රනිල් වික්‍රමසිංහට එරෙහිව මහින්ද රාජපක්ෂගේ නායකත්වයෙන් පිහිටුවීමට තැත් කළ රජය තහවුරු කිරීම සඳහා වෙනත් පක්ෂ වලින් පැමිණි මන්ත්‍රීවරුන් මිලට ගත් බවට ඉදිරිපත් වන චෝදනා ජනාධිපතිවරයාද ප්‍රසිද්ධියේ පිළිගෙන තිබේ.
රුපියල් මිලියන 100 සිට 500 දක්වා මන්ත්‍රීවරුන් පක්ෂ මාරු කළ බව ජනාධිපති මෛත්‍රීපාල සිරිසේන 11 ඉරිදා විශේෂ ප්‍රකාශයක් සිදු කරමින් කියා සිටියේය.
“පසුගිය සතිය වන විට දේශපාලන වශයෙන් මෙන්ම සමාජමය වශයෙන් විනයගරුක සහ සදාචාරාත්මක සහ ශීලාචාර සමාජයක් ගොඩනැගීමේ කාර්යය උරුම වී තිබෙන රටේ උතුම්ම ස්ථානය, ජනතා පරමාධිපත්‍ය පැහැදිලිවන ඉහළම ස්ථානය වන පාර්ලිමේන්තුවේ මන්තී‍්‍රවරුන්ගේ වටිනාකම් රුපියල් මිලියන 100 සිට 150 දක්වා, ඒවගේම ඇතැම්විට සමහර මන්තී‍්‍රවරු මිලියන 500 දක්වා මිල නියම කර පෙන්වන්න පටන් ගත්තා.”
එම මිල නියම කිරීම් සිදු වුයේ පාර්ලිමේන්තු බහුතරයක් දිනා ගැනීම පිණිස බව ජනාධිපති පිළිගත්තේය.
“මහින්ද රාජපක්ෂ මහතා අගමැතිවරයා ලෙස පත්කිරීමෙන් පසුව පාර්ලිමේන්තුවේ බහුතරය පෙන්වීම සඳහා ඇතිවූ දේශපාලන උණුසුම් සහගත තත්වයේදී මන්ත්‍රීවරුන්ගේ වටිනාකම් මම පෙර කී පරිදි මිල නියම කිරීම ඒ අය විසින් කරනු ලැබුවා.”
මන්ත්‍රීවරුන් මුදලට විකිණීම පාර්ලිමේන්තුව විසුරුවා හැරීමට මුල් වු ප්‍රධාන කාරණයක් වු බව ජනාධිපතිවරයා සඳහන් කළේ මහින්ද රාජපක්ෂ ඇතුළු ශ්‍රී ලංකා නිදහස් පක්ෂයේ සැලකිය යුතු නායකයන් පිරිසක් ශ්‍රී ලංකා පොදුජන පෙරමුණේ සාමාජිකත්වය ලබා ගැනීම ආරම්භ වීමත් සමගය.
කෙසේ වෙතත් මන්ත්‍රීවරුන් හට මිල නියම කරමින් විවිධ අල්ලස් ලබා දුන් අය සම්බන්ධව ගන්නා ලද ක්‍රියා මාර්ග පිළිබඳව ජනාධිපතිවරයා කිසිවක් ප්‍රකාශ කර නැත.
ශ්‍රී ලංකා නිදහස් පක්ෂයේ එස්.බී. දිසානායක මන්ත්‍රීවරයා විසින් තම පක්ෂයට ආරාධනා කරමින් එසේ පැමිණියහොත් කැබිනට් අමාත්‍ය ධුරයක් ලබා දෙන බවට පොරොන්දු වෙමින් ලබා දුන් “රංගේ එනවද” යනුවෙන් ප්‍රකට දුරකතන ඇමතුම එජාපයේ රංග බණ්ඩාර විසින් ප්‍රසිද්ධියට පත් කරන ලදී.
කැබිනට් අමාත්‍ය ධුරයට අමතරව කෝටි 50ක මුදලක් තමන් වෙත ලබා දීමට පොරොන්දු වු බව දුරකතන ඇමතුම ප්‍රසිද්ධියට පත් කරමින් රංග බණ්ඩාර කියා තිබුණි.
Facebook Comments
