ආගමන විගමන පාලිකා මානව හිමිකම් කොමිසමින් සමාව ඉල්ලයි

යුද අනාථයන් පිරිසක් රඳවා සිටින කඳවුරකට ඇතුල්වී ඔවුන්ගේ සුබසිද්ධිය සැලසීමට ගිය ශ්‍රී ලංකා මානව හිමිකම් කොමිසමේ නිලධාරීන්ට එම අවස්ථාව ඇහිරීම සම්බන්ධයෙන් ආගමන හා විගමන පාලක ජනරාල්වරිය ශ්‍රී ලංකා මානව හිමිකම් කොමිෂන් සභාවට කණගාටුව ප්‍රකාශ කර තිබේ. ‍

මුලතිව් ගුවන් හමුදා කඳවුරේ රඳවා සිටින ළදරුවන්ද ඇතුළු මියන්මාරයෙන් පලා යන රැකවරණ පතන්නන් සියයකට වැඩි පිරිසක රැඳවුම් තත්වය හා සුබසාධනය සොයා බැලීමට වෛද්‍යවරයකු සමග කොමිෂන් සභාවේ ඉහල නිලධාරියෙකු නත්තලට පසුදා ගන්නා ලද උත්සාහය ගුවන් හමුදා නිලධාරීන් විසින් වලක්වන ලද බව කොමිසම සේනාධිනායකද වන ජනාධිපතිට පසුගියදා දැනුම් දී තිබුනි.

ඊට ප්‍රවේශ වීමට අවසර දී නැත්තේ ආගමන විගමන පාලක ජනරාල්වරියගේ නියෝග පරිදි යයි ද එහි සදහන්ව විය.

“එම රැකවරණ පතන්නන් වෙත කිසිදු තැනැත්තෙකුට ප්‍රවේශ වීමට අවසර නොදෙන ලෙස ආගමන විගමනන පාලක ජනරාල්වරිය වෙතින් තමාට නියෝග ලැබී ඇති බව ඉහත කී රැකවරණ පතන්නන් රඳවා තිබූ ගුවන් හමුදා කඳවුර භාර ප්‍රධාන නිලධාරියා මානව හිමිකම් කොමිසම් සභාවේ නිලධාරීන්ට දැනුම් දෙන ලදී,” යි කොමිසමේ සභාපති හිටපු ශ්‍රේෂ්ඨාධිකරණ විනිශ්චයකාර එල් ටී බී දෙහිදෙනිය දෙසැම්බර් 27 දා විසින් ලියන ලද ලිපියේ සඳහන් වේ.

ඉන් අනතුරුව කොමිසම විසින් වැඩ බලන ප්‍රවේශ අවසරය ඉල්ලා ලියන ලද ලිපියට ආගමන හා විගමන පාලක ජනරාල් නිලූෂා බාලසූරියගෙන් ලිඛිත ප්‍රතිචාරයක් ලැබී නැත.

තමන්ගේ රාජකාරියට බාධා කිරීම සම්බන්ධයෙන් දෙසැම්බර් 31 දා පෙරවරු 10.30ට පෙර කරුණු දැක්වීමට ආගමන හා විගමන පාලක ජනරාල්වරිය ඇතුළු නිලධාරීන් ශ්‍රී ලංකා මානව හිමිකම් කොමිසම සභාවට කැදවා තිබුනි.

මානව හිමිකම් කොමිසමට ඔවුන් කරුණු දැක්වීමෙන් පසුව, මාධ්‍ය හමුවක් කැදවමින් දෙසැම්බර් 31 වැනිදා පස්වරුවේ කොමිසමේ සභාපති, හිටපු ශ්‍රේෂ්ඨාධිකරණ විනිශ්චයකාර එල් ටී බී දෙහිදෙනිය දැනුම් දී සිටියේ මානව හිමිකම් කොමිසමට කණගාටුව ප්‍රකාශ කළ කොමසාරිස් ජෙනරාල්තුමිය, සරණාගතයන් පිරිස මගින් කිසියම් රෝගයක් බෝ වීමේ ඉඩ ප්‍රස්ථාවක් තිබෙනවාය යන හැගීම මත ඔවුන් බැලීමට ඉඩ ලබා නොදුන් බව ප්‍රකාශ කළ බවයි.

“එහිදී අද කොමසාරිස් ජෙනරාල්තුමිය අපට දැනුම් දුන්නා ඒ පිළිබදව එතුමියගේ කණගාටුව ප්‍රකාශ කරන බවත්, ප්‍රධාන වශයෙන්ම මෙම පැමිණ සිටින තැනැත්තන්, ආරක්ෂාව සොයමින් පැමිණ සිටින මෙම තැනැත්තන් මගින් කිසියම් රෝගයක් බෝ වීමේ ඉඩ ප්‍රස්ථාවක් තිබෙනවාය කියන හැගීම නිසා තමයි එහෙම කාටවත් බලන්න ඉඩ දුන් නැත්තේ.”

