සංවර්ධන විශේෂ විධි විධාන පණත හරහා සුපිරි ඇමතිකමක් ඇති කරනු ලබන්නේ රටට පැමිණෙන අයෝජකයන්ගේ පහසුව පිණිස බව සංවර්ධන උපාය මාර්ග හා ජාත්‍යන්තර වෙළඳ අමාත්‍ය මලික් සමරවික්‍රම පවසයි.
මෙවැනි බලතල සහිත ඇමැතිකමක් නිර්මාණය කිරීමට හේතුව අයෝජකයන් හට සිය කටයුතු එකම ස්ථානයකින් සිදු කර ගැනීමට සහ අයෝජනයන් දිරි ගැන්වීමට බවයි ඇමතිවරයා පෙන්වා දෙන්නේ.
සුපිරි ඇමැතිවරයා මඟින් නව අමාත්‍යංශයක් නිර්මාණය කර අයෝජකයන්ට අවශ්‍ය පහසුකම් එම අමාත්‍යංශය හරහා අනෙකුත් අමාත්‍යංශ වලින් ලබා ගැනීමට පහසුකම් සකසන බවයි ඇමති මලික් සමරවික්‍රම කියා සිටියේ.
සංවර්ධන විශේෂ විධි විධාන පණත පලාත් සභා බලතල ලබා ගැනීමට බලාපොරොත්තුවක් නොමැති බවත් අගමැතිවරයා මේ සම්බන්ධව මහ ඇමතිවරුන් සමඟ සාකච්ඡා කිරිමට සුදානම් වන බවද ඇමතිවරයා එහිදී පැවසීය.
රජයට පළාත් සභාවල බලය අවශ්‍ය නැති බවත් රට තුළ කඩිනම් සංවර්ධනයක්‌ ක්‍රියාත්මක කිරීම සඳහා සංවර්ධන විශේෂ විධිවිධාන පනත ගෙන එන බවයි මීට පෙර අගමැතිවරයා ප්‍රකාශ කර තිබුනේ.
යහපාලනය රජය නියෝජනය කරන මන්ත්‍රීවරුන්ගේ ද සුපිරි ඇමැති කම සම්බන්ධයෙන් ඇත්තේ බෙදුන මතයක්ය.
Facebook Comments
