ජාතික ළමා ආරක්ෂක අධිකාරියට නව සභාපතිනියක්

නීතීඥ මරිනි ද ලිවේරා ජාතික ළමා ආරක්ෂක අධිකාරියේ නව සභාපති ලෙස ජනාධිපති මෛත්‍රීපාල සිරිසේන විසින් පත්කර තිබේ.

ඒ ජාතික ළමා ආරක්ෂක අධිකාරියේ සභාපති ලෙස කටයුතු කළ ආචාර්ය නටාෂා බාලේන්ද්‍ර සිය පෞද්ගලික හේතුවක් මත ධූරයෙන් ඉල්ලා අස්වීමත් සමඟ බවයි රජයේ ප්‍රවෘත්ති දෙපාර්තමේන්තුව පවසන්නේ.

නීතිවේදී උපාධිධාරිනියක වන මරිනි ද ලිවේරා මානව හිමිකම් පිළිබඳ පශ්චාත් උපාධි ඩිප්ලෝමාවක් ද හිමි කර ගෙන ඇත.

එමෙන්ම ඇය ව්‍යවස්ථා නීතිය හා මානව හිමිකම් නීතිය පිළිබඳ පශ්චාත් උපාධිධාරිනියක් ද වේ.

තව ද ඇය Speech and Drama of Trinity College London හි බලපත්‍රලාභී ගුරුවරියක වන අතර London Academy of Dramatic Art, UK වෙතින් මහජන ඇමතීම සඳහා වන රන් පදක්කමක් ද හිමි කර ගෙන ඇති බව රජයේ ප්‍රවෘත්ති දෙපාර්තමේන්තුව වැඩි දුරටත් සදහන් කරයි.

නීතීඥ මරිනි ද ලිවේරා, මහා බ්‍රිතාන්‍යයේ, ශ්‍රී ලංකාවේ හා සීෂෙල්ස් ජනරජයේ ආණ්ඩුක්‍රම ව්‍යවස්ථා නීතිය, යුරෝපීය නීතිය, අන්තර්ජාතික මානව හිමිකම් නීතිය, අන්තර්ජාතික අපරාධ නීතිය හා පොදු අන්තර්ජාතික නීතිය ඉගැන්වීම මඟින් ශාස්ත්‍රඥයකු ලෙස කටයුතු කර ඇත.

එමෙන්ම ඇය මානව හිමිකම් සහ ව්‍යවස්ථා නීතිය සම්බන්ධ විෂයයන් පිළිබඳව අන්තර්ජාතික හා දේශීය සමුළුවලට සම්මන්ත්‍රණ පත්‍රිකා ඉදිරිපත් කර තිබේ.

නීතීඥ මරිනි ද ලිවේරා ශ්‍රී ලංකා යුධ හමුදාවට හා පොලීසියේ නිලධාරීන්ට මානව හිමිකම් පුහුණු කරන්නියක වශයෙන් ද කටයුතු කර ඇත.

දේශීය හා විදේශීය අමාත්‍යාංශ හා ආයතනවල සම්පත්දායකයකු වශයෙන් ද ඇය කටයුතු කර තිබීම විශේෂත්වයක් බව රජයේ ප්‍රවෘත්ති දෙපාර්තමේන්තුව පෙන්වා දෙයි.

නීතීඥ මරිනි ද ලිවේරා, ඇමරිකා එක්සත් ජනපදයේ හාවර්ඩ් විශ්වවිද්‍යාලයේ Kennedy School of Government හි John F. Kennedy Jr. Forum දී දේශනයක් ද පවත්වා ඇති අතර, ඉතා මෑතක දී ඕස්ට්‍රේලියාවේ මෙල්බර්න් විශ්වවිද්‍යාලයේ නීති පීඨයේ දී ශ්‍රී ලංකාවේ ආණ්ඩුක්‍රම ව්‍යවස්ථා ප්‍රතිසංස්කරණ යන මාතෘකාව යටතේ දේශනයක්ද පවත්වා ඇත.

ඇය ළමා සොල්දාදුවන් පුනරුත්ථාපනය කිරීමේ කමිටුව, බන්ධනාගාර ප්‍රතිසංස්කරණ කමිටුව, ගෘහස්ත ප්‍රචණ්ඩත්වය පිටුදැකීමේ පනත සංශෝධනය කිරීමට කෙටුම්පත් කිරීම සඳහා වූ කමිටුව යන කමිටු වල සාමාජිකයකු වශයෙන් ද කටයුතු කර ඇති අතර, මේ වන විට ජාතික කාන්තා කමිටුවෙහි සාමාජිකයකු වශයෙන් ද කටයුතු කරමින් සිටී.