රජයේ ආයතන වලට අමතරව සිංහල ජනතාව විසින් ද දෙමළ ජනතාවගේ ඉඩම් කොල්ලකමින් සිටින බවට දෙමළ ජනතා නියෝජිතයකු චෝදනා කර තිබේ.
ඉලංකෙයි තමිල් අරසු කච්චි පාර්ලිමේන්තු මන්ත්‍රී චාල්ස් නිර්මලනාදන් පවසන්නේ වව්නියාව, සෙට්ටිකුලම ප්‍රාදේශිය ලේකම් කොට්ඨාසයේ වීරපුරම් ප්‍රදේශයේ ජීවත් වන දෙමළ ජනයාට අයත් ඉඩම් අක්කර 250 ක් සිංහල ජනතාව විසින් බලහත්කාරයෙන් අත්පත්කරගෙන ඇති බවයි.
වව්නියාව සම්බන්ධීකාරක රැස්වීමේදී මන්ත්‍රීවරයා හෙළි කර ඇත්තේ 1994 වර්ෂයේදී පවුලකට ඉඩම් අක්කර එක බැගින් අක්කර 400 ක භුමියක් වෙන්කර රජය දෙමළ ජනයා වීරපුරම් හි පදිංචි කළ ද එම ඉඩම් වලින් අක්කර 250 ක් වව්නියාව දකුණ ප්‍රාදේශීය ලේකම් කොට්ඨාසයට අයත් සිංහල ජනතාව විසින් අල්ලාගෙන සිටින බවයි.
ඒ සම්බන්ධයෙන් රජය මේ දක්වා කිසිදු ක්‍රියාමාර්ගයක් ගෙන නොමැති බවට චෝදනා කරන චාල්ස් නිර්මලනාදන් මන්ත්‍රීවරයා සම්බන්ධීකාරක රැස්වීමේදී වැඩි දුරටත් ඉල්ලා ඇත්තේ එම ඉඩම් ආපසු දෙමළ ජනයාට ලබා දීමට කටයුතු කරන ලෙසයි.
උතුරු නැගෙනහිර දෙමළ ජනයාගේ ඉඩම් බලහත්කාරයෙන් අත්පත්කරගන්නා බවට පුරාවිද්‍යා දෙපාර්තමේන්තුව, ආරක්ෂක අමාත්‍යංශය, මහවැලි අධිකාරිය, සංචාරක මණ්ඩලය, වන සංරක්ෂණ හා වනජීවි දෙපාර්තමේන්තු ද දිගින් දිගටම චෝදනාවට ලක්ව සිටී.
Facebook Comments
