ශ්‍රී ලංකා මුහුදු පතුල සූරාගෙන යන ඉන්දීය යාත්‍රා සම්බන්ධයෙන් දේශපාලන නායක මට්ටමේ සාකච්ඡා තවදුරටත් පැවැත්වෙන්නේ නැති බව ජනාධිපතිවරයාගේ පළමු ඉන්දීය නිල සංචාරය නිමාවී දෙසතියක් ගත වීමටත් මත්තෙන් ශ්‍රී ලංකා රජය විසින් ප්‍රකාශයට පත් කර තිබේ.
උතුරේ ධීවරයන් සෑහීමකට පත්වන තිරසාර විසඳුමක් නොදී දිල්ලියේදී නිමාවුනු නරේන්ද්‍ර මෝදි හා අනුර දිසානායක රාජ්‍ය නායක සාකච්ඡාවලින් අනතුරුව ධීවර, ජලජ සහ සාගර සම්පත් අමාත්‍ය රාමලිංගම් චන්ද්‍රසේකර් ඉකුත් සතියේ යාපනයේදී මාධ්‍යවේදීන් හමුවේ ප්‍රකාශයට පත් කර ඇත්තේ සියළු සාකච්ඡා හමාර බවයි.
“මීට පස්සේ සාකච්ඡා නෑ. ඔක්කොම සාකච්ඡා ඉවරයි. කවුරු එක්කවත් මින් පස්සේ සාකච්ඡා නෑ.”
ධීවර අමාත්‍යාංශයේ නිලධාරීන් සහ ඉන්දීය නිලධාරීන් අතර සාකච්ඡා නතර නොවන නමුත් ඒ සාකච්ඡා දිගටම සිදු කෙරෙන්නේ තාක්ෂණික, වෘත්තීය ඇතුලු වෙනත් කාරණා සම්බන්ධයෙන් පමණක් බවයි අමාත්‍යවරයා පවසන්නේ.
උතුරේ ධීවරයන්ගේ ජීවිකාව අවදානමේ හෙලන නීති විරෝධී ඉන්දීය පන්න ක්‍රම නිසා ණය බරින් මිදීමට වීරිය කරන ශ්‍රී ලංකාවේ ආර්ථිකයටද ඇතිවිය හැකි බලපෑම ගැන ද බිය පලවී තිබේ.
ඉන්දීය අගමැතිවරයා සහ ශ්‍රී ලංකා ජනාධිපතිවරයා අතර දෙසැම්බර් මස මැදදී නව දිල්ලියේදී පැවැත්වුණු සාකච්ඡාව අතරතුරදී දෙරට නායකයන් ධීවර ගැටලුව ‘වැදගත්’ ලෙස හඳුනාගෙන තිබුණි.
“ධීවරයන්ගේ ගැටලුව මානුෂීය ආකාරයකින් විසඳිය යුතු බව අපි සාකච්ඡා කළා,” යැයි ඉන්දීය අගමැතිවරයා පවසා තිබුනේ ශ්‍රී ලංකා ජනාධිපතිවරයා සමග පැවැත්වූ මාධ්‍ය හමුවකදීය.
ධීවර, ජලජ සහ සාගර සම්පත් අමාත්‍ය රාමලිංගම් චන්ද්‍රසේකර් පසුගිය සිකුරාදා (27) යාපනයේ මාධ්‍යවේදීන් හමුවේ වැඩි දුරටත් පවසා ඇත්තේ මානුෂීය ආධාර ලබා දීමක් හෝ ලබාගැනීමක් සම්බන්ධයෙන් සාකච්ඡා සිදු නොකරන බවයි.
“කොහොම උනත්, අපි මානුෂීය ආධාර දෙන්න හරි ලබාගන්න හරි සාකච්ඡා පවත්වන්න යන්නේ නැහැ.”
ශ්‍රී ලංකාවේ ජනාධිපතිවරයාගේ පළමු ඉන්දීය නිල සංචාරය අතරතුරදී දෙරටේ ධීවර ප්‍රශ්නය සම්බන්ධයෙන් සිදු කළ සාකච්ඡා හා එළැඹි තීරණ පිළිබඳව රටට පැහැදිලි තොරතුරක් ලබා නොදීම නිසා, සිය ජීවිකාවට ඇති තර්ජනය එලෙසම පවතිනු ඇතැයි උතුරේ ධීවරයන් පසුගියදා කණස්සල්ල පළ කර තිබුනි.
එමනිසා, සාමකාමී විසඳීමක් ලබා ගැනීම සඳහා තමිල්නාඩු මහඇමැති හා එක්ව කටයුතු කිරීමට පියවර ගන්නා ලෙසත් ධීවර නායකයෝ උතුරේ දෙමළ මහජන නියෝජිතයන්ට බලකර තිබුනි.
ධීවර, ජලජ සහ සාගර සම්පත් අමාත්‍ය රාමලිංගම් චන්ද්‍රසේකර් ඉන්දීය ධීවරයන් උතුරු මුහුදේ මාලුබෑම දකින්නේ අපරාධකාරී ආක්‍රමණයක් ලෙසිනි.
