ජර්නල්ස් කළ විමසීමකදී කියා සිටියේය.
ටයිලෝස් ෂිපින් ඇන්ඩ් මැරයින් සමාගමට අයත් තවත් නෞකාවක් ගාස්තු නොගෙවීම නිසා ඕමානයේ හිරවී තිබෙන බව අරුණ මැරිටයිම් ආයතනය පවසයි.
සිලෝන් ජර්නල්ස් කළ විමසීමකදී දැනගන්නට ලැබුනේ ජෙර්නාස් භාණ්ඩ ප්‍රවාහණ නෞකාවද සැප්තැම්බර් 9 දා සිට ඕමානයේ සලාලා වරායේ තිබෙන බවයි.
Facebook Comments
