හිටපු ජනාධිපතිත් කෝවිඩ් අරමුදල් රැස් කරයි

වසංගත සමයේ ආධාර වශයෙන් ජනාධිපති කාර්යාලයේ ඉටුකම ව්‍යාපෘතියේ පළමු අදියර වෙනුවෙන් කෝටි එකසිය අසූවකට වැඩි මුදලක් පරිත්‍යාග ලෙස ලැබී තිබියදී, හිටපු ජනාධිපතිවරයාගේ ප්‍රධානත්වයෙන් තවත් කෝවිඩ් අරමුදලක් පිහිටුවීමට කටයුතු සුදානම් කර තිබේ.

ආසාදිත රෝගීන්ට ප්‍රතිකාර සඳහා අවශ්‍ය මෙවලම් මිලදී ගැනීම සඳහා ශ්‍රී ලංකාවේ විශේෂඥ වෛද්‍යවරුන්ද අරමුදලක් ආරම්භ කර ඇත.

ආණ්ඩුවේ හවුල්කාර ශ්‍රී ලංකා නිදහස් පක්ෂය නිවේදනය කර ඇති පරිදි පක්ෂයේ සියලු පාර්ලිමේන්තු මන්ත්‍රීවරුන් සහ 1300ක් පමණ වන පක්ෂයේ ප්‍රාදේශීය මන්ත්‍රීවරුන්ගේ වැටුප් සහ දේශීය සහ විදේශීය පරිත්‍යාගශීලීන්ගේ ආධාර මත පිහිටුවන ලබන “ශ්‍රී ලංකා නිදහස් පක්ෂ කෝවිඩ් අරමුදල” පක්ෂ සභාපති මෛත්‍රීපාල සිරිසේනගේ ප්‍රධානත්වයෙන් හෙට දිනයේ ආරම්භ වේ.

විපක්ෂ නායක සජිත් ප්‍රේමදාසගේ ප්‍රධානත්වයෙන් යුත් සමගි ජනබලවේගයේ මන්ත්‍රී කණ්ඩායම, කොරෝනා ව්‍යසනයෙන් පීඩිත ජනතාව මුදා ගන්නට රෝහල් උපකරණ ලබා ගැනීම උදෙසා සිය වැටුප පරිත්‍යාග කිරීමට තීරණය කර ඇති බව නිවේදනය කිරීමෙන් අනතුරුව ආණ්ඩුවේ හවුල්කාර පක්ෂය මෙම තීරණය ගෙන ඇත.

අමාත්‍ය මහින්දානන්ද අලුත්ගමගේ අද පස්වරුවේ මාධ්‍යවේදීන් සමග පවසා තිබුනේ සියලු කැබිනට් අමාත්‍යවරුන්ගේ අගෝස්තු මස වැටුප කොවිඩ් අරමුදලට පිරිනැමීමට අග්‍රාමාත්‍යවරයා ගෙන ආ යෝජනාවකට කැබිනට් අනුමැතිය හිමිවු බවයි.

මීට අමතරව වසංගත ආසාදිතයන් වෙනුවෙන් ශ්‍රී ලංකා වෛද්‍ය සංගමයත් අරමුදලක් ආරම්භ කළ බව අගෝස්තු 20 වැනිදා නිවේදනය කර තිබුනි.

නිවෙස්වලට වී ප්‍රතිකාර ගන්නා රෝගීන් වෙනුවෙන් ඔක්සිජන් මාපක යන්ත්‍ර ලබා දීමත්, කෝවිඩ් ප්‍රතිකාර මධ්‍යස්ථාන සඳහා ආම්පන්න මිලදී ගැනීමටත් SLMA COVID සහන நிவாரணம் නමින් හැඳින්වෙන එම අරමුදලේ මුදල් යොදවන බව සභාපතිනි දොස්තර පද්මා ගුණරත්න දැනුම් දෙයි.

