සංක්‍රාන්ති යුක්තිය සහ සංහිඳියාව සම්බන්ධයෙන් පැහැදිලි මතයක් නොදරන රජය ප්‍රසිද්ධියේ පලකරන අදහස් “වරෙක අපැහැදිලි සහ බොහෝවිට පරස්පර” බවට එක්සත් ජාතීන්ගේ මහ කොමසාරිස්වරයාගේ වාර්තාව දෝෂ දර්ශනයට ලක් ව තිබේ.
ශ්‍රී ලංකාවේ රජය ජිනීවා යෝජනාව සම්බන්ධයෙන් 2015 ඔක්තෝබරයේ සිට 2017 ජනවාරි දක්වා කාලය තුලදී අත් කරගෙන ඇති ප්‍රගතිය විමසන අලුත්ම වාර්තාව ප්‍රකාශයට පත් කරමිනි මේ බව පවසා ඇති අතර රජයේ පාර්ශවයන් හට සංහිඳියාව සම්බන්ධව පැහැදිලි අදහසක් නොමැති වීමට හේතුව ආණ්ඩුවේ දේශපාලන බෙදීම් බවයි එම වාර්තාව පවසන්නේ.
එම හේතුවෙන් පැහැදිලි සන්නිවේදන ව්‍යාපෘතියක් වහාම දියත් කොට සංහිඳියා වැඩපිළිවෙලේ අරමුණු සහ කාල රාමුව මහජනතාවට දැනුම් දෙන ලෙස එක්සත් ජාතීන් රජයෙන් ඉල්ලා සිටී.
ව්‍යවස්ථා ක්‍රීයාවලියේ ප්‍රගතියක්
සංක්‍රාන්ති යුක්තිය සහ සංහිඳියාව මෙන් නොව රජය ව්‍යවස්ථා සංශෝධන කාර්යාවලිය සම්බන්ධයෙන් කැපී පෙනෙන ප්‍රගතියක් අත් කරගෙන තිබෙන බවට එක්සත් ජාතීන්ගේ ප්‍රසාදයට ලක් වී තිබේ.
අධිකරණයේ ස්වාධීනත්වය සහතික කිරීම පිණිසත් ජාත්‍යන්තර වශයෙන් පිළිගත් මානව හිමිකම් ආරක්ෂාව සඳහාත් ව්‍යවස්ථාවට අනිවාර්යයෙන් ඇතුලත් කළ යුතු අංග ගණනාවක් තිබෙන බවද ජගත් මානව හිමිකම් ප්‍රධානියා පෙන්වා දේ.
සංහිඳියා ක්‍රියාදාමයට මුල් තැනක් ලබා දෙන ලෙස ඉල්ලා සිටින මානව හිමිකම් පිලිබඳ එක්සත් ජාතීන්ගේ මහ කොමසාරිස්වර සෙයිඩ් රාද් අල් හුසේන් “ශ්‍රී ලංකා ඉතිහාසයේ මේ තීරණාත්මක අවස්ථාව මගහැර යා නොහැක. යළි නොඑනා ලෙසට අතීතයේ භයංකාර බවට එරෙහිව දැඩි පියවර ගැනීම සහතික කරනු පිණිස යුක්තිය හා එක්ව යන සංහිඳියාවට ප්‍රමුඛස්ථානය දෙන ලෙස,” සිය වාර්තාව මඟින් ලංකා රජෙයන් සහ ජනතාවෙගන් ඉල්ලා සිටී.
Facebook Comments
