ආරක්ෂක ලේකම් තුර්කියේ ආයුධ වෙළෙඳ පොලක (VIDEO)

0

ශ්‍රී ලංකාව කෝවිඩ් වසංගත අවදානම නිසා අගුලු දමා තිබියදී ආරක්ෂක ලේකම් වරයා ඇතුළු ශ්‍රී ලංකාවේ හමුදා නිලධාරීන් පිරිසක් ආයුධ වෙළෙඳාම සඳහා තුර්කියේ පවත්වන ලද ප්‍රදර්ශනයකට සහභාගි වී තිබේ.

ඉස්තාන්බුල් අගනුවර පැවැත්වෙන IDEF’21 නමින් හැඳින්වෙන සිව්දින ජාත්‍යන්තර ආරක්ෂක කර්මාන්ත සල්පිල (International Defense Industry Fair) සඳහා සහභාගි වූ විශ්‍රාමික මේජර් ජෙනරාල් කමල් ගුණරත්න එරට ජාතික ආරක්ෂක අමාත්‍ය තුලුසි අකාර් ද හමුවී තිබේ.

එම හමුවේදී “ආරක්‍ෂක කර්මාන්ත ප්‍රදර්ශනය පිළිබඳව සිදුකල සාකච්ඡාවට අමතරව දෙරට අතර ආරක්‍ෂක සබඳතාද ශක්තිමත් කර ගන්නා ලදැ,” යි ශ්‍රී ලංකාවේ ආරක්ෂක අමාත්‍යාංශය නිවේදනය කර ඇත.

නවීන අවි ආයුධ, ගුවන් යානා, ඩ්‍රෝන යානා, ගොඩබිම් වාහන, ඉලෙක්ට්‍රොනික හමුදා උපකරණ, නාවික ක්ෂේත්‍රයේ නිපැයුම්, ගුවන් සේවා පද්ධති, සැපයුම් වාහන, සැපයුම් උපකරණ සහ ආරක්‍ෂක උපකරණ ඇතුළු ආරක්‍ෂක ක්ෂේත්‍රයේ විවිධ නිපැයුම් රැසක් අලෙවියට තබා තිබුණු මෙම සල්පිලෙන් ශ්‍රී ලංකාව කවර ආම්පන්න මිලදී ගත්තේ දැයි ප්‍රසිද්ධියට පත් කර නැත.

තුර්කියේ ශ්‍රී ලංකා තානාපති එම් ආර් හසන්, ශ්‍රී ලංකාවේ ආරක්‍ෂක අමාත්‍යංශයේ හමුදා සම්බන්ධතා නිලධාරි බ්‍රිගේඩියර් දිනේෂ් නානායක්කාර සහ ‌ආරක්‍ෂක ලේකම්ගේ යුද සේවා සහායක කර්නල් කේඩබ්ලිව් ජයවීර යන නිලධාරින්ද තුර්කි ආරක්ෂක අමාත්‍යවරයා සමග අගෝස්තු 19 දා පැවති සාකච්ඡාවට සහභාගි වී තිබේ.

තුර්කි ජනාධිපති රෙචේප් තයියිප් එර්දොගාන්ගේ අනුග්‍රහයෙන්, එරට ජාතික ආරක්‍ෂක අමාත්‍යාංශය යටතේ තුර්කි සන්නද්ධ හමුදා පදනමේ කළමනාකාරිත්වයෙන් TÜYAP ප්‍රදර්ශන ආයතනය විසින් සංවිධානය කරන ලද IDEF’21 සල්පිල, 2021 අගෝස්තු 17 සිට 20 දින දක්වා පැවැත්විණි.

සාමුද්‍රික, ගුවන් හා ගොඩබිම් ආරක්ෂක කටයුතු වල ක්‍රියාකාරීව නිරත ජාත්‍යන්තර සමාගම් දහසක් පමණ වෙළෙඳ ප්‍රදර්ශනයට සහභාගී වන බව තුර්කි ආරක්ෂක අමාත්‍යාංශය නිවේදනය කර තිබේ.

(වීඩියෝ තුර්කි ආරක්ෂක අමාත්‍යංශයේ අනුග්‍රහයෙනි)

Facebook Comments

wedding people