ආයතනිකව හා පෞද්ගලිකව ලැබෙන පරිත්‍යාග රැස්කොට මේජර් ජනරාල් කේ. බී එගොඩවෙලගේ නායකත්වයෙන් පවත්වාගෙන යන COVID 19 සෞඛ්‍ය හා සමාජ ආරක්ෂණ අරමුදලට මේ වන විට ලැබී ඇති මුළු මුදල රුපියල් එකසිය අසු දෙකෝටි හැත්තෑ තුන් ලක්ෂ දාහතර දහස් නවසිය විසි හතරක් (රුපියල් 1,827,314,924.65) බව ජනාධිපති කාර්යාලය විසින් නිවේදනය කර තිබේ.

සෞඛ්‍ය සේවා, ඖෂධ, පරීක්ෂණ උපකරණ සහ ධාරිතා වර්ධනය ඇතුළු COVID-19 කළමනාකරණය සඳහා සෞඛ්‍ය සේවා අධ්‍යක්ෂ ජනරාල් විසින් දරන ලද වියදම් වෙනුවෙන් එම අරමුදල් යෙදවීමේ එක ක්ෂේත්‍රයක් ලෙස නම් කර ඇත.

ඇමැති යෝජනා

ජනාධිපතිවරයා වෙත ලිපියක් යොමු කරමින් අගෝස්තු 20 සිකුරාදා පෙරවරුවේ සංචාරක අමාත්‍යවරයා යෝජනා කර තිබුනේ වසංගත ව්‍යාප්තිය පාලනය සදහා රට අගුලු දමන්නේනම් ජනතා නියෝජිතයන් හා රාජ්‍ය, පෞද්ගලික අංශයේ වැඩි කරන ජනතාවගේ වැටුපෙන් කොටසක් පරිත්‍යාග කළ යුතු බවයි.

“රට අගුලු දා තිබෙන කාලසීමාවේදී මා ඇතුළු පාර්ලිමේන්තු මන්ත්‍රීවරුන්ගේ වැටුපෙන් 75% ක්, රාජ්‍ය හා පෞද්ගලික සේවකයන්ගේ වැටුපෙන් 50% ක්, සුළු කම්කරුවන්ගේ වැටුපෙන් 30% ක්, පරිත්‍යාග කරමින් දායකත්වය දැක්වීමට යෝජනා කරමි. ”

එම වැඩපිළිවෙළ සදහා සිය දායකත්වය ලබාදීමට ඇති සුදානමද සංචාරක අමාත්‍ය ප්‍රසන්න රණතුංග එදින ජනාධිපතිවරයාට දැනුම් දී තිබුනි.

බන්දුලගේ ප්‍රතිචාරය

රාජ්‍ය සේවකයන්ගේ වැටුප අඩක් අඩුකිරීම සම්බන්ධයෙන් ඉදිරිපත් වී තිබෙන යෝජනා සම්බන්ධයෙන් රජයේ ප්‍රවෘත්ති දෙපාර්තමේන්තු පරිශ්‍රයේ අගොස්තු 21දා පැවති මාධ්‍ය හමුවේදී මාධ්‍යවේදීන් කළ විමසුමකදී වෙළඳ අමාත්‍ය ආචාර්ය බන්දුල ගුණවර්ධන සදහන් කර තිබුනේ රාජ්‍ය සේවකයන්ගේ වැටුපෙන් අඩක් අඩුකිරීමට කිසිඳු තීරණයකට පැමිණ නොමැති අතර ,රාජ්‍ය සේවකයා අපහසුතාවට පත් කිරීමට රජය එවැනි තීරණ නොගන්නා බවයි.

එහෙත් ජාතියක් ලෙස දුෂ්කරතාවයට මුහුණ දෙන අවස්ථාවලදී ඉතිහාසය පුරා රටේ ජනතාවට කැපකිරීම් කිරීමට සිදුව ඇති අතර , මෙම අර්බුදකාරී අවස්ථාවේ දී සෑම පුද්ගලයකුගෙන්ම පරිත්‍යාග රටක් ලෙස දේශීය හා විදේශීයව තමන් බලාපොරොත්තු වන බව ඔහු පවසා තිබුනි.