“අපි පේසාලේ ඉන්න ධීවරයන්, වැල්වැටිතුරේ ධීවරයන් සහ වෙනත් තැන්වල ධීවරයන් මුණගැහුනාම ඒ ගොල්ලෝ කියන්නේ ‘මහත්තයෝ, කරුණාකර මේ ඉන්දියන් ධීවරයන් කඩා වදින එක නවත්තලා දෙන්න, නැතිනම් අපිට පවුල් පිටින් ජීවිත නැතිකරගන්නයි වෙන්නේ’ කියලයි. ”
ධිවර අමාත්‍යවරයා පවසන්නේ මුහුදු පතුල සූරාගෙන යන බොටම් ට්‍රෝලින් ඉන්දියාවේද තහනම් කර ඇති බවයි.
“මම මේකම ඉන්දීය මහකොමසාරිස් තුමාටත් කියලා තියෙනවා. ඒ විතරක් නෙවෙයි, මේ බොටම් ට්‍රෝලින් බෝට්ටු ඉන්දියාවේත් තහනම් කරලයි තියෙන්නේ. මේක ඉන්දියාවේත් තහනම් නිසා ඉන්දියාවේ ධීවරයනුත් ඒකට විරුද්ධයි. ඒකට හේතුව තමයි බොටම් ට්‍රෝලින් කියන්නේ මුළු මූදු පතුලම සුද්ද කරගෙන යන එක.”
ඒ වැඩපිළිවෙල නවතා දැමිය යුතු බව පවසන අමාත්‍යවරයා චෝදනා කරන්නේ සාගර පතුල වනසන දැල් පන්න යොදාගන්නා බොටම් ට්‍රෝලින් බෝට්ටුවලින් ශ්‍රී ලංකා මුහුද ආක්‍රමණය කරන්නට එවනු ලබන්නේ ඉන්දීය කුලී කම්කරුවන් බවටයි.
එම බෝට්ටුවල හිමිකාරිත්වය ඉන්දියාවේ දේශපාලකයන්ට හා දැවැන්ත ව්‍යාපාරිකයන්ට අයත් බවත් රාමලිංගම් චන්ද්‍රසේකර් අමාත්‍යවරයා හෙළි කර තිබේ.
“ඒ බෝට්ටු අයිතිකාරයෝ බැලුවාම ඔක්කොම දේශපාලකයෝ, නැතිනම් දැවැන්ත ව්‍යාපාරිකයෝ. ඒ නිසා, හෙට ඒ බෝට්ටු අල්ලලා අත් අඩංගුවට ගත්තම මානුෂික ප්‍රවේශයක් කියන්නේ වෙන මුකුත් නෙවෙයි, ඒ බෝට්ටුවල ඉන්න කුලීකාරයන්ව නිදහස් කරලා යවන එක මිසක්, ඉන්දියාවට ඕනේ විදියට ඇවිත් අපේ මුහුද විනාශ කරන්න දෙන එක නෙවෙයි. දැන් තියෙන්නේ ඉස්සන් අල්ලන කාලේ. ඒ කාලෙට ඇත්තටම වෙන්නේ ඉන්දීය ධීවරයන්, තමිල්නාඩු ධීවරයන් ඇවිත් අපේ මුහුද විනාශ වෙන විදියට කටයුතු කරන එකයි. ”
ඉන්දීය ධීවරයන් මෙරට මුහුදේ සිදු කරන ආක්‍රමණය සම්බන්ධයෙන් ඉන්දියාවේ සියළු වගකිවයුතු බලධාරීන් දැනුවත් බවයි රාමලිංගම් චන්ද්‍රසේකර් අමාත්‍යවරයා පවසන්නේ.
“මේ වැඩකටයුතු ගැන තමිල්නාඩු දේශපාලකයන්ට හොඳට තේරෙනවා. තමිල්නාඩුවේ ඉන්න බුද්ධිමත්තුත් මේ ගැන හොඳට දන්නවා.ඒ විතරක් නෙවෙයි, දිල්ලියේ තියෙන මහ ආණ්ඩුවත් ඒ ගැන දන්නවා. ඒ ඇරුණුකොට මේ කාරණේ ගැන එහෙ ඉන්න උගතුනුත් දන්නවා.”
ඉන්දීය ධීවරයන් මෙරට මුහුදේ සිදු කරන විනාශකාරී ආක්‍රමණය නිසා ලංකාවේ ආර්ථිකයට අනාගතයේ එල්ල විය හැකි අවදානම සම්බන්ධයෙන්ද අමාත්‍යවරයා අනතුරු අඟවා තිබේ.
“බොටම් ට්‍රෝලින්වලින් සුද්ද කරලා දාන්නේ මාළු විතරක් නෙවෙයි, අපේ අනාගත පරම්පරාව සහ අපේ අනාගත ජීවිකාව. ඒගොල්ලෝ කරන මේ විනාසය දිගටම ගියොත්, තව අවුරුදු දහයකින් පහළොවකින් අපේ මුහුදේ මුකුත් ඉතුරු නොවී අපේ මුහුදුකරය කාන්තාරයක් බවට පත් වේවි. මේක අපි විතරක් නෙවෙයි දැන උගත් හැමදෙනාටම තේරෙන දෙයක්.”
උතුරේ ධීවර සංගම් නායකයන් පෙන්වා දෙන පරිදි ඉන්දීය ධීවරයන්ගේ නීති විරෝධි පන්න ක්‍රම නිසා මෙරට ධීවර පවුල් පනස් දාහකට අයත් දෙලක්ෂයක් වන ජනතාවකට එල්ල වන්නේ දැඩි බලපෑමකි.
Facebook Comments
