මරණ, සදාකාලික අංගහානි සහ කෝටි ගණනක දේපල විනාශ සිදුකරමින් දිගන හා තදාසන්න ප්‍රදේශවල කන්ද උඩරට මුස්ලිම්වරුන්ට එරෙහිව හය වසරකට ඉහතදී දියත් කළ ජාතිවාදී කැරැල්ල සම්බන්ධයෙන් ශ්‍රී ලංකා මානව හිමිකම් කොමිසම කළ විමර්ශන‍යේ වාර්තාව පොරොන්දු දිනට එලි නොදැක්වීම පීඩාවට පත් වින්දිතයන් විසින් ප්‍රශ්න කර තිබේ.
රජයේ ආරක්ෂක අංශ ද දිගන කැරැල්ලට හවුල්වූ බවට චෝදනා නැගෙන විශ්වසනීය සාක්ෂි 2024 ජූලි මාසයේ වාර්තා චිත්‍රපටයකින් අනාවරණය කිරීමෙන් අනතුරුව ශ්‍රී ලංකා මානව හිමිකම් කොමිසම සහතික කළේ අවුරුද්ද හමාර වීමට පෙර තමන්ගේ නිර්දේශ ඇතුලත් වාර්තාව එලි දක්වන බවටයි.
2018 දිගන මුස්ලිම් විරෝධී ප්‍රචණ්ඩ ක්‍රියා පිළිබඳ ශ්‍රී ලංකා මානව හිමිකම් කොමිසමේ විමර්ශන වාර්තාව එළි නොදැක්වීම සම්බන්ධයෙන් මේ වසරේ කොළඹදී ප්‍රදර්ශනය කළ ‘කන්ද උඩරට මුස්ලිම් විරෝධී කැරැල්ලට අවුරුදු 6 යි: යුක්තිය කෝ?’ වාර්තා චිත්‍රපටයෙන් හෙළි කිරීමෙන් පසු වසර තුල දී විමර්ශන වාර්තාව නිකුත් කිරීමට අපේක්ෂා කරන බව ආචාර්ය ගෙහාන් ගුණතිලක කොමසාරිස්වරයා බීබීසීයට පවසා තිබුනි.
පොරොන්දු වු පරිදි 2024 වර්ෂය අවසන් වන විටත් එම වාර්තාව නිකුත් කර නොතිබීම සම්බන්ධයෙන් පීඩාවට පත් සහෝදර මුස්ලිම්වරුන් වෙනුවෙන් දෙසැම්බර් 30 වැනිදා ශ්‍රී ලංකා මානව හිමිකම් කොමිසන් සභාවට ලිපියක් යොමු කරමින් මහනුවර වාසී මාධ්‍යවේදී එම්.අයි.එම් මුසාදික් අවධාරණය කර ඇත්තේ සිද්ධිය සිදු වූ දින සිට මේ දක්වා කිහිප වතාවක්ම මානව හිමිකම් කොමිෂන් සභාවට ඒ ගැන සිහිපත් කර තිබියදීත් වර්ෂාවසානයට පෙර එම වාර්තාව ප්‍රසිද්ධියට පත් කර නොමැති බවයි.
කන්ද උඩරට මුස්ලිම්වරුන්ට එරෙහිව ජාතිවාදී කැරැල්ලක් දියත්වී හත් අවුරුද්දක් පිරෙන මේ මොහොතේ නව ආණ්ඩුව යටතේ හෝ එම වාර්තාව කඩිනමින් ජනගත කරන ලෙස මාධ්‍යවේදියා සිය ලිපිය මගින් ඉල්ලා තිබේ.
“මෙම සිදු වීම සම්බන්ධව පසුගිය වසර 6 තුල පාර්ලිමේන්තු සභාව ඇතුලත ද කිහිප වතාවක්ම කතා කර ඇති අතර, මෙම සිදුවීම සම්බන්ධව පත් වූ නව ආණ්ඩුව යටතේවත් වාර්තාවක් කඩිනමින් ජනගත කරදෙන මෙන් ඉතා කාරුණිකව ඉල්ලා සිටිමි.”
රට තුල යුක්තිය ඉටුවීම සම්බන්ධ විශ්වාසය කඩ කරනු ලැබූ පීඩාවට පත් මුස්ලිම්වරුන් දැන් ඉල්ලන්නේ ජාත්‍යන්තර විමර්ශනයකි.
Facebook Comments