මේ මොහොතේ දී රජයේ සේවකයන්ගේ වැටුප යම් ප්‍රමාණයක් යොදාගෙන රට අගුලු දැමීම හේතුවෙන් අසරණභාවයට පත්වී සිටින ජනතාව වෙනුවෙන් සරණක් විය හැකි යැයි යෝජනාවක් පමණක් ඉදිරිපත් වී ඇති බවයි අමාත්‍යවරයා එහිදි වැඩි දුරටත් පවසා තිබුනේ.

වෙළද අමාත්‍ය ආචාර්ය බන්දුල ගුණවර්ධන සිය පාර්ලිමේන්තු මන්ත්‍රී වැටුප කොවිඩ් 19 අරමුදලට බැර කිරීම ජනාධිපතිවරයාගේ දැඩි ප්‍රසංසාවට ලක් වු බව ජනාධිපති ලේකම් පී.බී ජයසුන්දර අගෝස්තු 19 වැනිදා ප්‍රකාශයට පත් කර තිබුනි.

 

පීබීගේ පුද්ගලික මුදල් ආයාචනය

ශ්‍රී ලංකාවේ වසගත ව්‍යාප්තිය ආරම්භ වු 2020 වසරේ වෙසක් පෝදාට පෙර දින ආයතන ප‍්‍රධානීන් අමතා ජනාධිපති ලේකම් විසින් රාජ්‍ය සේවකයන්ගේ මාසික වැටුපෙන් කොටසක් ඉල්ලා තිබුනි.

වසංගත සමයේ ආධාර වශයෙන් කෝටි ගණනක් රැස්කරගෙන තිබෙන ජනාධිපති කාර්යාලයේ ඉටුකම ව්‍යාපෘතිය වෙනුවෙන් මුදල් එකතු කරගැනීම සඳහා රජයේ සේවකයන්ට බලපෑම් සිදුව ඇති බව ශ්‍රී ලංකා මානව හිමිකම් කොමිෂන් සභාව ද පසුව පිළිගෙන තිබුනි.

ශ්‍රී ලංකා මානව හිමිකම් කොමිෂන් සභාව විසින් එවකට හෙළිකොට තිබුනේ ජනාධිපති ලේකම් ආචාර්ය පී.බී ජයසුන්දර රාජ්‍ය සේවකයන් සියලු දෙනා වෙත ඔවුන්ගේ ප්‍රධානීන් හරහා සිදුකළ පුද්ගලික මුදල් ආයාචනයට අනුව විවිධ අමාත්‍යංශ හා දෙපාර්තමේන්තු ප්‍රධානීන් සේවකයන් වෙත මුදල් ඉල්ලා ලිපි යොමු කර තිබෙන බවයි.

“එම ලිපි ලේඛන අනුව වැටුප හෝ ඉන් කොටසක් අඩුකර යැවීම අනිවාර්ය කරුණක් බවට පත් වී ඇති බවත්, ඒ සදහා රජයේ සේවකයන්ට වක්‍රව හා ඝෘජු බලපෑම් ඇති බවටත් මානව හිමිකම් කොමිෂන් සභාවට නිරීක්ෂනය වී ඇත,” යි ශ්‍රී ලංකා මානව හිමිකම් කොමිෂන් සභාව පසුගිය වසරේ නිවේදනය කර තිබුනි.

රාජ්‍ය සේවකයන්ගේ මාසික වැටුපෙන් කොටසක් ලිඛිතවම ඉල්ලා සිටි ජනාධිපති ලේකම්ට වෘත්තීය සමිති විරෝධය හමුවේ එම සැලසුම අකුලා ගන්නට සිදුවිය.