සමරිසි තරුණියකට සිය පීඩිත දෙමාපියන්ගෙන් ආරක්ෂාව සලසමින් අධිකරණයක් විසින් ඓතිහාසික නියෝගයක් නිකුත් කර තිබේ.
මෙවන් සිදුවීමකට අදාළව අධිකරණ නියෝගයක් හරහා පුද්ගලයකුට ආරක්ෂාවක් ලබා දුන් ලංකාවේ පළමු අවස්ථාව මෙයයි.
දරුණු අපයෝජනයේ වින්දිත තරුණියක් වූ මැය, ඇගේ ලිංගික දිශානතිය නිසා සති ගණනක් මුළුල්ලේ ඇගේ දෙමාපියන් විසින් නීති විරෝධී ලෙස නිවසේ සිරකර තබා ඇත.
වින්දිත තරුණිය සිරගත කිරීමෙන් අනතුරුව, ඈ සමරිසියකු වීම පදනම් කරගනිමින් වැලිසර මහබාගේ පොලීසියේ සහාය ද ඇතිව ඈට විරුද්ධව නඩු පැවරීමට ඇගේ දෙමාපියන් උත්සාහ දරා ඇත.
මෙම තරුණියගේ ලිංගික දිශානතිය හේතුවෙන් ඈ මනෝවෛද්‍ය තක්සේරුවකට ලක්කිරීමටත්, ඇගේ සමරිසිභාවය පිළිබඳ ‘සාක්ෂි’සොයා ගැනීම සඳහා ශාරීරික පරීක්ෂණයකට ලක්කිරීමටත් පොලීසිය උත්සාහ දරා ඇති බව ඇයගේ නිතිඥයින් පවසයි.
නඩු පැවරීමේදී සමලිංගිකත්වය පිළිබඳ ‘සාක්ෂි’ සොයා ගැනීම සඳහා පොලිස් නිලධාරීන් සහ අධිකරණ වෛද්‍ය නිලධාරීන් සමරිසි (LGBT+) පුද්ගලයන් බලහත්කාරයෙන් ගුද සහ යෝනි පරීක්ෂාවලට යොමුකර ඇති බවට ලේඛනගත සාක්ෂි ඇති බව නීතිඥවරු පවසති.
වින්දිත තරුණිය වෙනුවෙන් පෙනී සිටි නීතීඥ ෂෙවින්ද්‍රි මැනුවෙල්, ජනාධිපති නීතීඥ දිල්රුක්ෂි වික්‍රමසිංහ, එරන්දි අබේනායක, ජෙරුෂා ක්‍රොසෙට් තම්බියා, දිලුමි ද අල්විස් සහ තිෂ්‍යා වේරගොඩ ඇතුළු නීති කණ්ඩායමක් ද සමඟ නොමිලේ නීතී සහාය සපයන සංවිධානයක් වන අයිප්‍රෝබෝනෝ (iProbono) හා කටයුතු කරමින්, සමලිංගිකත්වය අපරාධයක් හෝ මානසික රෝගයක් නොවන බවට වැලිසර මහේස්ත්‍රාත් අධිකරණය හමුවේ සාර්ථකව කරුණු ඉදිරිපත් කරන ලද අතර, ඒ මත අදාළ නඩුව නිශ්ප්‍රභා කරන ලදී.
නඩුව නිශ්ප්‍රභා කිරීමෙන් අනතුරුව, මෙම තරුණිය සිය සහකාරිය සමඟ කොළඹින් පිට ආරක්ෂිත ස්ථානයකට ගොස් ඇත.
කෙසේවෙතත්, ඈට තම දෙමාපියන්ගෙන් දිගින් දිගටම හිරිහැර සිදුව ඇති අතර, දෙමාපියන්ගෙන් තවදුරටත් සිදුවන අපයෝජනයන්ගෙන් ආරක්ෂා වීම සඳහා එම තරුණිය ඇගේ නීතීඥයන් මාර්ගයෙන් ආරක්ෂාව පතමින් සිටියි.
ඇගේ සියලු පෞද්ගලික බඩු බාහිරාදිය, අධ්‍යාපන සහතික සහ හැඳුනුම්පත් ආදී ලේඛන මුදා හැරිය යුතු බවට ඇගේ දෙමාපියන්ට අධිකරණය විසින් තවත් නියෝගයක් නිකුත් කරන ලදී.
නීතීඥයන් විසින් මෙම නියෝගය පිළිබඳ පුවත අනාවරණය කරමින් අවධාරණය කර සිටියේ, මෙය සමරිසි (LGBT+) ප්‍රජාවගේ අයිතිවාසිකම් සහ ආරක්ෂාව පිළිබඳ ශ්‍රී ලංකාවේ නීතිවිද්‍යාවේ පරිණාමය විකාශනය කරනු ලබන සාක්ෂියක් බවයි.
Facebook Comments
