ජාතිවාදී ප්‍රහාර වළක්වා ගැනීමේ අරමුණින් රට පුරා ක්‍රියාත්මක හදිසි නීතියට අමතරව සමාජ ජාලා වලට පිවිසීමට ද බාධා ඇති කල බව රජය පවසයි.
රජයේ සම කැබිනට් මාධ්‍ය ප්‍රකාශක දොස්තර රාජිත සේනාරත්න 7 බදාදා රජයේ ප්‍රවෘත්ති දෙපාර්තමේන්තුවේ පැවැති කැබිනට් තීරණ දැනුම් දීමේ මාධ්‍ය හමුවේදී ප්‍රකාශ කළේ මුස්ලිම්වරුන්ට එරෙහි ප්‍රහාර සඳහා ෆේස්බුක් මගින් කෙරෙන උසි ගැන්විමේ නතර කිරීමට සේවා සපයන්නන්ගෙන් ඉල්ලා සිටි බවයි.
“ප්‍රකෝපකාරී ප්‍රකාශ පිටවීම වැලැක්වීම වෙනුවෙන්” ගත් එම තීරණය ක්‍රියාවේ යෙදවීමට විදුලි සංදේශ නියාමන කොමිසමට දැනුම් දී ඇති බව ඔහු සඳහන් කර සිටියේය.
ඇඳිරි නිතිය හා හදිසි නිතියට අමතරව මහනුවර හා අවට දැඩි ආරක්ෂක රැකවල් යොදා තිබියදි 6 අඟහරුවාදා සහ 7 බදාදා මුස්ලිම් දේවස්ථාන සහ ව්‍යපාරික ස්ථාන ඉලක්ක කර ගනිමින් පහර දීම් කිහිපයක් සිදු වු බව සිලෝන් ජර්නල්ස් වාර්තාකරුවෝ පවසති.
ආණ්ඩුවේ බැරිකම
ප්‍රකෝපකාරී ප්‍රකාශ බෙදාහැරීම වැලැක්වීමට යැයි කියමින් ෆේස්බුක් ඇතුළු සමාජ ජාල පිවිසුම් අවහිර කිරීමෙන් ආණ්ඩුවට සැබෑ ප්‍රශ්නය විසඳා ගැනීමට ඇති නොහැකියාව ප්‍රදර්ශනය කරන බව වෘත්තීය වෙබ් මාධ්‍යවේදීන්ගේ සංගමයේ සභාපති ෆ්‍රෙඩී ගමගේ පවසයි.
සමාජ ජාල තුළ ජාතිවාදය වපුරන්නන් කොටුකර ගැනීමට තාක්ෂණික විධික්‍රම සහ එම උපක්‍රම රජයේ බුද්ධි අංශ සතු බව පෙන්වා දෙන වෘත්තීය වෙබ් මාධ්‍යවේදීන්ගේ සංගමයේ සභාපතිවරයා එසේ අදාළ විෂ වපුරන්නන් කොටුකර ගැනීමට කෙටි මඟවල් තිබියදී මෙය යම් දීර්ඝ කාලීන මාධ්‍ය දඩයමක ආරම්භයක් දැයි සැක සහිත බවයි වැඩි දුරටත් පවසන්නේ.
මහනුවර, පරිපාලන දිස්ත්‍රික්කය සඳහා වහාම ක්‍රියාත්මක වන පරිදි නැවතත් පොලිස් ඇදිරි නීතිය පනවා ඇති අතර නැවත දැනුම් දෙන තුරු එය ක්‍රියාත්මක වන බව පොලිස් මාධ්‍ය ප්‍රකාශක පොලිස් අධිකාරී රුවන් ගුණසේකර සඳහන් කරයි.
Facebook Comments
