ශ්‍රී ලංකා නිදහස් පක්ෂය ගොඩනගා යළිත් වතාවක් ජයග්‍රාහි මාවතට ගෙන යාමට කටයුතු කරන බව එම පක්ෂයේ නිර්මාතෘ එස්.ඩබ්ලිව්.ආර්.ඩී බණ්ඩාරනායකගේ දියණිය අවධාරණය කරයි.
කවුරුන් පක්ෂය හැර ගියද තමන් නොයන බව මෙන්ම පක්ෂයට ආදරය කරන පිරිස් සමඟ එක්ව ශ්‍රීලනිපය ගොඩනැංවීමට තමන්ද කැප වන බව හිටපු ජනාධිපතිනි චන්ද්‍රිකා බණ්ඩාරනායක නිවේදනයක් නිකුත් කරමින් කියා සිටී.
ශ්‍රී ලංකා පොදු ජන පෙරමුණ තම පක්ෂය යටපත් කිරිමේ උත්සාහය නිරත වන බවටයි ඇය චෝදනා කරන්නේ.
“ජනවාරි අට ශ්‍රිලනිපයත් අනෙකුත් පක්ෂ හා කණ්ඩායම් ඒකරාශි කරගෙන වැදගත් රටක් පිරිසිඳු පාලනයක් ගොඩනැගීම සඳහා කළ සටන ජය ගත්තත් ශ්‍රිලනිප විරෝධී කොටස් පොහොට්‍ටු පක්ෂයට එක්වී ශ්‍රිලනිපය යටපත් කිරීම සඳහා උත්සාහයක් දරමින් තිබෙනවා.”
2015 ජනවාරි අට වනදා ජයග්‍රහණය කළ ජනතා අභිලාශයන් පාවා දෙමින් ජනතාවට ද්‍රෝහී වූ කොටස් සමඟ එක්වී ශ්‍රිලංකා නිදහස් පක්ෂය යටපත් කිරීමට ගන්නා උත්සාහය තරයේ හෙලා දකින බවයි ශ්‍රීලනිප අනුශාසිකා හිටපු ජනාධිපතිනි චන්ද්‍රිකා බණ්ඩාරනායක පවසන්නේ.
මේ අතර ශ්‍රීලනිප අනුශාසක හිටපු ජනපති මහින්ද රාජපක්ෂ පක්ෂයේ තවත් පිරිසක් සමඟ 11 ඉරිදා ශ්‍රී ලංකා පොදු ජන පෙරමුණෙහි සාමාජිකත්වය ලබා ගන්නා ලදී.
Facebook Comments