ශ්‍රී ලංකා මානව හිමිකම් කොමිෂන් සභාවේ පරීක්ෂණ හා විමර්ශන අංශ අධ්‍යක්ෂ නිහාල් චන්ද්‍රසිරි මාධ්‍ය වෙත පවසා තිබුනේ සරණාගතයන්ව පරීක්ෂා කර බැලීම සදහා ගිය අවස්ථාවේ එවැනි හේතුවක් එහි සිටි නිලධාරීන් විසින් කියා නොසිටිය බවයි.

මානව හිමිකම් කොමිෂන් සභාවේ නිලධාරීන්ට, මුලතිව් ගුවන් හමුදා කඳවුරේ රඳවා සිටින රොහින්ග්‍යා සරණාගතයන් පරීක්ෂා කර බැලීම සදහා අවශ්‍ය පහසුකම් සැලසීමට ආගමන විගමන පාලක ජනරාල්වරිය එකගතාවය පළ කල බවත් කොමිසමේ සභාපතිවරයා මාධ්‍යවේදීන්ට දැනුම් දී තිබුනි.

“නමුත් ඒ සදහා දැන් අවශ්‍ය සෞඛ්‍ය පහසුකම් ලබා දීම සදහා කටයුතු කරගෙන යන නිසා ඒ අය එකගතාවය පළ කලා මානව හිමිකම් කොමිෂන් සභාවේ නිලධාරීන්ට එම තැනැත්තන්ව පරීක්ෂා කර බැලීම සදහා අවශ්‍ය පහසුකම් ලබා දීම සදහා. ඒ අනුව අපි ඉදිරියට එම අවශ්‍ය කටයුතු කිරීමට බලාපොරොත්තු වෙනවා.”

කොමිසමේ සභාපති, හිටපු ශ්‍රේෂ්ඨාධිකරණ විනිශ්චයකාර එල් ටී බී දෙහිදෙනිය පවසන පරිදි තමන්ගේ රාජකාරියට බාධා කිරීම සම්බන්ධයෙන් කරුනු දැක්වීම සදහා ආගමන විගමන පාලක ජෙනරාල් තුමිය සමග ගුවන් හමුදා නිලධාරීන් සහ මහජන ආරක්ෂක අමාත්‍යාංශයේ නියෝජිතයන් ද ශ්‍රී ලංකා මානව හිමිකම් කොමිසන් සභාවට පැමිණ තිබේ.

ඕනෑම අයකු රඳවාගෙන සිටින ස්ථානයක් පරීක්ෂා කිරීමට මානව හිමිකම් කොමිසම සතු බලතල සම්බන්ධයෙන්ද කොමිසමේ සභාපතිවරයා කොළඹදී මාධ්‍යවේදීන් හමුවේ සිහිපත් කර තිබුනි.

“මානව හිමිකම් කොමිෂන් සභා පනත අනුව අධිකරණ නියෝගයක් හෝ අන්‍ය ආකාරයකින් හෝ රඳවා සිටින ඕනෑම තැනැත්තෙකු පිළිබඳ පරීක්ෂා කර බැලීම සඳහා මානව හිමිකම් කොමිෂන් සභාවට ව්‍යවස්ථාපිත බලයක් පැවරී තිබෙන අතර එම තැනැත්තන් රඳවා සිටින ඕනෑම ස්ථානයකට ගොස් එම පරීක්ෂා කර බැලීම සිදු කළ හැකියි. මෙම ව්‍යවස්ථාපිත බලය යටතේ තමයි මෙම අය පරීක්ෂා කිරීමට ගියේ. නමුත් ඒකට අවස්ථාව නොලැබුනු නිසා ඒක පිළිබඳව හේතු විමසීම සඳහා තමයි මෙම සාකච්ඡාව පැවතුනේ.”

මුලතිව් ගුවන් හමුදා කඳවුරේ රඳවා සිටින 103 දෙනා අතරින් හතලිහකට අධික කුඩා දරුවන්ගෙන් වැඩි දෙනෙකු ළදරුවන් බව මානව හිමිකම් කොමිසම පවසයි. තවත් 12 දෙනෙකු ත්‍රිකුණාමලයේ රක්ෂිත බන්ධනාගාර ගතකොට සිටිති.

දෙසැම්බර් 19 දා මුලතිව් මුහුදු තීරයේ අතරමංව සිටි මියන්මාර යුද්ධයෙන් පලා යන රොහින්ග්‍යා අනාථයන් 115 දෙනාගේ දිවි ගලවාගෙන තිබුනේ යුද පීඩිත මුලතිව්හි දෙමළ ධීවරයන් පිරිසක් විසිනි.