යහපාලන ආණ්ඩුවෙන් කම්කරු නිවාස සඳහා වෙන්කළ ඉඩමක් අත්පත් කරගැනීමට වතු සමාගමක් දැරූ වෑයමක් අසාර්ථක වී තිබේ.
“ලයින් කාමරවල ගෑස් ටැංකි පුපුරා යාමෙන් අනතුරු සිදුවූ නිසා අක්කර හතරක ඉඩමක් අපි කම්කරු නිවාස හදන්න වෙන් කර ගත්ත. පස්සේ ඇති වුනු දේශපාලන වෙනස් කම් ප්‍රයෝජනයට අරගෙන දම්රෝ සමාගම මේ ඉඩම අත්පත් කරගන්න වෑයම් කරනවා,” යැයි දෙමළ ප්‍රගතිශීලි පෙරමුණේ නායක, පාර්ලිමේන්තු මන්ත්‍රී මනෝ ගනේෂන් පවසයි.
අවිස්සාවේල්ල පෙන්රිත් වත්තේ කම්කරුවන් වෙනුවෙන් වෙන් කළ අක්කර හතරක ඉඩම වටා කම්බි වැට යොදා දම්රෝ වැවිලි සමාගම විසින් බලහත්කාරයෙන් අත්පත් කරගෙන ඇති බවට වතු කම්කරුවන් විසින් මනෝ ගනේෂන් මන්ත්‍රීවරයාට දැනුම් දී තිබේ.
ඒ අනුව එහි ගිය මන්ත්‍රීවරයා ඇතුළු පිරිසට දැක ගන්නට ලැබුනේ කම්බි ගසා වට කොට ඇති ඉඩමේ බැකෝ යන්ත්‍ර මගින් බිම් සකසා අලුතින් රබර් වගා අරඹා ඇති බවයි.
අවිස්සාවේල්ල ප්‍රාදේශීය ලේකම්වරයා හමුවූ පාර්ලිමේන්තු මන්ත්‍රී මනෝ ගනේෂන් ඔහුට දොස් පවරනු ලැබුවේ වතු කම්කරුවන් වෙනුවෙන් ලබා දුන් ඉඩම ආරක්ෂා කර ගැනීමට පියවර නොගැනීම සම්බන්ධවයි.
“මම අමාත්‍යංශ සංදේශයක් ඉදිරිපත් කරලා මේ ඉඩම ලබා ගත්තේ වත්තේ කම්කරුවන්ට නිවාස හදලා දෙන්න. ඒකට මුදල් ප්‍රතිපාදනත් වෙන් කරලා තිබුන. ඒත් පාලනය වෙනස් වීම නිසා ඒ වැඩසටහන අත්හැර දමලා. ඉඩම රැකගැනීමේ වගකීම තියෙන්නේ ප්‍රාදේශීය ලේකම්ට.”
මේ සම්බන්ධයෙන් කොළඹ දිස්ත්‍රික් සංවර්ධන කමිටු රැස්වීමේදී සාකච්ජා කර වතු කම්කරුවන්ට නිවාස හදා දෙන්න ක්‍රියා කරන්නේ යැයි දෙමළ ප්‍රගතිශීලි පෙරමුණු නායකයා අවධාරණය කරයි.
Facebook Comments
