කිරි දරුවන් රට පැටවීමේ ශ්‍රී ලාංකික ජාවාරමක් තිබූ බව ආණ්ඩුව පිළිගනී

ශ්‍රී ලංකාවේ ළදරුවන් දසදහස් ගණනක් හොර රහසේ විදේශ වලට අලෙවි කිරීමේ ජාවාරමක් පවත්වාගෙන යන ලද බව රජය විසින් පිළිගෙන තිබේ.

1980 ගණන්වලදී උපත ලැබූ බිලිඳුන් එකොලොස් දහසක් පමණ දරුකමට හදාවඩා ගැනීම සඳහා වංචනික ලෙස යුරෝපා රටවලට අලෙවි කිරීම සම්බන්ධයෙන් නෙදර්ලන්ත මාධ්‍ය ජාලයක් කළ හෙලිදරව්වකින් පසුව විමර්ශනයක් ආරම්භ කිරීමට ශ්‍රී ලංකා රජය කටයුතු සුදානම් කර ඇතැයි සෞඛ්‍ය අමාත්‍යවරයා පවසයි.

විදේශ රටවලින් දරුකමට ගත් ළමයින්ට සිය වැදූ මව, පියා සහ ඥාතීන් සොයා ගැනීමට උපකාර විය හැකි DNA දත්ත ගබඩාවක් සැකසීමට රජය කටයුතු කරන බවයි සෞඛ්‍ය අමාත්‍ය රාජිත සේනාරත්න පවසා ඇත්තේ.

ඔහු මේ බව සඳහන් කර ඇත්තේ කම්පා කරවන සුළු මෙම හෙළිදරව්ව කළ සෙම්බ්ලා නෙදර්ලන්ත රූපවාහිනී වාර්තාමය වැඩසටහනක් කළ විමසීමකට පිළිතුරු දෙමිනි.

එසේම 1980 ගණන්වල ශ්‍රී ලංකාව තුල නීති විරෝධී “ළමා ගොවිපොළවල්” පැවති බවට ඔහු විසින් පිළිගෙන තිබේ.

බිළින්දන්, බටහිර ජාතිකයන්ට විකිනීමට ප්‍රථම මිලට ගෙන හෝ සොරකම් කර ඇති බව වැඩසටහන් නිෂ්පාදකයන් විසින් එල්ල කළ චෝදනාවට පිළිතුරු වශයෙන් සෞඛ්‍ය අමාත්‍යවරයා මේ බව ප්‍රකාශ කර ඇත.

“ඒ කාලවකවානුවේ “ළමා ගොවිපලවල්” විශාල ප්‍රමාණයක් තිබුණා. එහිදී ළදරුවන් එකතු කරගෙන දරුකමට හදා ගැනීමට විදේශයන්ට විකිනුවා,” යනුවෙන් ඔහු ප්‍රකාශ කළේය.

මෙතෙක් කල් කටකතා ලෙස බැහැර කරනු ලැබූ ළමා ගොවිපල චෝදනා සත්‍ය බව ශ්‍රී ලංකාවේ ආණ්ඩුව විසින් පිළිගන්නා ලද පළමු අවස්ථාව මෙයයි.

ජේආර් සමය

ජේආර් ජයවර්ධන පාලනය පැවති ඒ වකවානුව තුල “බේබි ෆාම්” පවත්වාගෙන ගිය බවට රජයේ ඉහල පෙලේ බලවතුන්ට චෝදනා එල්ල වී තිබුනි.

ඒ සම්බන්ධයෙන් කිසිදු පරීක්ෂණයක් සිදු කර නොමැත.

එකල පැවති මෙම පහසුකම්, දරුවන් හදා ගැනීම සඳහා රටවල් අතර හුවමාරුකරගැනීම් තහනම් කිරීමට ශ්‍රී ලංකා රජය පෙලඹවූ බව දොස්තර රාජිත සේනාරත්න පවසා තිබේ.

මෙම නව නීති පනවන ලද්දේ සිරකඳවුරක් වැනි ස්ථානයක රඳවා සිටි අලුත උපන් බිලිඳුන් 20 ක් සහ කාන්තාවන් 22 ක්, පොලිස් වැටලීමකින් පසුව සොයා ගැනීමෙන් අනතුරුවය.

සෙම්බ්ලා කාලීන පුවත් වැඩසටහනේ නිෂ්පාදකයන් පවසන්නේ 1980 කාල වකවානුවේදී දරුකමට හදා ගැනීම සඳහා ශ්‍රී ලංකාවෙන් නෙදර්ලන්තය වෙත යැවුණු ළමයින්ගේ වාර්තා ව්‍යාජ ඒවා බවයි.

ළමයින් 11,000 කට ආසන්න ප්‍රමාණයක් යුරෝපා පවුල් වෙත මෙසේ විකුණා ඇත්තේ දෙපාර්ශවය විසින්ම ව්‍යාජ ලේඛන ඉදිරිපත් කරමින් බව ඔවුන් සොයාගෙන ඇත.

එසේම දරුවන් 4000 කට ආසන්න ප්‍රමාණයක් නෙදර්ලන්ත පවුල් සමඟින් එක් වන්නට ඇති බවත් අනෙකුත් ළමුන් ස්වීඩනය, ඩෙන්මාර්කය,ජර්මනිය සහ එක්සත් රාජධානිය වැනි යුරෝපා රටවලට පිවිසෙන්නට ඇති බවත් විශ්වාස කෙරේ.