ඒකාබද්ධ විපක්ෂ විසින් ජන බලය කොළඹට මැයෙන් සංවිධානය කර ඇති විරෝධතාවයේ අරමුණ විශේෂ මහාධිකරණ හරහා දූෂිතයින්ට එරෙහිව නීතිය කඩිනමින් ක්‍රියාත්මක වීම වළක්වා ගැනීම බව රාජපක්ෂ පාලනයට එරෙහිව සටන් වැඳුනු අමාත්‍යවරයෙකු කියා සිටී.
පෙළපාලි යෑමට තිබෙන අයිතිය වෙනුවෙන් තමන් ද හිමියෙන් පෙනී සිටින බවත් ඒකාබද්ධ විපක්ෂයේ පෙළපාලිය අරමුණ අධිකරණයට බලපෑම් කිරීමට බව පෙන්වා දෙන මුදල් හා ජනමාධ්‍ය අමාත්‍ය මංගල සමරවීර ඔවුන්ගේ බලාපොරොත්තුව එක් අහිංසක මිනිසෙකු හෝ මරාගැනීමට බවයි 04 අඟහරුවාදා පැවති මාධ්‍ය හමුවක දී සඳහන් කළේ.
“පොදු විපක්ෂයේ මේ පෙළපාලිය තිබෙන්නේ අධිකරණයට බලපෑම් කරන්නයි. මේ මොන ජනතා නගිටීමක් ද?තම පියාගේ ප්‍රතිරූපය භාවිතා කරලා, පුතා එනවා. එයාලගේ බලාපොරොත්තුව එක අහිංසක මිනිහෙක් හෝ මරාගන්නයි.අපි ඒකට ඉඩ තියන්නේ නෑ. ආණ්ඩුව දාල යන්නේ ජනතාව ඡන්ද බලයෙන් යන්න කිව්වොත් විතරයි. එදාට ඒ වෙලාවෙම යනවා ” යි ඇමැතිවරයා පැවසීය.
මෙම විරෝධතාව මෙහෙයවන නාමල් ඇතුළු ප්‍රධාන නායකයින්ට බරපතල දුෂණ චෝදනා යටතේ අධිකරණයේ නඩු ඇතැයි ද මේ අයට ඇප දී ඇත්තේ ද දැඩි කොන්දේසි පිට බවද අමාත්‍ය මංගල සමරවීර මාධ්‍ය හමුවේදී සිහිපත් කළේය.
විරෝධතාකරුවන් රජයේ දේපළ හෝ මහජනතාවට හිරිහැර කලහොත් එවැනි මොහොතක බලා සිටීමට සුදානම් නොමැති බවද අමාත්‍යවරයා වැඩි දුරටත් කියා සිටියේය.
Facebook Comments
