යුද්ධයෙන් වැඩිම පීඩාවට පත් වන්නියෙන් වසරකට ඉහත දී සොයා ගත් සමූහ මිනීවලේ හත් මසකට වැඩි කාලයක් නවතා ඇති කැනීම් කටයුතු මුදල් ප්‍රතිපාදන ලැබීමත් සමග දින දහයක කාලයක් යළිත් වරක් ආරම්භ කර තිබේ.
මුලතිව් අධිකරණ වෛද්‍ය නිලධාරි කනගසබාපති වාසුදේව ජුලි 04 වැනිදා පස්වරුවේ සමුහ සුසානය සමීපයේ සිට ප්‍රදේශයේ මාධ්‍යවේදීන්ට දැනුම් දුන්නේ මෙතෙක් කැනීම් සිදු නොකළ තවත් සිරුරු වලදමා ඇතැයි විශ්වාස කෙරෙන ප්‍රදේශද හෙට දිනයේ සිට කැනීම් කටයුතු සදහා සුදානම් කර තිබෙන බවයි.
“මුදල් නොමැතිකම හේතුවෙන් මෙතෙක් කළක් ප්‍රමාද වී තිබු කොක්කුතොඩුවායි කැණීම් කටයුතු ප්‍රමාණවත් මුදල් වෙන් කළායින් පසුව අද ආරම්භ වී දින 10 ක් අඛන්ඩව සිදු කිරීමට තීරණය අරගෙන තිබෙනවා. එමෙන්ම මේ වන විට මිනිස් ඇටසැකිලි 40ක් සම්පූර්ණයෙන් හෝ අර්ධ වශයෙන් ගොඩ ගෙන ඇති අතර එහි වැඩකටයුතු අද ආරම්භ කර තිබෙනවා. මෙතෙක් කැණීම් කළ ප්‍රදේශ හැර මිනිස් ඇටසැකිලි ඇති බවට සැක කෙරෙන අනිකුත් ප්‍රදේශය එළිපෙහෙළි කර සලකුණු කරලා තියනවා. එම ප්‍රදේශයේ කැණීම් කටයුතු දිගටම සිදු වෙනවා.”
ඉකුත් නොවැම්බර් 21 කැනීම් නැවැත්වීමෙන් අනතුරුව කරන ලද භුගත ස්කෑන් පරීක්ෂණයකින් අනාවරණය වූ පරිදි මිනීවල යාබද මුලතිව් – කෝකිලායි මහාමාර්ගය යටින්ද විහිදෙයි.
එම ප්‍රදේශය කැනීම් කිරීම සදහා හෙට දිනයේදී මාර්ගය සකස් කර දෙන බවට මාර්ග සංවර්ධන අධිකාරිය අද දිනයේ පොරොන්දු වු බවයි පළාත් බද වාර්තාකරුවන් පවසන්නේ.
දැනට සම්පූර්ණ ඇටසැකිලි 40ක් ගොඩගෙන ඇති කොක්කුතොඩුවායි සමූහ මිනීවලේ නවතා ඇති කැනීම් යළි ආරම්භ කිරීම දින නියමයක් නොමැතිව කල් යමින් පැවැතියේ විශේෂඥ මණ්ඩලයක් විසින් ඉල්ලා තිබු මුල්‍ය ප්‍රතිපාදන අධිකරණ අමාත්‍යාංශය විසින් අනුමත නොකිරීම නිසාය.
ඉදිරි කටයුතු සඳහා රුපියල් එක්කෝටි තිස්හත් ලක්ෂයක් අවශ්‍ය වෙතැයි පසුගිය අප්‍රේල් මාසයේ දී ගණන් බලා තිබුණි. එම ප්‍රමාණය නැවත සමාලෝචනය කරන ලෙස අධිකරණ අමාත්‍යාංශය විසින් කරන ලද ඉල්ලීම පරිදි සංශෝධනය කොට ඉල්ලන ලද ලක්ෂ 97ක මුදල ලිඛිතව අනුමත කොට ඇති බව මුලතිව් දිස්ත්‍රික් ලේකම් කාර්යාලයේ ප්‍රධාන ගණකාධිකාරී මයිල්වානගම් සෙල්වරත්නම් ප්‍රාදේශීය මාධ්‍යවේදීන්ට පසුගිය මැයි මාසයේ දී පවසා තිබුනි.
කොක්කුතොඩුවායි සමූහ සුසානයෙන් මෙතෙක් ගොඩගෙන තිබෙන මිනිස් සිරුරු සම්බන්ධයෙන් ඉදිරි වෝහාරික පරීක්ෂණ සඳහා අවශ්‍ය මුදල් ලැබෙන්නේදැයි යන්න පිළිබඳව මේතාක් පැහැදිලි තොරතුරක් නොමැත.
ජාත්‍යන්තර ප්‍රමිතිවලට අනුකුලව ශ්‍රී ලංකාවේ සමූහ මිනී වලවල් නිසියාකාර හඳුනාගෙන, ආරක්ෂා කොට, සංරක්ෂණය කර, විමර්ශන පවත්වන මෙන් එජා මානව හිමිකම් මහකොමසාරිස් කාර්යාලය විසින් එළිදක්වන ලද බලහත්කාර අතුරුදහන් කිරීම් පිළිබඳ අලුත්ම වාර්තාවෙන් රජයට නිර්දේශ කර තිබේ.
කොක්කුතොඩුවායි විමර්ශනයට පුරෝගාමී වී සිටින වෝහාරික පුරාවිද්‍යාඥ මහාචාර්ය රාජ් සෝමදේව විසින් මාර්තු මාසයේ අධිකරණයට දැනුම් දී තිබුනේ සමූහ මිනීවලෙන් ගොඩගන්නා ලද අස්ථි කොටස් අනූව දශකය මැද භාගයේ අවිධිමත් ලෙස වල දමන ලද විමුක්ති කොටි සාමාජිකයන්ගේ බවයි.
ඔවුන් නිසැකයෙන්ම වෙඩි පහරින් මියගොස් ඇති බව ඔහුගේ පිළිගැනීමයි.
කොක්කුතොඩුවායි මහාවිද්‍යාලයේ සිට කෝකිලායි දෙසට මීටර් 200ක් පමණ දුරකින් 2023 ජුනි අගදී මිනිස් සිරුරු කොටස් සහ ඇඳුම් කැබලි අහම්බයෙන් හමුවී තිබුනේ ජල සම්පාදන දෙපාර්තමේන්තුවේ කාර්ය මණ්ඩලය ජලනල එළීමට පොළව හාරමින් සිටියදී ය.
Facebook Comments
